Koip Timoteo Logoiywek che Myach
Amu ki ma muuchi komuita koigeny, ki tebee Paulo eng' Athens ineegei, ak koyookto Timoteo, si konai keele ta kotononot kayaneet eng' nyalilwogik. Ki week Timoteo koibu logoiywek che myach, ak kinyoor mororochik: nguno kesobtos. Ki saaei keele kong'irtagei chamyennywa eng' taitap Jeso ye nyonei.
3 1Nooto, ye kingo mata kemuuchi kemuita koigeny, kilewen ketebee eng' Athens acheek kityo, 2kiyookto Timoteo, tupchennyo ak toretindet ne po Kwandanyo eng' logoiywek che myach che po Kristo, si kogimit ak koigiilok eng' kayaneng'wong', 3si ma aragen age eng' okweek amu nyalilwogichu—ongen okweegei keele kiga kigoochin niito. 4Ye kingo kemi kobootok, kikimwachok eng' tai keele kenyalildosi—ak kayaaksei, ko uu ongen. 5Nooto, ye mata amuuchi aken koigeny, kaayookto si anai agobo kayaneng'wong'—amu aiywei keele kagoyomok yoomsindet ak kobet poisyennyo puch.
6Ago kagonyoonech Timoteo nguno kobun okweek, koibu logoiywek che myach che po kayaneng'wong' ak chamyeng'wong'—keele obwaatech komyee kotugul, omache keger acheek ko uu ye kemache keger okweek. 7Nooto, che kitupche, eng' nyalilwogikyok tugul ak pichiindo, kigaigaech kayaneng'wong', 8amu nguno kesobtos, ngot otonondosi eng' Kiptaiyat. 9Kongoi ne au ne kemuuchi kegoochi Kwandanyo agobo okweek, agobo poiboiyet tugul ne kiboiboitu eng' taitap Kwandanyo amu okweek? 10Kesaei miising' eng' kemoi ak eng' peetuut si kegerok togeng'wong' ak kenyisun ne tee motinye eng' kayaneng'wong'?
11Nguno, ingoboi Kwandanyo ineegei, ak Kiptaiyandennyo Jeso, ooreennyo ko ole omi. 12Ingoyai Kiptaiyat otesage ak ong'irtagei eng' chamyet agobo okweegei ak piik tugul, ko uu ye keyae agobo okweek, 13si kogimit mugulelwekwok, oegu che ititoten eng' tiliilindo eng' taitap Kwandanyo, ye nyo Kiptaiyandennyo Jeso kobooto che tiliileen tugul che po ineendet. a a v13 “Che tiliileen che po ineendet” imuuchi koboorto malaikaisyek, anan piik che iyanen che kagome, anan kobooten agoitugul.