Nagdala si Timoteo sing Maayong Balita
Wala na makaantos sang kahilom, nagpabilin si Pablo nga sing isa lang sa Atenas kag ginpadala si Timoteo sa pagpamangkot kon nabuhi pa ang ila pagtuo sa tunga sang pagpit-os. Nagbalik si Timoteo nga may maayo nga balita, kag mabatian ang paghuway: karon nagakabuhi kami. Nagapangamuyo sia nga mag-awas ang ila gugma antes mag-abot si Jesus.
3 1Gani sang indi na namon maagwanta, ginpili namon nga magpabilin nga kami lamang sa Atenas, 2ginpadala namon si Timoteo, ang aton utod kag kaupod nga mamumugon sang aton Amay sa maayong balita ni Cristo, agud palig-unon kag lipayon kamo sa inyo pagtuo, 3agud wala sing isa sa inyo nga matay-og sining mga kalisdanan—kamo gid mismo nakahibalo nga gintalana kita para sini. 4Sang didto pa kami upod sa inyo, ginsugiran na namon kamo antes nga magaantos kita sing kalisdanan—kag natabo gani ini, subong sang nahibaluan ninyo. 5Gani, sanglit indi na ako makahulat pa, nagpadala ako agud mahibaluan ko ang inyo pagtuo—kay nahadlok ako basi gintilawan kamo sang manunulay kag nangin wala sing pulos ang amon pagpangabudlay.
6Apang bag-o lang nag-abut sa amon si Timoteo halin sa inyo, nga nagdala sing maayong balita sang inyo pagtuo kag gugma—nga pirme ninyo kami ginadumdom sing mahigugmaon, kag nagahandum kamo nga makita kami subong nga kami man nagahandum nga makita kamo. 7Gani, mga kautoran, sa tanan namon nga kasakit kag kalisdanan, ginlipay kami sang inyo pagtuo, 8kay karon nagakabuhi kami, kon nagatindog kamo nga malig-on sa Ginoo. 9Ano nga pagpasalamat ang mabayad namon sa aton Amay tungud sa inyo, tungud sa tanan nga kalipay nga ginakalipay namon sa atubangan sang aton Amay bangud sa inyo? 10Gab-i kag adlaw nagapangamuyo kami sing hugot agud makita namon kamo nga nawong sa nawong kag mapun-an ang kulang pa sa inyo pagtuo?
11Karon kabay pa nga tuytuyan sang aton Amay mismo, kag sang aton Ginoong Jesus, ang amon dalan pakadto sa inyo. 12Kabay pa nga himuon kamo sang Ginoo nga magtubo kag mag-awas sa gugma sa isa kag isa kag sa tanan, subong man sang amon gugma sa inyo, 13agud palig-unon niya ang inyo mga tagipusuon, nga walay kasawayan sa pagkabalaan sa atubangan sang aton Amay, sa pagkari sang aton Ginoong Jesus upod ang tanan niya nga mga balaan. a a v13 Ang “iya mga balaan” mahimo nga nagapatuhoy sa mga anghel, sa mga tumoluo nga napatay na, ukon sa duha.
