ଆମ୍ଭମାନଙ୍କ ପିତାଙ୍କୁ ସନ୍ତୁଷ୍ଟ କରୁଥିବା ପଥରେ ଆଚରଣ

ପ୍ରଥମେ ବ୍ୟାବହାରିକ ପବିତ୍ରତା — ଯୌନ ଶୁଚିତା, ଭାଇ ପ୍ରତି ଅନ୍ୟାୟ ନ କରିବା, ନିଜ କାମରେ ମନ ଦେବା, ଏବଂ ନିଜ ହାତରେ କାମ କରିବା ଯେପରି କାହା ଉପରେ ନିର୍ଭର କରିବାକୁ ନ ପଡ଼େ। ତାʼପରେ ସେମାନଙ୍କ ଶୋକର ଉତ୍ତର: ମୃତମାନେ ପଛରେ ପଡ଼ି ରହିବେ ନାହିଁ, ବରଂ ପ୍ରଭୁ ଆସିବା ବେଳେ ଆମ୍ଭମାନଙ୍କ ପିତା ସେମାନଙ୍କୁ ପ୍ରଥମେ ଘରକୁ ଆଣିବେ।

ଅଧ୍ୟାୟ 4।

ଅବଶେଷରେ, ହେ ଭାଇ ଓ ଭଉଣୀମାନେ, ଆଚରଣ କରିବା ଓ ଆମ୍ଭମାନଙ୍କ ପିତାଙ୍କୁ ସନ୍ତୁଷ୍ଟ କରିବା ବିଷୟରେ ତୁମ୍ଭେମାନେ ଆମ୍ଭମାନଙ୍କଠାରୁ ଯେପରି ଗ୍ରହଣ କଲ, ଆଉ ଯେପରି ତୁମ୍ଭେମାନେ କରୁଅଛ, ସେହିପରି ତୁମ୍ଭେମାନେ ଯେପରି ଆହୁରି ଅଧିକ କର, ଏଥିପାଇଁ ଆମ୍ଭେମାନେ ପ୍ରଭୁ ଯୀଶୁଙ୍କ ନାମରେ ତୁମ୍ଭମାନଙ୍କୁ ଅନୁରୋଧ ଓ ଉତ୍ସାହ ଦେଉଅଛୁ। କାରଣ ଆମ୍ଭେମାନେ ପ୍ରଭୁ ଯୀଶୁଙ୍କ ଦ୍ଵାରା ତୁମ୍ଭମାନଙ୍କୁ ଯେଉଁ ଆଦେଶ ଦେଲୁ, ତାହା ତୁମ୍ଭେମାନେ ଜାଣ। କାରଣ ଆମ୍ଭମାନଙ୍କ ପିତାଙ୍କ ଇଚ୍ଛା ଏହି, ଅର୍ଥାତ୍‍ ତୁମ୍ଭମାନଙ୍କ ପବିତ୍ରତା — ଯେପରି ତୁମ୍ଭେମାନେ ବ୍ୟଭିଚାରଠାରୁ ଦୂରେ ରୁହ, ଯେପରି ତୁମ୍ଭମାନଙ୍କ ପ୍ରତ୍ୟେକ ଜଣ ପବିତ୍ରତା ଓ ସମ୍ମାନରେ ଆପଣା ନିମନ୍ତେ ଭାର୍ଯ୍ୟା ଗ୍ରହଣ କରିବାକୁ ଜାଣେ, ଆମ୍ଭମାନଙ୍କ ପିତାଙ୍କୁ ନ ଜାଣିଥିବା ଅଣଯିହୁଦୀ ଜାତିମାନଙ୍କ ପରି କାମନାର କୁବାସନାରେ ଚାଳିତ ହୋଇ ନୁହେଁ, ଯେପରି ଏହି ବିଷୟରେ କେହି ଆପଣା ଭାଇ ପ୍ରତି ଅନ୍ୟାୟ ନ କରେ କିମ୍ବା ତାହାଠାରୁ ଲାଭ ନ ଉଠାଏ, କାରଣ ପ୍ରଭୁ ଏହିସବୁ ବିଷୟରେ ପ୍ରତିଫଳଦାତା, ଯେପରି ଆମ୍ଭେମାନେ ପୂର୍ବରୁ ତୁମ୍ଭମାନଙ୍କୁ କହିଥିଲୁ ଓ ଦୃଢ଼ଭାବେ ସତର୍କ କରିଥିଲୁ। କାରଣ ଆମ୍ଭମାନଙ୍କ ପିତା ଆମ୍ଭମାନଙ୍କୁ ଅଶୁଚିତା ନିମନ୍ତେ ଆହ୍ଵାନ କଲେ ନାହିଁ, ମାତ୍ର ପବିତ୍ରତାରେ ଆହ୍ଵାନ କଲେ। ଅତଏବ ଯେ ଏହା ଅଗ୍ରାହ୍ୟ କରେ, ସେ ମନୁଷ୍ୟକୁ ନୁହେଁ, ମାତ୍ର ଆମ୍ଭମାନଙ୍କ ପିତାଙ୍କୁ ଅଗ୍ରାହ୍ୟ କରେ, ଯେ ତୁମ୍ଭମାନଙ୍କୁ ଆପଣା ପବିତ୍ର ଆତ୍ମାଙ୍କୁ ଦାନ କରନ୍ତି। ^a

ବର୍ତ୍ତମାନ ଭ୍ରାତୃପ୍ରେମ ବିଷୟରେ ତୁମ୍ଭମାନଙ୍କ ନିକଟକୁ କେହି ଲେଖିବା ଆବଶ୍ୟକ ନାହିଁ, କାରଣ ପରସ୍ପରକୁ ପ୍ରେମ କରିବା ନିମନ୍ତେ ତୁମ୍ଭେମାନେ ନିଜେ ଆମ୍ଭମାନଙ୍କ ପିତାଙ୍କ ଦ୍ଵାରା ଶିକ୍ଷିତ ହୋଇଅଛ। ଆଉ ପ୍ରକୃତରେ ତୁମ୍ଭେମାନେ ସମଗ୍ର ମାକିଦନିଆରେ ଥିବା ସମସ୍ତ ଭାଇ ଓ ଭଉଣୀମାନଙ୍କ ପ୍ରତି ଏହା କରୁଅଛ। କିନ୍ତୁ ହେ ଭାଇ ଓ ଭଉଣୀମାନେ, ତୁମ୍ଭେମାନେ ଯେପରି ଆହୁରି ଅଧିକ କର, ଏଥିପାଇଁ ଆମ୍ଭେମାନେ ତୁମ୍ଭମାନଙ୍କୁ ଉତ୍ସାହ ଦେଉଅଛୁ, ପୁଣି ଯେପରି ତୁମ୍ଭେମାନେ ଆମ୍ଭମାନଙ୍କ ଆଦେଶ ଅନୁସାରେ ଶାନ୍ତଭାବେ ଜୀବନ ଯାପନ କରିବାକୁ, ଆପଣା ଆପଣା କାର୍ଯ୍ୟରେ ମନ ଦେବାକୁ ଓ ଆପଣା ଆପଣା ହସ୍ତରେ କାର୍ଯ୍ୟ କରିବାକୁ ଅଭିଳାଷ କର, ଯେପରି ତୁମ୍ଭେମାନେ ବାହାର ଲୋକମାନଙ୍କ ସମ୍ମୁଖରେ ଯଥାର୍ଥଭାବେ ଆଚରଣ କରିପାର ଓ କାହାରି ଉପରେ ନିର୍ଭରଶୀଳ ନ ହୁଅ।

ପିତା ଆପଣା ସନ୍ତାନମାନଙ୍କୁ ଗୃହକୁ ଆଣନ୍ତି

ହେ ଭାଇ ଓ ଭଉଣୀମାନେ, ନିଦ୍ରିତ ହୋଇଥିବା ଲୋକମାନଙ୍କ ବିଷୟରେ ତୁମ୍ଭେମାନେ ଅଜ୍ଞ ହୋଇ ରୁହ, ଏହା ଆମ୍ଭେମାନେ ଇଚ୍ଛା କରୁ ନାହୁଁ, ଯେପରି ଭରସାହୀନ ଅନ୍ୟ ଲୋକମାନଙ୍କ ପରି ତୁମ୍ଭେମାନେ ଦୁଃଖ ନ କର। କାରଣ ଯୀଶୁ ମୃତ୍ୟୁଭୋଗ କରି ପୁନର୍ବାର ଉଠିଲେ ବୋଲି ଆମ୍ଭେମାନେ ଯେବେ ବିଶ୍ଵାସ କରୁ, ତେବେ ସେହିପରି ଆମ୍ଭମାନଙ୍କ ପିତା ନିଦ୍ରିତ ହୋଇଥିବା ଲୋକମାନଙ୍କୁ ଯୀଶୁଙ୍କ ଦ୍ଵାରା ତାହାଙ୍କ ସହିତ ଆଣିବେ। କାରଣ ପ୍ରଭୁଙ୍କ ବାକ୍ୟ ଦ୍ଵାରା ଆମ୍ଭେମାନେ ତୁମ୍ଭମାନଙ୍କୁ ଏହା କହୁଅଛୁ, ଅର୍ଥାତ୍‍ ଆମ୍ଭେମାନେ ଯେଉଁମାନେ ଜୀବିତ ଅଛୁ ଓ ପ୍ରଭୁଙ୍କ ଆଗମନ ପର୍ଯ୍ୟନ୍ତ ଅବଶିଷ୍ଟ ରହିବା, ଆମ୍ଭେମାନେ କୌଣସିମତେ ନିଦ୍ରିତ ହୋଇଥିବା ଲୋକମାନଙ୍କ ଆଗରେ ଯିବା ନାହିଁ। କାରଣ ପ୍ରଭୁ ସ୍ଵୟଂ ଆଦେଶସୂଚକ ଉଚ୍ଚ ଧ୍ଵନି ସହିତ, ପ୍ରଧାନ ଦୂତଙ୍କ ସ୍ଵର ସହିତ ଓ ଆମ୍ଭମାନଙ୍କ ପିତାଙ୍କ ତୂରୀଧ୍ଵନି ସହିତ ସ୍ଵର୍ଗରୁ ଅବତରଣ କରିବେ, ଆଉ ଖ୍ରୀଷ୍ଟଙ୍କଠାରେ ମୃତ ଲୋକମାନେ ପ୍ରଥମେ ଉଠିବେ। ତତ୍ପରେ ଆମ୍ଭେମାନେ ଯେଉଁମାନେ ଜୀବିତ ଅଛୁ ଓ ଅବଶିଷ୍ଟ ରହିବା, ଆମ୍ଭେମାନେ ସେମାନଙ୍କ ସହିତ ଏକତ୍ର ମେଘମାଳାରେ ଅନ୍ତରୀକ୍ଷରେ ପ୍ରଭୁଙ୍କ ସହିତ ସାକ୍ଷାତ କରିବା ନିମନ୍ତେ ଉଠାଇ ନିଆଯିବା; ଏହିପରି ଆମ୍ଭେମାନେ ସର୍ବଦା ପ୍ରଭୁଙ୍କ ସହିତ ରହିବା। ଅତଏବ ତୁମ୍ଭେମାନେ ଏହିସବୁ ବାକ୍ୟ ଦ୍ଵାରା ପରସ୍ପରକୁ ସାନ୍ତ୍ଵନା ଦିଅ।