1 Thessalonicanao 1

1 ¹Paul, Silas, kala Timothywui eina ithumwui Avā kala Proho Jishu Khristawui alungli khalei Thessalonicawui churchli kagapina. Nathumli lukhamashan kala chingri kahai miranu.

²Ithumwui seihā kasāli nathumli phaningungda, ithumna atam kachida nathum saikorawui vang ithumwui Avāli ningshi.

Athumwui Shitkasang kala Leikashiwui vang Ningkashi Khami

³Ithumna ithumwui Avāwui mangāli nathumwui shitkasang eina kasā otsak, leikashina thānkhami otram khangatha̱, kala ithumwui Proho Jishu Khristali kachihānna thānkhami khāngkathei chi atam kachida phaningungchinga. ⁴Kaja ithumwui Avāna leikashe ivānaobing, ana nathumli kapangkhui kaji ithumna thei, ⁵kaja ithumwui paokaphā chi nathumli tuimāng eina maningla, kha pangshap eina, Manglā Kathara eina, kala chihantit kashungmei eina ngasoda rāhaowa. Nathumwui vang eina nathumwui alungli ithum kathada leikhala kaji nathumna thei. ⁶Nathumna ithum kala Prohowui tākam sāda, kachotkachāng tarākhawui alungli, Manglā Katharana khami khamathān eina pao chi khuisanga, ⁷Chieina Macedonia eina Achaiali khalei shitkasanga mi saikorali nathum tākam ngasāhaowa. ⁸Kaja Prohowui pao chi nathumwui eina ngayaohaowa. Macedonia eina Achaiamāngli maningla, kha ithumwui Avāli nathumwui shitkasang chi apam kachida ngayaohaira. Chiwui vang ithumna khikha hāngkhavai maleimana. ⁹Kaja nathumwui alungli ithumli kathada samphangkhui kahaikhala kaji athum khalatta ithumwui pongli hāngra. Kala nathum meoma̱wui eina ithumwui Avāshong ngalanlaga kharinga kala mashung Avāli otram ngatha̱da, ¹⁰kazingram eina awui Naomayara Jishuli honda lei kajila athumna hāngra. Ithumwui Avāna ali kathiwui eina ringshok ngasaka, kala ana latrā malungkhavātwui eina ithumli ngatangkhame. ^a a v10 Paulna paokaphā hupva̱ chi khaphok kathā eina hānga: Avāna awui Naomayara Jishuli ringshok ngasaka, ana latrā bicharwui eina ithumli ngatangkhame—Avā kala Anaomayara ithumwui huikhamiwui vang ngasoda otsak sāda lei.