Ithumwui Avāli Ningyāng Ungngasaki Shongfali Okthui
Rida mirinli kathara: khamathang-khamarangwui eina ningkhānchao, ivānaoli makaphā masāla, na khalattawui otli ningkasang, kala khipāli machihānla nathumwui pāng eina ot kasā. Chiwui thili athumwui ningkachāngwui kahāngkhui: thikahaibingli horhaisāthuimara, kha Proho kharā tharan ithumwui Avāna athumli rida shimli khuiungra.
4 1Naomeikapta ivānaobing, ithumwui eina nathumna kathada okthuiphalungki kala ithumwui Avāli ningyāng ungngasakphalungki chi khuisang thada, kala ara nathumna sāda khalei thada, chi matailak eina sāphalungra da ithumna Proho Jishuwui ming singda nathumli hānghai kala kapona. 2Kaja ithumna Proho Jishuwui mangā eina nathumli mikahai ningkhami chi nathumna thei. 3Kaja nathum kathar ngasā khavai, kala nathumna khamathang-khamarangwui eina chihochao khavai, hi ithumwui Avāwui ningkachāngna. 4Nathum kachiva̱na kathar kala khayā eina khalattawui preiva̱ kathada khuirakhala kaji theiphalungra. 5Ithumwui Avāli makatheiwui yurbing thada khamathang khamarangwui malungkachāng eina mazatmara. 6Khipākhana hi otli achināli khangui ot masāla lah tongkazā masamphangmara. Kaja ithumna sāngngarānda nathumli hāngkahai kala hāngkharik kahai thada, ot saikora hili Prohona athut hāngsangki kajina. 7Kaja ithumwui Avāna ithumli makathar sākhavai mahomana, kha kathar sākhavai hokakhuina. 8Chiwui vang eina hi khikha maninga china mikumoli maningla, kha nathumli awui Manglā Kathara khameki ithumwui Avāli khikha maninga. a a v8 Hili ithumwui Avāna awui Manglā Kathara khamea—Avā kala Manglā chi akhaokamānli aming hoirumhaira, ithumli kathar ngasaki leikashili shākhorpali khuizangda.
9Ara chinaongarāwui leikashiwui pongli, nathumli khipākhana kagapikhavai khikha maleimana, kaja akha eina akha leishi ngarok khavai ithumwui Avāna nathum khalattali tamchitheihaira. 10Kala kachangkhat nathumna Macedonia peichaoda khalei ivānaobing saikorali chi sāhaira. Kha ivānaobing, ithumna nathumli chi matailak eina sākhavai kapona, 11kala ithumna nathumli ningmihai thada, shukshuk ringkhavai, nathum kachichāwui otmāng yangkhavai, kala nathum kachichāwui pāng eina ot sākhavai nathumwui ningkatong sālu, 12chithākha nathumna mashitkasangbingwui miktāli mathada okthuira, kala khipākhalila kakhaya makhuimara.
Avāna Awui Naongarāli Shimli Khuiungmi
13Ivānaobing, pihaibingwui pongli ithumna nathumli theingasakngai, chithākha kachihān makhalei kateibing wukhananga thada nathum makhanangmara. 14Kaja Jishu thihaida ringluihaira da ithumna shitsang tharan, chithada ithumwui Avānala Jishuwui mangā eina pihaibingli ali ngasoda khuirāra. 15Kaja hi ithumna Prohowui tui eina nathumli hānga: Proho marāranglakha eina tangda kharing kala katai ithum china pihaibingwui rida kachangkhat mavāmara. 16Kaja Proho khalattana pangshapkakā khavaokhon eina, kazingrao khare akhawui akhon eina kala ithumwui Avāwui talla̱ eina kazingramwui eina tunhaora, kala Khristali khalei thikahaibing china khare ringluira. 17Chiwui thili, aruila kharing kala katai ithum china athumli ngarumda muiyāshong khuithuira, kala masili Proholi samphangra. Chithada ithum atam kachida Proholi ngasoda leira. 18Chiwui vang eina tui hi eina nathum akha eina akha kasatsang ngaroklu.
