1 Mga Taga-Tesalonica 3

3 ¹Busa sa dihang dili na namo kini maantos, nakahukom kami nga magpabilin nga mag-inusara sa Atenas, ²gipadala namo si Timoteo, nga atong igsoon ug masigkamagbubuhat sa atong Amahan diha sa maayong balita ni Cristo, aron sa pagpalig-on ug pagdasig kaninyo diha sa inyong pagtuo, ³aron walay usa kaninyo nga matarog niining mga kalisdanan—kamo mismo nahibalo nga gitakda kita alang niini. ⁴Sa diha nga kauban pa namo kamo, giingnan namo kamo nga daan nga kita mag-antos sa kalisdanan—ug kini nahitabo, sumala sa inyong nahibaloan. ⁵Busa, kay dili na ako makahulat pa, nagpadala ako aron masayran ang inyong pagtuo—nahadlok nga ang maninintal nagtintal kaninyo ug nausik ang among paghago.

⁶Apan karon lang miabot kanamo si Timoteo gikan kaninyo, nga nagdala sa maayong balita sa inyong pagtuo ug gugma—nga kanunay kamong mahinumdom kanamo uban sa kalipay, nga nangandoy nga makigkita kanamo maingon nga kami nangandoy usab nga makigkita kaninyo. ⁷Busa, mga igsoon, sa tanan namong kagul-anan ug kalisdanan, ang inyong pagtuo naghupay kanamo, ⁸kay karon kami buhi, kon kamo nagabarog nga malig-on diha sa Ginoo. ⁹Unsa man ang pasalamat nga among ikabalos sa atong Amahan tungod kaninyo, tungod sa tanang kalipay nga among gibati sa atubangan sa atong Amahan tungod kaninyo? ¹⁰Gabii ug adlaw mainiton kaming nag-ampo nga makigkita kaninyo nawong sa nawong ug matuman ang nakulang pa sa inyong pagtuo?

¹¹Karon hinaut nga ang atong Amahan mismo, ug ang atong Ginoong Jesus, maggiya sa among dalan paingon kaninyo. ¹²Hinaut nga ang Ginoo maghimo kaninyo nga modagaya ug moawas sa gugma alang sa usag usa ug sa tanan, maingon nga ang among gugma nagaawas alang kaninyo, ¹³aron malig-on niya ang inyong mga kasingkasing, nga walay ikasaway diha sa pagkabalaan sa atubangan sa atong Amahan, sa pag-abot sa atong Ginoong Jesus uban sa tanan niyang mga balaan. ^a a v13 Ang ‘iyang mga balaan’ mahimong nagtumong sa mga anghel, sa mga magtutuo nga namatay na, o sa duha niini.