1 ਥੱਸਲੁਨੀਕੀਆਂ 3

3 ¹ਸੋ ਜਦੋਂ ਅਸੀਂ ਹੋਰ ਸਹਿ ਨਾ ਸਕੇ, ਤਾਂ ਅਸੀਂ ਏਹ ਠੀਕ ਸਮਝਿਆ ਕਿ ਇਕੱਲੇ ਅਥੇਨੈ ਵਿੱਚ ਪਿੱਛੇ ਰਹਿ ਜਾਈਏ, ²ਅਤੇ ਅਸੀਂ ਤਿਮੋਥਿਉਸ ਨੂੰ ਭੇਜਿਆ, ਜੋ ਸਾਡਾ ਭਰਾ ਅਤੇ ਮਸੀਹ ਦੀ ਖ਼ੁਸ਼ ਖ਼ਬਰੀ ਵਿੱਚ ਸਾਡੇ ਪਿਤਾ ਦਾ ਸੇਵਕ ਸਾਥੀ ਹੈ, ਤਾਂ ਜੋ ਉਹ ਤੁਹਾਨੂੰ ਤੁਹਾਡੀ ਨਿਹਚਾ ਵਿੱਚ ਤਕੜਾ ਕਰੇ ਅਤੇ ਹੌਸਲਾ ਦੇਵੇ, ³ਤਾਂ ਜੋ ਤੁਹਾਡੇ ਵਿੱਚੋਂ ਕੋਈ ਵੀ ਇਨ੍ਹਾਂ ਬਿਪਤਾਵਾਂ ਦੇ ਕਾਰਨ ਨਾ ਡੋਲੇ—ਤੁਸੀਂ ਆਪ ਜਾਣਦੇ ਹੋ ਕਿ ਅਸੀਂ ਇਸੇ ਲਈ ਠਹਿਰਾਏ ਗਏ ਹਾਂ। ⁴ਜਦੋਂ ਅਸੀਂ ਤੁਹਾਡੇ ਨਾਲ ਸਾਂ, ਤਾਂ ਅਸੀਂ ਤੁਹਾਨੂੰ ਪਹਿਲਾਂ ਹੀ ਦੱਸ ਦਿੱਤਾ ਸੀ ਕਿ ਅਸੀਂ ਦੁੱਖ ਭੋਗਾਂਗੇ—ਅਤੇ ਏਦਾਂ ਹੀ ਹੋਇਆ, ਜਿਵੇਂ ਤੁਸੀਂ ਜਾਣਦੇ ਹੋ। ⁵ਸੋ ਹੋਰ ਉਡੀਕ ਨਾ ਕਰ ਸਕਣ ਕਰਕੇ, ਮੈਂ ਭੇਜਿਆ ਤਾਂ ਜੋ ਮੈਂ ਤੁਹਾਡੀ ਨਿਹਚਾ ਬਾਰੇ ਪਤਾ ਕਰਾਂ—ਇਸ ਡਰ ਤੋਂ ਕਿ ਕਿਤੇ ਪਰਤਾਉਣ ਵਾਲੇ ਨੇ ਤੁਹਾਨੂੰ ਪਰਤਾ ਨਾ ਲਿਆ ਹੋਵੇ ਅਤੇ ਸਾਡੀ ਮਿਹਨਤ ਵਿਅਰਥ ਨਾ ਗਈ ਹੋਵੇ।

⁶ਪਰ ਹੁਣੇ ਹੀ ਤਿਮੋਥਿਉਸ ਤੁਹਾਡੇ ਕੋਲੋਂ ਸਾਡੇ ਕੋਲ ਆਇਆ ਹੈ, ਅਤੇ ਤੁਹਾਡੀ ਨਿਹਚਾ ਅਤੇ ਪ੍ਰੇਮ ਦੀ ਖ਼ੁਸ਼ ਖ਼ਬਰੀ ਲਿਆਇਆ ਹੈ—ਕਿ ਤੁਸੀਂ ਸਦਾ ਸਾਨੂੰ ਪਿਆਰ ਨਾਲ ਚੇਤੇ ਕਰਦੇ ਹੋ, ਅਤੇ ਸਾਨੂੰ ਵੇਖਣ ਲਈ ਤਰਸਦੇ ਹੋ, ਜਿਵੇਂ ਅਸੀਂ ਤੁਹਾਨੂੰ ਵੇਖਣ ਲਈ ਤਰਸਦੇ ਹਾਂ। ⁷ਇਸ ਲਈ, ਹੇ ਭਰਾਵੋ ਅਤੇ ਭੈਣੋ, ਸਾਡੀ ਸਾਰੀ ਔਖ ਅਤੇ ਬਿਪਤਾ ਵਿੱਚ, ਤੁਹਾਡੀ ਨਿਹਚਾ ਨੇ ਸਾਨੂੰ ਤਸੱਲੀ ਦਿੱਤੀ, ⁸ਕਿਉਂਕਿ ਹੁਣ ਅਸੀਂ ਜੀਉਂਦੇ ਹਾਂ, ਜੇ ਤੁਸੀਂ ਪ੍ਰਭੂ ਵਿੱਚ ਦ੍ਰਿੜ੍ਹ ਖੜ੍ਹੇ ਹੋ। ⁹ਅਸੀਂ ਤੁਹਾਡੇ ਕਾਰਨ ਸਾਡੇ ਪਿਤਾ ਦਾ ਕੀ ਧੰਨਵਾਦ ਮੋੜ ਸਕਦੇ ਹਾਂ, ਉਸ ਸਾਰੇ ਅਨੰਦ ਦੇ ਬਦਲੇ ਜਿਸ ਨਾਲ ਅਸੀਂ ਤੁਹਾਡੇ ਕਾਰਨ ਸਾਡੇ ਪਿਤਾ ਦੇ ਸਾਹਮਣੇ ਅਨੰਦ ਕਰਦੇ ਹਾਂ? ¹⁰ਰਾਤ ਦਿਨ ਅਸੀਂ ਬੜੇ ਦਿਲ ਲਾ ਕੇ ਪ੍ਰਾਰਥਨਾ ਕਰਦੇ ਹਾਂ ਕਿ ਅਸੀਂ ਤੁਹਾਨੂੰ ਆਹਮੋ-ਸਾਹਮਣੇ ਵੇਖੀਏ ਅਤੇ ਤੁਹਾਡੀ ਨਿਹਚਾ ਦੀ ਜੋ ਕਮੀ ਹੈ ਉਸ ਨੂੰ ਪੂਰਾ ਕਰੀਏ।

¹¹ਹੁਣ ਸਾਡਾ ਪਿਤਾ ਆਪ, ਅਤੇ ਸਾਡਾ ਪ੍ਰਭੂ ਯਿਸੂ, ਤੁਹਾਡੇ ਵੱਲ ਸਾਡਾ ਰਾਹ ਸਿੱਧਾ ਕਰੇ। ¹²ਪ੍ਰਭੂ ਤੁਹਾਨੂੰ ਵਧਾਵੇ ਅਤੇ ਇੱਕ ਦੂਜੇ ਲਈ ਅਤੇ ਸਭਨਾਂ ਲਈ ਪ੍ਰੇਮ ਵਿੱਚ ਵਧਾ ਕੇ ਭਰਪੂਰ ਕਰੇ, ਜਿਵੇਂ ਅਸੀਂ ਤੁਹਾਡੇ ਲਈ ਕਰਦੇ ਹਾਂ, ¹³ਤਾਂ ਜੋ ਉਹ ਤੁਹਾਡੇ ਦਿਲਾਂ ਨੂੰ ਤਕੜਾ ਕਰੇ, ਅਤੇ ਸਾਡੇ ਪਿਤਾ ਦੇ ਸਾਹਮਣੇ ਪਵਿੱਤਰਤਾ ਵਿੱਚ ਨਿਰਦੋਸ਼ ਬਣਾਵੇ, ਜਦੋਂ ਸਾਡਾ ਪ੍ਰਭੂ ਯਿਸੂ ਆਪਣੇ ਸਾਰੇ ਪਵਿੱਤਰ ਜਨਾਂ ਨਾਲ ਆਵੇਗਾ। ^a a v13 ‘ਉਹ ਦੇ ਪਵਿੱਤਰ ਜਨ’ ਦਾ ਭਾਵ ਦੂਤਾਂ ਤੋਂ, ਜਾਂ ਉਨ੍ਹਾਂ ਵਿਸ਼ਵਾਸੀਆਂ ਤੋਂ ਜੋ ਪਹਿਲਾਂ ਹੀ ਮਰ ਚੁੱਕੇ ਹਨ, ਜਾਂ ਦੋਹਾਂ ਤੋਂ ਹੋ ਸਕਦਾ ਹੈ।