Inetkei si Isube Kamuktaindet
Ki itenchi Paulo agobo kaneetik che bagaakta kayaneet ak amitwogik alak, ye myee kii age tugul ne ki yai Kwandanyo ak kitaach eng' kongoi. Nyolu koineetkei Timoteo si kosub Kamuktaindet, mingosas chii age tugul agobo ming'inateennyi, koart ng'olyootap Kwandanyo eng' taitap piik, ak koriibei saboondanyi ak kaneetisyennyi komyee.
4 1Imwae Kabuuset ne Tiliil komyee kole, eng' peetuusyek che nyonei kobagaakta alak kayaneet, kogasei ng'aang'ik che iberberi ak kaneetisyetap oik, 2kobunji utaatyetap kiplembechonik, che kagoleel kabwaatennywa ko uu ne kagebeel eng' karnet ne lalat. 3Koetei tunet, ak koleenji piik koisto amitwogik alak che ki yai Kwandanyo si kitaach eng' kongoi eng' che iyani che ngen imanit. 4Amu myee kii age tugul ne ki yai Kwandanyo; ma kiy age tugul ne kieesye ngot kagotaach eng' kongoi, 5amu kitiliilitos eng' ng'olyootap Kwandanyo ak eng' saaet.
6Ineeti tuguuchu che kitupche, si iegu kiboityot ne myee ne po Kristo Jeso, ne chuchuni eng' ng'aleegap kayaneet ak kaneetiset ne myee ne kisup. 7Mawech kii ak sigoosyek che leelen che ma po toroornatet. Ago ineetkei si isubi Kamuktaindet. 8Toreti netisyetap poorto tutigin, ago netisyetap subetap Kamuktaindet ko toreti eng' tuguuk tugul, amu koyomisei saboon ne po nguno ak saboon ne nyonei. 9Ng'olyoot ni ko ne iyani ne nyolu kitaach komugul. 10Amu niito ko kiboisyei ak kitestai, amu kiga kemang'u Kwandanyo ne sabei, Yetindetap piik tugul, miising' ko che iyani. 11Ing'at ak ineet tuguuchu.
12Mingosas chii age tugul agobo ming'inateng'ung', ago iegu kaboorunet eng' che iyani, eng' ng'alaalet, ak yaityet, ak chamyet, ak kayaneet, ak tiliilindo. 13Agoi anyoon, isubgei eng' sometap siruutyet eng' taitap piik, ak amdaet, ak kaneetiset. 14Mingometi konunet ne mi inyee, ne ki kigoonin eng' maotet, kingo iyoge poisyek eunekwak paragung'ung'. 15Iyae tuguuchu ak iganjigei komugul, si kogeer chii age tugul testosetong'ung'. 16Iriip saboondang'ung' ak kaneetisyetong'ung' komyee. Itinalee eng' tuguuchu, amu ngo iyai nooto, isaru inyee ak che kasei ng'aleeguk.