Mbundu ya Tata muna kisalu

Pholu wásamuna buna kádyatidikini mu kati dya bawu ku thwala ya Tata wetu, konda mazasa, konda kufyeka lukusu, amana konda kutala mbunzu za batu. Wádifwanikisa theti yi ngudi wuna wisi yemika bana bandi, amana kunima yi tata wuna kenina yi bana bandi, amana wubabambukisi ni yandi wásadika phipha hanga kazitisaku mutu mosi.

Kapitulu 2.

Mukuma benu-meni luzayi, baphangi, ni kwisa kwetu kwena benu kukalaku mu phamba. Kaasi, keti twátekila nyokuka amana twátukwanu ku Fidiphu, bwosu luzayi, twábonga kikesa mwena Tata wetu mu kusamuna Musamu wa Bukheti wandi kwena benu, mbatanana kutendana kwa ngolu. Mukuma, mana tubati luheka kikesa, matukiku mu kuhakuka keti mu mambu ma mvindu, amana tusandiku mu kuhukumuna mutu mosi. Kaasi, bwosu Tata wetu wátutya mu kutuyekika Musamu wa Bukheti, bwabuna tubati zonza—ka mu kumonisa batu kyesi ku, kaasi Tata wetu, wuna wisi meka mbundu zetu. Betu twázonzaku ni ndinga za lengu, bwosu luzayi, keti bwabu kifidingilu kya lukusu—Tata wetu kenina kimbangi. Twasandiku lukumu kwena batu—ka kwena benu ku, ka kwena bakwawu ku—keti, bwosu twenina bathumwa ba Kidisitu, wadi twalenda kuyekamina kwena benu ni kizitu kyetu. Kaasi twákala batu ba buweti ha kati dya benu, bwosu ngudi wuna wisi yemika kakinda bana ba yandi meni yi lungongu. Bwabuna, bwosu twálutonda ni mbundu yetu yosu, twásangwala mu kuluheka ka kaka Musamu wa Bukheti wa Tata wetu ku, kaasi yi kimutu kyetu-meni, mukuma lwákituka batondama lawu kwena betu. Mukuma lusungula, baphangi, lombu yetu yi kulembwa kwetu: twásadika phipha yi mwini, hanga tuyekaminaku kwena mosi wa benu, bwosu tubati samuna Musamu wa Bukheti wa Tata wetu kwena benu. Benu yi Tata wetu lwenina bimbangi bwosu twazínga mu kasemi, mu masonga yi mu kukonda kifu kwena benu bakwikidi. Bwosu luzayi, twáhanga kosu mutu wa benu bwosu tata yi bana bandi—mu kuluheka kikesa, mu kuluhomba, amana mu kulubokwadila, hanga luzinga luzingu luna lufwani kwena Tata wetu, wuna wisi lutela mu Kipfumu kyandi-meni yi khembu yandi.

Betu phi tubati vutula matondu kwena Tata wetu kosu tangwa kikuma kya mana: tangwa lwátambula Ndinga ya Tata wetu yina lwáyuka kwena betu, lwátambwasa ka bwosu ndinga ya kimutu ku, kaasi bwosu buna yenina kyedika—Ndinga yandi, yina yisi sala mwena benu bakwikidi. Baphangi, lwásokulula Mabundu ma Tata wetu mana menina mwena Kidisitu Yesu ku Yuteya, mukuma lwanyókuka mana mamosi kwena batu ba kanda dyenu bwosu bawu phi banyókuka kwena Bayuta, bawu bana báhonda Pfumu Yesu yi bambikudi, bátukudi betu, Tata wetu kisi bamonina kyesi ku, amana bisi tendana yi batu boosu, mu kutukandikisa mu kuzonza kwena baphani hanga bawu bahuluka, bisi lungisa kosu tangwa kitesu kya masumu ma bawu. Buthwena khabu yibabwidi ku tsuka.

Thondi ya kulumona hika

Baphangi, bwosu twáyatuka kwena benu mu ndambu ya tangwa—mu nitu, ka mu mbundu ku—twálutila mu kudiheka mu kumona busu bwenu, yi thondi yi lawu. Twázola kwisa kwena benu—meni Pholu, mbala yi mbala—kaasi Satana wátukandika. Mukuma, kiki kyenina kivuvu kyetu, kyesi kyetu, keti mukhonzi wa kudizatula ku thwala ya Pfumu wetu Yesu muna kwisa kwandi? Keti ka benu ku? Eeh, khembu yetu yi kyesi kyetu, benu-meni lwenina byawu!