1ይ ተሰሎንቄ 2 FHB Father's Heart Bible™

2 ¹ኣቱም ኣሕዋተይ፥ ምምፃእና ናባኻትኩም ከንቱ ከም ዘይነበረ፥ ንስኻትኩም ባዕልኻትኩም ትፈልጡ ኢኹም። ²ከምትፈልጥዎ፥ ቅድሚ ሕዚ ኣብ ፊልጶስ መከራ ተቐቢልና ተሳቒና እኳ እንተነበርና፥ ብርቱዕ ተቓውሞ እናሃለወ፥ ወንጌሉ ኽንነግረኩም ኣብ ኣቦና ትብዓት ረኸብና። ³እቲ ምሕፅንታና ካብ ስሕተት ወይ ካብ ርኽሰት ኣይኮነን፤ ንሓደ እኳ ከነታልል ኣይንፍትንን ኢና። ⁴እኳ ደኣ፥ ኣቦና ፈቲኑ ወንጌል ስለ ዝኣመነና፥ ከምዙይ ንዛረብ ኣለና፤ ንሰብ ከነሐጕስ ዘይኮነስ፥ ነቲ ልብና ዝፍትን ኣቦና ከነሐጕስ ኢና። ⁵ከምትፈልጥዎ፥ ብቃላት ምሽሓጥ ከቶ ኣይተዛረብናን፤ ንስስዐ መሸፈኒ ኽኾነና ድማ ኣይኮነን፤ ኣቦና ምስክር እዩ። ⁶ካብ ሰብ ውዳሰ ኣይደለናን፤ ካብ ንስኻትኩም ኮነ ካብ ካልኦት፤ ከም ሃዋርያት ክርስቶስ መጠን ግና ብስልጣንና ክንፀቕጠኩም ምኸኣልና። ⁷ኣብ ማእኸልኩም ግና፥ ከምታ ንደቃ ብርህራሀ እትከናኸን ዘተጥቡ እኖ፥ ህዱኣት ኮንና። ⁸ስለዙይ ብዙሕ ፍቑራትና ኮይንኩም ኢኹም እሞ፥ ብዙሕ እናናፈቕናኩም፥ ወንጌል ኣቦና ጥራሕ ዘይኮነስ፥ ነፍስና እውን ክንዕደለኩም ተሓጐስና። ⁹ኣቱም ኣሕዋተይ፥ ድኻምናን ፃዕርናን ትዝክሩ ኢኹም፤ ንሓደ እኳ ካባኻትኩም ከይነኽብድ፥ ወንጌል ኣቦና እናሰበኽናልኩም፥ ለይትን መዓልትን ሰራሕና። ¹⁰ኣብ ማእኸልኩም ኣመንቲ ብኸመይ ብቕድስናን ብፅድቅን ብዘይ ነቐፌታን ከም ዝተመላለስና፥ ንስኻትኩምን ኣቦናን ምስክር ኢኹም። ¹¹ከምትፈልጥዎ፥ ከምቲ ኣቦ ንደቁ ዝገብሮ፥ ንነፍሲ ወከፍኩም እናመዓድናን እናፅናናዕናን እናተማሕፀናን ሓዝናኩም፥ ¹²ነቲ ናብ መንግስቱን ክብሩን ዝፅውዓኩም ኣቦና ዝበቅዕ ህይወት ክትነብሩ፥ ተማሕፀናኩም።

¹³ስለዙይ ድማ ንኣቦና እንተየቋረፅና ኵልሻዕ ነመስግኖ ኣለና፤ ነቲ ካባና ዝሰማዕኹምዎ ቓል ኣቦና ምስ ተቐበልኩም፥ ከም ቓል ሰብ ዘይኮነስ፥ ብሓቂ ኸም ዘለዎ፥ ከም ቓሉ ተቐበልኩምዎ፤ ንሱ ድማ ኣባኻትኩም ኣመንቲ ይሰርሕ ኣሎ። ¹⁴ኣቱም ኣሕዋተይ፥ ነተን ኣብ ይሁዳ ዘለዋ ኣብ ክርስቶስ ኢየሱስ ዝኾና ኣብያተ ክርስቲያናት ኣቦና ተመሰልኩምወን፤ ከምቲ ንሳቶም ካብ ኣይሁድ ዝተቐበልዎ፥ ንስኻትኩምውን ካብ ህዝብኹም ከምኡ መከራ ተቐቢልኩም ኢኹም እሞ፤ ¹⁵እቶም ንጐይታ ኢየሱስን ንነቢያትን ዝቐተሉ፥ ንዓና ዘሳደዱና፥ ንኣቦና ዘጕህዩ፥ ንዅሉ ሰብ ዝፃረሩ፥ ¹⁶ነቶም ኣህዛብ ምእንቲ ኽድሕኑ ከይንዛረቦም ይኽልክሉና፤ ኵሉ ጊዜ ድማ ነቲ መስፈሪ ሓጢኣቶም ይመልእዎ ኣለዉ። ሕዚ ግና ቍጥዓ ኣብ መወዳእታ በፅሖም።

ከም ብሓድሽ ንምርኣይኩም ምናፍቕ

¹⁷ኣቱም ኣሕዋተይ፥ ንቑሩብ ጊዜ ብኣካል እምበር ብልብና ዘይኮነ፥ ካባኻትኩም ተፈሊና ኽነሰ፥ ገፅኩም ንምርኣይ ብዙሕ ሃረር ኢልና ኣዝዩ ተሃንጠና። ¹⁸ናባኻትኩም ክንመፅእ ደሊና፤ ኣነ ጳውሎስ ከዓ ደጋጊመ፤ ሰይጣን ግና ከልከለና። ¹⁹ኣብ ቅድሚ ጐይታና ኢየሱስ ኣብ ምምፅኡ፥ ተስፋና ወይ ሓጐስና ወይ ኣኽሊል ትምክሕትና እንታይ እዩ? ንስኻትኩምዶ ኣይኮንኩምን? ²⁰እወ፥ ንስኻትኩም ክብርናን ሓጐስናን ኢኹም።