Otram Khangatha̱li Avāwui Wuklung
Ithumwui Avāwui mangāli athumwui ngachaili kathada sākhala kaji Paulna phongsanga: mingasamphalak maleila, ningchangnā hamkhavai kahao maleila, akhavā kasā maleila. Ana akhalattali rida ava̱va̱na anaongarāli khanganao thada, chiwui thili avāva̱na anaongarāli kasā thada ngathumzanga, kala khipākha makhanang khavai ngayā mateila ot sākahai chi phaningungngasaka.
2 1Kaja ivānaongarā, ithumna nathumwuili vāyang chi arema maningmana da nathum khalattana thei. 2Kha nathumna thei thada, ithum Philippili kachotkachāng samphangda sāshilak eina sai kahaisālala, ithumna ithumwui Avāwui alungli malung pingmeida panglāk eina ngakaishi kahai leilala awui paokaphā nathumli hānga. 3Kaja ithumwui kapo hi khalāng lah makatharwui eina kashok maningmana, kala mi kateibingli minamki khavaila maningmana. 4Chithālala, ithumwui Avāna ithumli paokaphā shitsangda michithei khavai khuisangkapai kahaiwui vang, ithumna hithāda hānga. Mikumoli ningyāng ungngasak khavai maningla, ithumwui ning tamyang khame ithumwui Avāli ningyāng ungngasak khavaina. 5Nathumna thei thada, ithumna atam kachida sotmasaoda tui eina mahānglakmana, lah kākharāmwui khavai makazang thadala maningmana. Ithumwui Avā hi shākhina. 6Khristawui paokazatbing sāda ithumwui pangshap kuirunngasakshaprahaisālala, nathumwui einala maningla, kateibingwui einala maningla, ithumna mikumowui masot maphāmana. 7Kha na̱ shimankasā ava̱na awui khalatta naoshinaobingli khanim eina yangkhami kathāda, ithum nathumwui ngachaili khanim eina sai. 8Chiwui vang nathumli ningyāng thenglak eina ithum ringphāda ithumwui Avāwui paokaphā mimāng maningla ithum khalattala nathumli mikhangai, kaja ithumna nathumli kachungkha leishihaowa. 9Kaja ivānaongarā, ithumwui ngalangkazār kala kharita ot chi nathumna phaningunga. Nathum kachiva̱li otphun machiphun khavai, nathumli ithumwui Avāwui paokaphā hāshokta ithumna ngashun ngayā ot sai. 10Ithum nathum shitkasangbingli kathāda kathar, khamashunga kala shāt makā eina zathaowa kaji hi nathum kala ithumwui Avā shākhina. 11Nathumna thei thada, avā akhana awui naongarāli kasā thada, ithumna nathum kachiva̱li kasatsangda, ninglum tui hāngda kala kasoda, 12nathumli awui khalatta wungram kala tekhamateili hokakhui ithumwui Avāli mareojeo eina okthui khavai sai.
13Chiwui vangla ithumna atam kachida ithumwui Avāli ningshi. Nathumna ithumwui eina shā kahai ithumwui Avāwui tui khuisang tharan, mikumowui tui thada maningla, chi kachangkhat eina khalei awui tui thada nathumna khuisanga. Chi tui shitkasangbing nathumwui alungli ot sāda lei. 14Ivānaongarā, nathumna Judeali khalei Khrista Jishuli khalei ithumwui Avāwui churchbingli sha̱khui, kaja athumna Jihudibingwui eina kachotkachāng samphang kahai thada nathumna nathumwui khalatta miyurwui eina tākam eina samphanga, 15athumna Proho Jishu kala marānbingli shaothata, ithumli kashamshoka, ithumwui Avāli maringkaphā sai, kala mi saikorali ngakaishi, 16Gentilebingna kahui samphang khavai athumli hāngkhavai ithumli khāmhaowa, hithāda athumna atam kachida athumwui moreiwui mashing sākuphaowa. Ara khanao eina malungvāt chi athumli rāza̱haira.
Nathumli Luishit Khayang Khavai Ningyāng Kahaochinga
17Ivānaongarā, hunkhawui vang azak eina nathumwui eina ngateida leisālala, ning eina ngateida maleimana. Ithumna ningyāng thengda nathumwui mashā khayang khavai hakmahāda ngachonngayiya. 18Ithumna nathumli rāngaisai. Paul ina kakhane kakhaneli rāngaisai, kha Satanna ithumli khāmhaowa. 19Kaja ithumwui Proho Jishuwui mangāli ana rāthang, ithumwui kachihān, ringkaphā, kala langso kuihon chi khilaa? Nathum maningmalā? 20Mha, nathum ithumwui tekhamatei kala ringkaphāna.
