ଥେସଲନୀକୀ ପ୍ରତି ଅନୁଗ୍ରହ ଓ ଶାନ୍ତି

ଏକ ନୂତନ ମଣ୍ଡଳୀ ପ୍ରତି ପାଉଲଙ୍କ ଆନ୍ତରିକ ଉତ୍ସାହ, ଏବଂ ପ୍ରଭୁଙ୍କ ପୁନରାଗମନ ବିଷୟରେ ତାହାଙ୍କ ଶିକ୍ଷା।

ଅଧ୍ୟାୟ 1।

ପାଉଲ, ସୀଲ ଓ ତୀମଥି, ଆମ୍ଭମାନଙ୍କ ପିତା ଓ ପ୍ରଭୁ ଯୀଶୁ ଖ୍ରୀଷ୍ଟଙ୍କଠାରେ ସ୍ଥିତ ଥେସଲନୀକୀୟ ମଣ୍ଡଳୀ ନିକଟକୁ; ତୁମ୍ଭମାନଙ୍କ ପ୍ରତି ଅନୁଗ୍ରହ ଓ ଶାନ୍ତି।

ଆମ୍ଭେମାନେ ଆପଣାମାନଙ୍କ ପ୍ରାର୍ଥନାରେ ତୁମ୍ଭ ସମସ୍ତଙ୍କ ବିଷୟ ଉଲ୍ଲେଖ କରି ତୁମ୍ଭ ସମସ୍ତଙ୍କ ନିମନ୍ତେ ସର୍ବଦା ଆମ୍ଭମାନଙ୍କ ପିତାଙ୍କୁ ଧନ୍ୟବାଦ ଦେଉଅଛୁ।

ସେମାନଙ୍କ ବିଶ୍ଵାସ ଓ ପ୍ରେମ ନିମନ୍ତେ ଧନ୍ୟବାଦ

ଆମ୍ଭମାନଙ୍କ ପ୍ରଭୁ ଯୀଶୁ ଖ୍ରୀଷ୍ଟଙ୍କଠାରେ ଥିବା ଭରସାରୁ ଜାତ ତୁମ୍ଭମାନଙ୍କ ବିଶ୍ଵାସର କର୍ମ, ପ୍ରେମର ପରିଶ୍ରମ ଓ ଧୈର୍ଯ୍ୟ ଆମ୍ଭେମାନେ ଆମ୍ଭମାନଙ୍କ ପିତାଙ୍କ ସମ୍ମୁଖରେ ନିରନ୍ତର ସ୍ମରଣ କରୁଅଛୁ। ହେ ପିତାଙ୍କ ପ୍ରିୟ ଭ୍ରାତୃଭଗିନୀମାନେ, ସେ ତୁମ୍ଭମାନଙ୍କୁ ମନୋନୀତ କରିଅଛନ୍ତି ବୋଲି ଆମ୍ଭେମାନେ ଜାଣୁ, କାରଣ ଆମ୍ଭମାନଙ୍କ ସୁସମାଚାର କେବଳ ବାକ୍ୟରେ ନୁହେଁ, ମାତ୍ର ଶକ୍ତିରେ, ପବିତ୍ର ଆତ୍ମାଙ୍କ ସହିତ ଓ ପୂର୍ଣ୍ଣ ନିଶ୍ଚୟତାରେ ତୁମ୍ଭମାନଙ୍କ ନିକଟରେ ଉପସ୍ଥିତ ହୋଇଥିଲା। ତୁମ୍ଭମାନଙ୍କ ନିମନ୍ତେ ଆମ୍ଭେମାନେ ତୁମ୍ଭମାନଙ୍କ ମଧ୍ୟରେ କିପ୍ରକାର ଥିଲୁ, ତାହା ତୁମ୍ଭେମାନେ ଜାଣ। ଆଉ ତୁମ୍ଭେମାନେ ମହା କ୍ଲେଶ ମଧ୍ୟରେ ପବିତ୍ର ଆତ୍ମାଙ୍କଠାରୁ ଜାତ ଆନନ୍ଦ ସହିତ ବାକ୍ୟ ଗ୍ରହଣ କରି ଆମ୍ଭମାନଙ୍କର ଓ ପ୍ରଭୁଙ୍କ ଅନୁଗାମୀ ହେଲ, ଏଣୁ ତୁମ୍ଭେମାନେ ମାକିଦନିଆ ଓ ଆଖାୟାର ସମସ୍ତ ବିଶ୍ଵାସୀଙ୍କ ନିକଟରେ ଆଦର୍ଶ ହୋଇ ଉଠିଲ। କାରଣ ତୁମ୍ଭମାନଙ୍କଠାରୁ ପ୍ରଭୁଙ୍କ ବାକ୍ୟ କେବଳ ମାକିଦନିଆ ଓ ଆଖାୟାରେ ଯେ ନିନାଦିତ ହେଲା, ତାହା ନୁହେଁ, ମାତ୍ର ଆମ୍ଭମାନଙ୍କ ପିତାଙ୍କଠାରେ ଥିବା ତୁମ୍ଭମାନଙ୍କ ବିଶ୍ଵାସ ସର୍ବତ୍ର ବ୍ୟାପିଅଛି, ଏଣୁ ଆମ୍ଭମାନଙ୍କର କିଛି କହିବାର ଆବଶ୍ୟକ ନାହିଁ। କାରଣ ତୁମ୍ଭମାନଙ୍କ ମଧ୍ୟରେ ଆମ୍ଭେମାନେ କିପ୍ରକାର ଗ୍ରହଣ କରାଯାଇଥିଲୁ, ପୁଣି ଜୀବନ୍ତ ଓ ସତ୍ୟ ପିତାଙ୍କ ସେବା କରିବା ନିମନ୍ତେ ତୁମ୍ଭେମାନେ କିପରି ପ୍ରତିମାଗଣଠାରୁ ଆମ୍ଭମାନଙ୍କ ପିତାଙ୍କ ଆଡ଼କୁ ଫେରିଲ, ଏ ବିଷୟ ସେମାନେ ନିଜେ ଆମ୍ଭମାନଙ୍କ ବିଷୟରେ କହୁଅଛନ୍ତି, ଆଉ ତୁମ୍ଭେମାନେ ସ୍ଵର୍ଗରୁ ତାହାଙ୍କ ପୁତ୍ରଙ୍କ ଅପେକ୍ଷାରେ ଅଛ, ଯାହାଙ୍କୁ ଆମ୍ଭମାନଙ୍କ ପିତା ମୃତମାନଙ୍କ ମଧ୍ୟରୁ ଉଠାଇଲେ, ସେହି ଯୀଶୁ, ଯେ ଆଗାମୀ କ୍ରୋଧରୁ ଆମ୍ଭମାନଙ୍କୁ ଉଦ୍ଧାର କରନ୍ତି। ^a