1 ተሰሎንቄ 3

3 ¹ከእንግዲህ መቋቋም ባልቻልን ጊዜ፣ በአቴና ብቻችንን ለመቅረት ወሰንን፤ ²በክርስቶስ ወንጌል ወንድማችንና የአባታችን አገልጋይ የሆነውን ጢሞቴዎስን በእምነታችሁ እንዲያበረታችሁና እንዲያጽናናችሁ ወደ እናንተ ላክን፤ ³ይህም ከእናንተ ማንም በእነዚህ መከራዎች እንዳይናወጥ ነው፤ ለዚህ እንደ ተመደብን እናንተ ራሳችሁ ታውቃላችሁ። ⁴ከእናንተ ጋራ በነበርን ጊዜ፣ መከራ እንደምንቀበል አስቀድመን ነግረናችሁ ነበር፤ እናንተም እንደምታውቁት ሆነ። ⁵ስለዚህ ከእንግዲህ መጠበቅ ባልቻልሁ ጊዜ፣ ፈታኙ ፈትኖአችሁ ድካማችን ከንቱ እንዳይሆን ፈርቼ ስለ እምነታችሁ ለማወቅ ላክሁ።

⁶አሁን ግን ጢሞቴዎስ ከእናንተ ዘንድ ወደ እኛ መጥቶ፣ ስለ እምነታችሁና ስለ ፍቅራችሁ፣ ዘወትርም በመልካም እንደምታስቡን፣ እኛ እናንተን ለማየት እንደምንናፍቅ እናንተም እኛን ለማየት እንደምትናፍቁ ምሥራች ነገረን። ⁷ስለዚህ ወንድሞችና እኀቶች ሆይ፣ በጭንቀታችንና በመከራችን ሁሉ፣ እምነታችሁ አጽናናን፤ ⁸እናንተ በጌታ ጸንታችሁ ብትቆሙ፣ አሁን ሕያዋን ነንና። ⁹ስለ እናንተ፣ ስለ እናንተም ምክንያት በአባታችን ፊት ስለምንደሰተው ደስታ ሁሉ፣ ለአባታችን ምን ምስጋና ልንመልስለት እንችላለን? ¹⁰ፊት ለፊት እንድናያችሁ፣ በእምነታችሁም ገና የጎደለውን እንድንፈጽም ሌሊትና ቀን አጥብቀን እንጸልያለን።

¹¹አሁንም አባታችን ራሱ፣ ጌታችን ኢየሱስም፣ መንገዳችንን ወደ እናንተ ያቅኑ። ¹²ጌታም እኛ እናንተን እንደምንወድ፣ እናንተ እርስ በርሳችሁና ለሁሉ ባለው ፍቅር እንድታድጉና እንድትበዙ ያድርጋችሁ፤ ¹³ይህም ጌታችን ኢየሱስ ከቅዱሳኑ ሁሉ ጋራ በሚመጣበት ጊዜ፣ በአባታችን ፊት በቅድስና ነውር የሌላችሁ ሆናችሁ ልባችሁን እንዲያጸና ነው። ^a a v13 “ቅዱሳኑ” መላእክትን፣ አስቀድመው የሞቱ አማኞችን ወይም ሁለቱንም ሊያመለክት ይችላል።