Amar Pitri ke Khushi Kora Rasta te Bera

Prothom te pobitro jibon laga kaam laga kotha: gaw laga pobitrota, bhai ke biya nakora, nijor kaam te mon diya, aru nijor hath pora kaam kora, jate kun uporte bhi bhorsa thakibo nalage. Tar pichete tarkhan laga dukh laga jawab: mora manuh khan pichete na thakibo, kintu Prabhu aha homoi te amar Pitri pora tarkhan ke prothom te ghor loi anibo.

Adhyay 4.

Etiya, bhai aru bhoini khan, Prabhu Jisu te amikhan tumikhan ke binti aru utsah di ase: kineka tumikhan beribo lage aru amar Pitri ke khushi koribo lage, eitu amikhan pora tumikhan grohon korise—aru kineka tumikhan kori ase—tenekai aru bhi bisi koribi. Kilemane amikhan Prabhu Jisu laga madhyam pora tumikhan ke ki niyom dise, eitu tumikhan jane. Kilemane eitu amar Pitri laga itcha ase: tumikhan laga pobitrota—tumikhan bebhichar pora dur te thakibi, tumikhan sob ekjon-ekjon pobitrota aru sonman te nijor karne maiki ke kineka lobo lage, eitu jani lobi, amar Pitri ke na jana jati khan nisena kharab itcha laga lalos pora na-cholibi, kun bhi eitu kotha te tar bhai ke biya nakoribi aru thogai nalobi, kilemane Prabhu eitu sob jinis te badla loi diya ekjon ase, kineka amikhan age te tumikhan ke koise aru bhal pora hoshiyar kori dise. Kilemane amar Pitri pora amikhan ke letera jibon te mata nai, kintu pobitrota te matise. Eitu karne kun pora eitu ke hela kore, tai manuh ke nohoi kintu amar Pitri ke hela kore, kun pora tumikhan ke Tar Pobitro Atma di ase. ^a

Etiya bhai laga morom kotha te, tumikhan ke kun pora bhi likhi dibole dorkar nai, kilemane tumikhan nijor ke ekjon-ekjon ke morom koribole amar Pitri pora sikhai dise. Aru hosa bhi tumikhan pura Macedonia te thaka sob bhai aru bhoini khan karne eitu kori ase. Kintu bhai aru bhoini khan, amikhan tumikhan ke eitu aru bhi bisi koribole utsah di ase, aru chup-chap pora thakibole, nijor kaam te mon dibole, aru nijor hath pora kaam koribole, tumikhan laga itcha bonabi, kineka amikhan tumikhan ke niyom dise, titia tumikhan bahar manuh khan age te thik pora beribo aru kun uporte bhi nirbhor nathakibo.

Pitri pora Tar Bacha Khan ke Ghor loi Ane

Bhai aru bhoini khan, ghumai juwa manuh khan laga kotha te tumikhan na jani kene thaka amikhan na-itcha kore, titia tumikhan asha nathaka dusera manuh khan nisena mon dukh nakoribo. Kilemane amikhan Jisu mori jaise aru arubi uthi jaise koi kene biswas kore, tenekai amar Pitri pora bhi ghumai juwa manuh khan ke Jisu laga madhyam pora Tar logote loi anibo. Kilemane eitu amikhan Prabhu laga ekta kotha pora tumikhan ke koi ase: jun amikhan jinda ase aru Prabhu aha homoi tak baki thake, amikhan hosa bhi ghumai juwa manuh khan age te najabo. Kilemane Prabhu nijor pora dangor hukum laga awaj logote, prodhan sorgodoot laga awaj logote aru amar Pitri laga bhigul logote sorgo pora namibo, aru Khrista te mora manuh khan sob age te uthibo. Tar pichete, jun amikhan etiya tak jinda aru baki ase, amikhan tarkhan logote eke logote badal te uthai loi jabo, akas te Prabhu ke lok koribole; tenekai amikhan hodai Prabhu logote thakibo. Eitu karne eitu kotha khan pora ekjon-ekjon ke utsah dibi.