Thimoti Wisi Nata Musamu wa Bukheti
Bwosu Pholu kálendaku hika kusimbila konda kuyuka nsamu, wásala ku Ateni yandi kaka amana wátuma Thimoti mu kuzaya ni lukwikilu lwa bawu lwátelama ngolu mu phasi. Thimoti wávutuka yi nsamu wa mboti, amana kyesi kyámonika: buthwena tubati zinga. Wusi lombila ni luzolu lwa bawu lwakula lawu ku thwala ya Yesu wakwísa.
3 1Yihana ni, bwosu twákalaku hika yi ngolu za kusimbila, twázola mu kusala kwetu ku Ateni betu kaka, 2twátuma Thimoti, phangi wetu yi mukwetu wa kisalu wa Tata wetu muna Musamu wa Bukheti wa Kidisitu, ndangu kalúsyamisa amana kaluheka kikesa muna lukwikilu lwenu, 3ndangu ka mutu mukati dya benu ku kaníkana muna minyanga myami; benu-benu luzayi ni twáyidikilwa mu mambu mama. 4Muna tangwa twákala hakimosi yi benu, twátekila kuluzimbula ni tukanyokwama munyanga; amana bwásalama, bwosu luzayi. 5Yihana ni, bwosu yikálaku hika yi ngolu za kuhingila, yáthuma mu kulonguka kikuma kya lukwikilu lwenu; yíyuka bweya ni muhukumuni wáluhukumuna amana muhangu wetu wakala wa phamba.
6Kaasi Thimoti wisi katula bwabu kwetu, katukidila kwena benu, kanata Musamu wa Bukheti wa lukwikilu lwenu yi lungongu lwenu; ni lubati tubambukila mboti kosu tangwa, yi lawu dya nzoluka ya kutumona bwosu betu phi thwenina yi nzoluka ya kulumona. 7Yihana ni, baphangi, muna phasi zetu zoosu za ku mbundu yi muna minyanga myetu myosu, lukwikilu lwenu lwátuheka kikesa, 8mukuma buthwena tubati zinga, yuka ni lwenina lutelama ngolu mu Pfumu. 9Matondu mana tulenda vutula kwena Tata wetu kikuma kya benu, kikuma kya kyesi kyosu tubati sangwala ku thwala ya Tata wetu kikuma kya benu? 10Phipha yi mwini tubati lombila ngolu ndangu tulumona ha munwa munwa amana tulungisa kina kikondini ku lukwikilu lwenu?
11Buthwena, bika Tata wetu yandi-meni, yi Pfumu wetu Yesu, kayidika nzila yetu ku kwisa kwena benu. 12Bika Pfumu kalukodisa amana kaluvudisa muna lungongu benu yi benu yi kwena batu boosu, bwosu betu thwenina kwena benu, 13ndangu kasyamisa mbundu zenu, lwakala bakonda kifu muna kudisemisa ku thwala ya Tata wetu, muna tangwa Pfumu wetu Yesu kakwisa hakimosi yi batoma bandi boosu. a a v13 «Batoma bandi» bulenda songila banzyo ba Nzambi, ho batu bakwikila bana bámana fwa, ho bawu boodi.
