帖撒羅尼迦前書 1

1 ¹保羅、西拉同提摩太,寫信畀喺我哋嘅父同主耶穌基督裡面嘅帖撒羅尼迦教會:願恩惠同平安歸畀你哋。

²我哋成日為你哋眾人感謝我哋嘅父,喺禱告入面提起你哋。

為佢哋嘅信心同愛心感恩

³喺我哋嘅父面前,我哋不斷記念你哋因信心而生嘅工作、因愛心而發嘅勞苦,同埋因為對我哋主耶穌基督嘅盼望而有嘅忍耐。 ⁴我哋嘅父所愛嘅弟兄姊妹啊,我哋知道佢已經揀選咗你哋, ⁵因為我哋所傳嘅福音去到你哋嗰度,唔淨止靠言語,更加係靠能力、聖靈同十足嘅確信。你哋都知道我哋喺你哋中間,為咗你哋係點樣為人。 ⁶你哋效法我哋同埋主,喺極大嘅苦難之中,帶住聖靈所賜嘅喜樂領受咗真道, ⁷以致你哋成為馬其頓同亞該亞所有信徒嘅榜樣。 ⁸因為主嘅道由你哋嗰度傳揚開去,唔淨止喺馬其頓同亞該亞,你哋對我哋嘅父嘅信心更加傳到各處,以致我哋唔使講咩都得。 ⁹因為佢哋自己講返我哋喺你哋中間受到點樣嘅接待,又講你哋點樣離棄偶像,歸向我哋嘅父,去事奉又活又真嘅父, ¹⁰ 又等候佢嘅聖子從天而降——就係我哋嘅父叫佢從死人中復活嘅耶穌,佢拯救我哋脫離將要來嘅忿怒。 ^a a v10 保羅一口氣講出成個福音:阿爸父叫佢嘅聖子耶穌復活,而耶穌拯救我哋脫離將要嚟嘅審判——天父同聖子一齊同工,成就我哋嘅拯救。