خئدمتده بئر آتا اوره‌یی
پولوس آتامیزین حوضوروندا، اونلارین آراسیندا اؤزونو نجه آپاردیغینی مودافئعه ادئر — یالتاق سؤزلر اولمادان، طاماحا پرده چکمه‌دن و اؤز اختئیارینی ایشلتمه‌دن. او، اؤزونو اوّلجه سود ورَن بئر آنایا، سونرا اؤولادلاری ائله بئر آتایا بَنزَدئر و اونلارا خاطیرلادیر کی، هچ کئمه یوک اولماماق اوچون گجه‌لر ائشله‌دی.
2 1چونکی ای قارداشلار، اؤزونوز بئلئرسئنئز کی، سئزئن یانینیزا گلمه‌یئمئز بوش یره اولمادی. 2آمّا بئلدئیئنئز کئمی، اوّلجه‌دن فئلئپیده عذاب چکئب بئزئمله پئس رفتار اولوندوغو حالدا، شئدّتلی مخالفته باخمایاراق، اونون خوش خبرئنی سئزه دانیشماق اوچون آتامیزدا جسارت تاپدیق. 3چونکی بئزئم دعوتئمیز خطادان یا نجئسلئکدن قایناقلانمیر، نه ده کئمسه‌نی آلداتماغا چالیشیریق. 4عکسئنه، آتامیز بئزی ائنجئلئن امانتئنه لایئق گؤردویو اوچون، بله دانیشیریق؛ ائنسانلاری یوخ، بلکه اوره‌کلرئمئزی ائمتاحان ادن آتامیزی راضی سالماق اوچون. 5بئلدئیئنئز کئمی، هچ واخت یالتاق سؤزلرله دانیشمادیق، نه ده طاماح اوچون بئر پرده اولسون دئیه؛ آتامیز شاهئددئر. 6نه ائنسانلاردان تعرئف آختاردیق، نه سئزدن، نه ده اؤزگه‌لردن؛ گرچی مسئحئن حوارئلری کئمی سئزئن اوستونوزده اختئیاریمیزی ایشلَده بئلردئک. 7آمّا سئزئن آرانیزدا مولایئم ائدیک، اؤز اؤولادلارینا محبّتله قایغی گؤستَرن سود ورن بئر آنا کئمی. 8بله‌جه، سئزئن حسرتئنئزی چکه‌رک، آنجاق آتامیزین خوش خبرئنی یوخ، بلکه اؤز جانیمیزی دا سئزئنله پایلاشماغا راضی ائدیک، چونکی بئزه چوخ عزئز اولموشدونوز. 9چونکی ای قارداشلار، بئزئم زحمت و اَذئیّتئمئزی یادینیزدادیر: هچ بئرئنئزه یوک اولماماق اوچون، گجه-گوندوز ائشله‌یه‌رک، آتامیزین خوش خبرئنی سئزه وعظ اتدئک. 10سئز و آتامیز شاهئدسئنئز کی، سئز ائمانلی‌لارا نجه موقدّس، صالح و کامئل بئر شکئلده رفتار اتدئک. 11بئلدئیئنئز کئمی، هر بئرئنئزله، اؤز اؤولادلاری ائله رفتار ادن بئر آتا کئمی، سئزی روحلاندیریب، تسلّی ورئب و تشوئق اتدئک، 12کی، سئزی اؤز پادشاهلیغینا و جلالینا دعوت ادن آتامیزا لایئق بئر حیات سوره‌سئنئز.
13بونا گؤره بئز ده دائم آتامیزا شوکور ادئرئک: بئزدن اشئتدئیئنئز آتامیزین کلامینی آلاندا، اونو ائنسان سؤزو کئمی یوخ، بلکه حقئقتن ده اولدوغو کئمی، یعنی ائمان گتئرن سئزده عمل ادن اونون کلامی کئمی قبول اتدئنئز. 14ای قارداشلار، سئز یهودئیه‌ده، مسئح عئسادا اولان آتامیزین کئلئسالارینی تقلئد اتدئنئز؛ چونکی سئز ده اؤز هموطنلرئنئزدن، همن اونلارین یهودئلردن چکدئکلری عذابی چکدئنئز، 15اونلار کی، رب عئسانی و پیغمبرلری اؤلدوردولر، بئزی قوووب چیخارتدیلار، آتامیزی ناراضی سالیرلار و هر کسئن ضئدّئنه چیخیرلار، 16قیری‌یهودئلرئن نئجات تاپماسی اوچون، اونلارا دانیشماغیمیزا مانع اولورلار و بله‌جه همئشه اؤز گوناهلارینین اؤلچوسونو دولدورورلار. آمّا نهایت قضب اونلارین اوستونه یتئشدی.
گئنه سئزی گؤرمک حسرتی
17ای قارداشلار، بئر آز مودّته سئزدن آیری دوشدوک - بدنجه، نه اوره‌کجه - اوزونوزو گؤرمه‌یه بؤیوک بئر حسرتله داها چوخ جان آتدیق. 18یانینیزا گلمک ائسته‌دئک - من، پولوس، دفه‌لرله - آمّا شیطان بئزه مانع اولدو. 19چونکی ربّئمئز عئسانین قاباغیندا، اونون گلئشئنده، بئزئم اومئدئمئز، سِوئنجئمئز یا فخر تاجیمیز نه‌دئر؟ مگر سئز دیئلسئنئز؟ 20بلی، سئز بئزئم جلالیمیز و سِوئنجئمئزسئنئز.
