Khangenbüa Bou Maangpon
Paulei seneibü Bou thedanga haoen kaijembo jembü jungeibü lam lenletkei, münyen ngüh ayingko, aeilam aeiphop yuklepla ayingko, hoba müteibü soumo to alamla ayingko. Haoei jem lolo na nyatbü amon che thüka, kheijinei shousi shuong yoa kibü bou che thüka chühletkei, hoba aoyou to ahuonettila shanga mühei kümsilei kümkei dogo haoen la angekukei.
2 1Aishanga jaisinasi shuong, kan jungto küneibü loubü kho lejim akitei dogo kanei lulu ngekei. 2Lausikei, kanei ngekei tegü, künei Filipi to khonkukei hoba amaiko jungeibü yingasikei, kaangbüsekbü thangetbü yingasikei haoeibü Ngühlang Maibü kan to lenla shanga künei seneibü Bou yoa hau kingaikei. 3Aishanga küneibü ngekbü kho shedbüa ayingsi asaopobü ka alongda, ayingsi aoyou huonettila künei ahaujembüda. 4Lausikei, seneibü Bouei kün Ngühlang Maibü phejan künla shanga tükde naangkua yingsije, künei hai lenda—mütshuong olinla ayingko, lausikei küneibü maangpon tetbü seneibü Bou olinla. 5Künei, kanei ngekei tegü, ladangkei münyen ngühei ajoyo, ayingsi aeilam aeiphop yuklepla tegü aküm—seneibü Bou aukabü ki. 6Khrista youkoikjai tegü künei seneibü sei yaangkhoulabü yingasikei, künei müteibü soumo to alamda—kan ka ayingko, lubü shuong ka ayingko. 7Lausikei künei kan amon maangnyembo kikei, sen nyatbü naei jembü shousi shuong maangnyembo jungeibü tegü. 8Kheijinei, kan shanga aeibou maangdühko, seneibü Bou Ngühlang Maibü ong ayingko küneibü mang lolokei kan to kanglanga phela künei olinkei, aishanga kan künla aeibou mailabü kikei. 9Aishanga jaisinasi shuong, kanei küneibü kümsilei hoba hüanmangbü damenda: kan yoa cheei la onat akula shanga, seneibü Bou Ngühlang Maibü kan to phinthonko künei khüyou chalou ungkei. 10Kan hoba seneibü Bou aukabü ki, künei kan mailembü shuong to lalokche saopobü, matjem hoba mubü jungeikei. 11Kanei ngekei tegü, bou jembü shousi shuong yoa kümbü tegü künei kan mütpem weko to jungeikei, kan to waangko, solotiko hoba sutiko, 12kan to jembü Sangle hoba soneikangbü to ngabou seneibü Bou shanga mubü langkei langla shanga.
13Hoba kho hangshong künei seneibü Bou la ponpendou nyensang kuda: kanei kün ka ditbü seneibü Bou ngüh sungletjinei, kho müteibü ngühlang tegü ayingko, maimaitham ong kibü tegü, kan mailembü shuong yoa khangenbü haoeibü ngüh tegü, kanei sungletkei. 14Jaisinasi shuong, kanei Jihuda kaodaka Khrista Jisu yoa kibü seneibü Bou lashong shuong tegü yeikei, aishanga haoenei Jihudabü ka khonku lekei tegü, kanei kaneibü jembü mütli ka jeteibü khonku lekei, 15aoei Bunyubou Jisu hoba thuseibü shuong haitikei, kün shian sattikei, seneibü Bou maangpoktikei, hoba müt pendou khulimbo tokyokei, 16Küksithang shuong khümenlabü shanga haoen to kün lenbü ka nangkei, lai pendou haoeneibü shabü takjin shenko apkei. Tou phaila maangshat haoen to sühkei.
Kan Nyibou Hapla Maangdühbü
17Jaisinasi shuong, künei kan ka jihsiphai shisho—mangei, maangponei ayingko—bangan kibü yingsije, aeibou maangdühko kaneibü thenyek hapla künei aei aei haiyeikei. 18Künei kan jungto loula wanthungkei—ngo, Paul, toketsi dogokei—lausikei Satanei kün nangkei. 19Aishanga seneibü Bunyubou Jisu hao loujinei, hao thedanga küneibü maanglem, olinbü ayingsi nyensangbü khun kho ai ki? Kho kan aying lo? 20Haü, kan küneibü soneikangbü hoba olinbü ki.
