1 Tẹsalonika 3

3 ¹Nítorí náà, nígbà tí a kò lè fàradà á mọ́, a yàn láti dúró sẹ́yìn nìkan ní Atẹni, ²a rán Timotiu, arákùnrin wa àti alábàáṣiṣẹ́ Baba wa nínú ìhìnrere Kristi, láti fún yín lókun àti láti gba yín níyànjú nínú ìgbàgbọ́ yín, ³kí ìpọ́njú wọ̀nyí má baà mi ẹnikẹ́ni nínú yín lọ́kàn—ẹ̀yin fúnra yín mọ̀ pé a ti yàn wá fún èyí. ⁴Nígbà tí a wà pẹ̀lú yín, a ti sọ fún yín ṣáájú pé a óò jìyà ìpọ́njú—ó sì ṣẹlẹ̀ bẹ́ẹ̀, gẹ́gẹ́ bí ẹ ti mọ̀. ⁵Nítorí náà, nígbà tí èmi kò lè dúró mọ́, mo ránṣẹ́ láti mọ̀ nípa ìgbàgbọ́ yín—nítorí mo bẹ̀rù pé olùdánwò ti dán yín wò, àti pé iṣẹ́ wa ti dòfo.

⁶Ṣùgbọ́n Timotiu ṣẹ̀ṣẹ̀ dé ọ̀dọ̀ wa láti ọ̀dọ̀ yín, ó mú ìhìn rere ìgbàgbọ́ àti ìfẹ́ yín wá—pé ẹ̀yin máa ń fi ìfẹ́ rántí wa nígbà gbogbo, tí ẹ̀ ń fẹ́ láti rí wa gẹ́gẹ́ bí àwa ti ń fẹ́ láti rí yín. ⁷Nítorí náà, ẹ̀yin ará, nínú gbogbo wàhálà àti ìpọ́njú wa, ìgbàgbọ́ yín tù wá nínú, ⁸nítorí nísinsìnyí àwa wà láàyè, bí ẹ̀yin bá dúró ṣinṣin nínú Olúwa. ⁹Ọpẹ́ wo ni a lè dá padà fún Baba wa nítorí yín, nítorí gbogbo ayọ̀ tí a ń yọ̀ níwájú Baba wa nítorí yín? ¹⁰Òru àti ọ̀sán ni a ń fi ọkàn wa gbàdúrà láti rí yín lójúkojú àti láti mú ohun tí ó ṣì kù nínú ìgbàgbọ́ yín pé?

¹¹Nísinsìnyí, kí Baba wa fúnra rẹ̀, àti Olúwa wa Jesu, tọ́ ọ̀nà wa sọ́dọ̀ yín. ¹²Kí Olúwa mú kí ẹ̀yin pọ̀ sí i, kí ẹ sì kún àkúnwọ́sílẹ̀ ní ìfẹ́ fún ara yín àti fún gbogbo ènìyàn, gẹ́gẹ́ bí àwa ti ní fún yín, ¹³kí ó lè fún ọkàn yín lókun, láìní àbùkù nínú ìwà mímọ́ níwájú Baba wa, nígbà tí Olúwa wa Jesu bá dé pẹ̀lú gbogbo àwọn ẹni mímọ́ rẹ̀. ^a a v13 ‘Àwọn ẹni mímọ́ rẹ̀’ lè tọ́ka sí àwọn áńgẹ́lì, sí àwọn onígbàgbọ́ tí wọ́n ti kú, tàbí sí àwọn méjèèjì.