Sāshimānwui Naomayara Rāra
Thessalonicanaobingna, mi akhana saphungkahai chithi eina khala, Prohowui zimiksho rāhaira da shāhaira. Paulna hānga, maningmana: ngakaikashi chi rida rāra, kala moreiwui mipā ithumwui Avāwui khorumshimli pamda a khalatta Vare da kaphongshok chila. Chitharan, nganingtitlu, kala nathumli tamchithei kahai chi singtitlu.
2 1Ivānaobing, ithumwui Proho Jishu Khristawui kharā kala awuili ithum khangarum kaji chiwui pongli, ithumna nathumli ngakaowa, 2Prohowui zimiksho kaikhana rāhaira da manglā einala, pao einala, lah ithumwui eina kharā da hānga chithi einala hāngakha, nathumwui ning katotsisi mangatha̱ ngasakhaialu, lah malung matātunghaialu. 3Khikhikhawui apong einala khipānakha nathumli mangui ngasakhaialu; ngakaikashina rida makharāna, kala sāshimān aphanshok kaji moreiwui mipā maphongmila, chi zimiksho marāmara. 4Ana ngakaishi, vare da hānga saikora kala khorumkazat kachiva̱wui tungli a khalatta khāngchikata, chieina ithumwui Avāwui khorumshimli pamda, a khalatta chi Vare da phongshoka. a a v4 Hili 'Vare' da hāngkahai chi masākatatmida khaleina, kaja hiya moreiwui mipāwui minam kala a khalatta khāngchikatawui hāngkasā—a khalattana ngakaishi kasā Avāwui minam kachigat china. 5Ina arui nathumli ngasoda leilakha, tui hi nathumli ina hānghaira kaji nathumna maphaningungmala? 6Ara ali kakhalap kaji nathumna thei, chieina awui atamli a phongmira. 7Kaja moreiwui khangathuma kaikhana ot sāda lei; kha ara kakhalap a chi shongfawui eina khuithuiranglakha eina tangda khalapngaichingra. 8Chitharan moreiwui mipā chi phongmira, ali Proho Jishuna awui khamorwui khaksuikha eina sāthatra kala awui kharāwui kahor eina sāshimānra. 9Moreiwui mipā chi Satanwui otsak eina, pangshap saikora eina, kala minama khudam kala matakhak kahai ot einala rāra, 10kala shimānhaokida khaleibingli makhayā mikhanam kachiva̱ eina minamra; kaja athumna khamashung leishilaka huikhui khavai mayāhaowa. 11Chiwui vang eina, athumna minama chi shitsang khavai, ithumwui Avāna athumli pangshap khalei mikhanam chihovāra, 12chieina khamashung mashitkasanga, kha makhayāli ningyāng unga saikora yonngasakra.
Avāwui Kaholi Nganingtitlu
13Prohona leishikahai ivānaobing, ithumna atam kachida nathumwui vang ithumwui Avāli ningkashi miphalungra; kaja ithumwui Avāna nathumli, Manglā Katharana tharchigat ngasakwui eina kala khamashungli shitkasangwui eina, huikhamiwui vang matheikhare thada kapangkhui. 14Ana ithumwui paokaphā eina nathumli hili hokhui, chieina ithumwui Proho Jishu Khristawui tekhamatei nathumna samphang khavaina. 15Chithada sāda, ivānaobing, nganingtitlu, kala ithumwui khamatui einala lah chithi einala, ithumna nathumli tamchithei kahai khangachā chi singtitlu.
16Ithumwui Proho Jishu Khrista a khalattana, kala ithumli leishikahai kala lukhamashan eina katang makhavai ringpha kala kaphā kachihān ithumli mikahai ithumwui Avāna, 17nathumwui wuklung ringpha ngasakranu kala kaphā otsak kala tui kachiva̱li pang ngasakranu.
