Myeeindo ak Kaalyeet eng' Thessalonika
Gimitetap Paulo ne po chamyet eng' kaniset ne leel, ak kaneetisyennyi agobo weeksetap Kiptaiyat.
1 1Paulo, Silas, ak Timoteo, kisirchini kanisetap piigap Thessalonika ne mi Kwandanyo ak Kiptaiyat Jeso Kristo: Ingotep kobootok myeeindo ak kaalyeet.
2Kiweekyi kongoi Kwandanyo kotugul agobo okweek tugul, kemwae agobo okweek eng' saautikyuk.
Kongoi agobo Kayaneetnywa ak Chamyet
3Kibwaate kotugul eng' taitap Kwandanyo poisyoniguk che ki piityo kayaneet, ak labotik che ki iib chamyet, ak muitaeng'wong' ne ki iib kamang'unet eng' Kiptaiyannyo Jeso Kristo. 4Amu kingen, che kitupche che kagocham Kwandanyo, keele kagolewenok, 5amu ki ma konyonjook logoiywek che myach che po acheek eng' ng'aleek kityo, ago ak eng' kimnateet, ak Kabuuset ne Tiliil, ak kaboorunet ne nyiit. Ongen ole ki kiigeu eng' kwenung'wong' agobo okweek. 6Kiyaigei okweek acheek ak Kiptaiyat, otaach ng'olyoondet eng' kwenutap nyaliltaet ne oo, ak poiboiyet ne punu Kabuuset ne Tiliil, 7si koegu okweek kergeindo eng' piik tugul che iyani che mi Makedonia ak Akaia. 8Amu kong'eetee ng'olyootap Kiptaiyat kobun okweek—ma eng' Makedonia ak Akaia kityo, ago kagoit kayaneng'wong' ne itinye eng' Kwandanyo olo tugul komugul—nooto anyun ma kimache kemwa kiy age tugul. 9Amu icheek icheegei komwae agobo acheek ole ki kitaachech eng' kwenung'wong', ak ole oweegei Kwandanyo koristo kanamonik, si oboisyechi Kwanda ne sabei ak ne po iman, 10ak si oagenji Weeriinnyi ne punu kipsengwet, ne ki ing'eetu Kwandanyo eng' ye kagobek—Jeso, ne sarwech eng' nereegek che pwoonei. a a v10 Kuure Paulo logoiywek che myach tugul eng' sait age: ki ing'eetu Kwanda Weeriinnyi Jeso, ne saruech eng' kirwoogutyet ne pwoonei — poisyei Kwanda ak Weeriit kobootegei agobo yetunennyo.