Timothyna Paokaphā Khuiunga
Pao marāsamphangrarthukada Paulna Athensli akhamāng pamsāda, kasaiwui ngachaili athumwui shitkasang leichinglakhala kaji theikhui khavai Timothyli tharāhaowa. Timothyna pao kaphā khuiunga, kala ningkaphāwui akhon shātheia: ara ithum ringa. Jishu kharā mangāli athumwui leikashi luimeiranu da ana seihā sāmi.
3 1Chiwui vang eina ithumna maphungrarluilaga, Athensli ithum khalattamāng pamsang khavai kapangkhuida, 2ithumwui ichinā kala Khristawui paokaphāli ithumwui Avāwui otsakruma Timothyli, nathumwui shitkasangli nathumli pangngasakmi kala kasatsangmi khavai ithumna chihovāhaowa. 3Chieina hikathā kachotkachāng hina nathumwui alungli khipānakha masa̱na̱ungmara. Hiwui vang ithum ngarānping kahaina kaji nathum khalattana thei. 4Ithum nathumli ngaso tharan, ithumna kachotkachāng phungra kaji nathumli sāngngarānda hāngkahaina. Kala nathumna theikahai thada chi shokkahaina. 5Chiwui vang eina ara ngarai ngasak maleila, chipeena nathumli suihaida ithumna kasā ot arema sāhaoki jihaidei da phaninglaga, nathumwui shitkasang theikhui khavai ina chihovāhaowa.
6Kha ara Timothy nathumwui eina ithumwuili rāhaira, nathumwui shitkasang kala leikashiwui chānpao khuiunghaira. Nathumna atam kachida ithumli kaphā eina phaningungchinga, kala ithumna nathumli theingaishun thada nathumnala ithumli theingaishun eina lei kaji ana hāngmihaira. 7Chiwui vang eina, ivānaobing, ithumwui kasak eina kachotkachāng saikorali, nathumwui shitkasang china ithumli ninglum ngasaka, 8kaja nathum Proholi nganingtitta leiakha, ara ithum kharingna. 9Nathumwui vang eina ithumwui Avāwui mangāli ringphā kachida ithum ringphāda khaleiwui vang, nathumwui vang ithumwui Avāwui mangāli ithumna khi ningkashi hanshaprakhala? 10Ngashun ngayā nathumli mashā eina theikhui khavai kala nathumwui shitkasangli aruila makākashung chi kāpei khavai ithumna thukmeida seihā sai.
11Ara ithumwui Avā khalattahon kala ithumwui Proho Jishuna ithumwui apong nathumwuili haimiranu. 12Prohona nathumli mataisang ngasakranu kala ithumna nathumwui vang sāda khalei thada, akha eina akhawui vang kala mi saikorawui vang leikashi eina chungmeimiranu, 13Chieina ithumwui Proho Jishuna awui katharabing saikora eina ngasoda rāra tharan, ithumwui Avāwui mangāli kathar eina shāt makā ngasakda, ana nathumwui ning pangngasakmiranu. a a v13 'Awui katharabing' hi kazingraobing, lah rida thihaikahai shitkasangbing, lah aniva̱ tangda kahāngkhala.
