Timotiei Ngühlang Maibü Künbada
Ngüh tüang natenla athükbü aishanga, Paulei Athebüa künlolo apyokei, hoba haoeneibü mailem khonsak thüka langngailabü lep dogo aoeila shanga Timoti hautikei. Timoti ngühlang maibü yoa longeikei, hoba haksobü kho ditbü thükda: tou sen langa. Jisu loulabü thedanga haoeneibü sanou juongnyulabü dogo haoei welauda.
3 1Kheijinei künei touje natenla athükkei, khoei künei künlolo Athebüa apyola pienkei, 2Kaneibü mailema kan hau kingaitila hoba kan thungeijangeila shanga, künei küneibü jaisina hoba Khrista Ngühlang Maibüa seneibü Bou kümsilei jenabou Timoti hautikei, 3khei kan aoeikei habü khonsak shuongei ashaknyinla shanga; aishanga sen ho shanga phokukei dogo kan lolo ngeakei. 4Künei kan yoa kijinei, sen khonku khonkutilabü dogo künei kan to shangiednyu lenkei; hoba kanei ngeakei tegü kho haüthükkei. 5Kheijinei, touje chüheila athükkei shanga, huonbouei kan huonkei lep hoba küneibü kümsilei jim akibü la yeitilep dogo, kaneibü mailem shangabü ngela shanga ngei hautikei.
6Lausikei Timoti tangshaitham kan ka kün jungto loukei, hoba kaneibü mailem hoba sanou shangabü ngühlang maibü künkei; kanei ponpen kün to maibüa damenda, hoba künei kan hapla maangdühbü tegü kanei kün hapla maangdühda dogo lenkei. 7Hibü, jaisinasi shuong, küneibü khonsak hoba maangshat pendoua, kaneibü mailemei kün maangsukei, 8aishanga kanei Bunyuboua loan kialonga, tou kün langda. 9Kan shanga künei seneibü Bou thedanga olinbü pendoua olinbü kho, kan shanga künei seneibü Bou to ai thangtet kungaila? 10Khüyou chalou künei kan the hapla hoba kaneibü mailema athükbü kho loutila shanga, aei kaangko welauda.
11Tou seneibü Bou himshuong, hoba seneibü Bunyubou Jisuei, küneibü lam kan jungto leiyentiashima. 12Bunyubouei kaneibü cheei che to hoba müt pendou to sanou kho, künei kan to kümbü tegü, himouko hoba sopbojaila kümaishima, 13Kheijinei seneibü Bunyubou Jisu haoeibü saopobü shuong pendou yoa loulaje, kaneibü maangpon kho hau kingaitiashima, khei kanei seneibü Bou thedanga saopobüa mubü yinglabü. a a v13 'Haoeibü saopobü shuong' kho khuthük hangangbü shuong shangabü, ayingsi shaangla haibü mailembü shuong shangabü, ayingsi haosi pendou shangabü kilep.
