Timothy pora Bhal Khobor Ani Ase

Kuchu khobor napai kene sohibo napara karne, Paul Athens te ekla thaki jaise aru tarkhan laga biswas dukh-kosto te bachi ase na nai, etu janibole Timothy ke pathaise. Timothy bhal khobor loi kene wapas ahise, aru tar aram dil to sunibo pare: etiya amikhan jinda ase. Jisu aha age te tarkhan laga morom bhorti kene uphli jabole tai prathana kore.

Adhyay 3.

Karne, jitia amikhan etu aru soi koribo para nai, titia amikhan Athens te ekla thaki jabole bhabise, amikhan Timothy ke pathaise, kun amar bhai aru Khrista laga susamachar te amar Pitri laga kaam kora sathi ase, tumikhan ke tumikhan laga biswas te mojbut koribole aru mon dangor koribole, titia etu dukh-kosto khan pora tumikhan kunbi hili najabo—amikhan etu nimite he ase koi kene tumikhan nijor jani ase. Jitia amikhan tumikhan logot thakise, amikhan dukh-kosto pabo koi kene age pora tumikhan ke koisile—aru tumikhan jana nisena, etu hoi jaise. Karne, moi aru rukhibo napari kene, tumikhan laga biswas laga khobor jani bole moi pathaise—porikha kora jon pora tumikhan ke porikha kori dise aru amar mehnat bekar hoi jaise koi kene bhoi korise.

Kintu etiya Timothy tumikhan laga usor pora amikhan logot ahhise, aru tumikhan laga biswas aru morom laga bhal khobor anise—tumikhan hodai amikhan ke bhal pora bhabi thake, aru amikhan tumikhan ke sabole itcha kora nisena, tumikhan bhi amikhan ke sabole itcha kori thake. Karne, bhai aru bhoini khan, amikhan laga sob dukh aru digdar te, tumikhan laga biswas pora amikhan ke mon aram dise, kilemane jodi tumikhan Prabhu te mojbut hoi kene khara thake, tene hole etiya amikhan jinda ase. Tumikhan nimite amikhan amar Pitri ke ki dhanyabad dibo paribo, tumikhan karne amikhan amar Pitri age te iman khushi pai kene khushi kora nimite? Rati aru din amikhan tumikhan ke mukh-ke-mukh sabole aru tumikhan laga biswas te etiya bhi komti thaka khan pura koribole, mon dikena prathana kori thake.

Etiya amar Pitri Tai nijor, aru amar Prabhu Jisu pora, amikhan ke tumikhan usor te loijabole rasta dikhai dibi. Prabhu pora, amikhan tumikhan nimite kora nisena, tumikhan ke ekjon-ekjon nimite aru sob manuh nimite morom te bari kene bhorta hobole dibi, titia, jitia amar Prabhu Jisu Tar sob pobitro jon khan logot ahhibo, amar Pitri age te pobitrota te golti nathaka hoi kene, Tai tumikhan laga mon ke mojbut koribo. ^a