خدا ترسيءَ ۾ پاڻ کي تربيت ڏي
پولس انهن استادن کان خبردار ڪري ٿو جيڪي شادي ۽ ڪجهه کاڌن کان منع ڪن ٿا، جڏهن ته اسان جي پيءُ جو ٺاهيل سڀ ڪجهه سٺو آهي ۽ شڪر سان قبول ڪيو وڃي ٿو. تيمٿيس پاڻ کي دينداري لاءِ تيار ڪري، ڪنهن کي سندس جوانيءَ کي حقير سمجهڻ نه ڏئي، ڪلام عام پڙهي، ۽ پنهنجي زندگي ۽ تعليم تي ويجهي نظر رکي.
4 1پاڪ روح صاف چوي ٿو تہ پوئين زماني ۾ ڪي ماڻهو ايمان کي ڇڏي ڏيندا، ۽ گمراهہ ڪندڙ روحن ۽ ڀوتن جي تعليمن ڏانهن ڌيان ڏيندا، 2اهو انهن ڪوڙن جي ريائڪاريءَ جي ڪري ٿيندو، جن جا پنهنجا ضمير ڄڻ گرم لوهه سان داغيل آهن. 3اهي نڪاح ڪرڻ کان روڪين ٿا، ۽ انهن کاڌن کان پرهيز ڪرڻ جو مطالبو ڪن ٿا، جيڪي اسان جي پيءُ انهيءَ لاءِ ٺاهيا هئا تہ سچ کي ڄاڻندڙ ايماندار شڪرگذاريءَ سان قبول ڪن. 4ڇاڪاڻ تہ اسان جي پيءُ جيڪو ڪجھ ٺاهيو آهي سو سڀ سٺو آهي، ۽ جيڪڏهن شڪرگذاريءَ سان قبول ڪجي تہ ڪا بہ شيءِ رد ڪرڻ جهڙي ناهي، 5ڇاڪاڻ تہ اها اسان جي پيءُ جي ڪلام ۽ دعا جي وسيلي پاڪ ڪئي وڃي ٿي.
6جيڪڏهن تون اهي ڳالهيون ڀائرن ۽ ڀينرن کي سمجهائيندين تہ مسيح يسوع جو سٺو خادم ٿيندين، جنهن کي ايمان جي ڪلام ۽ انهيءَ سٺي تعليم سان پرورش ڏني وئي آهي جنهن جي تو پيروي ڪئي آهي. 7بي دين ۽ بيهودين ڏند ڪٿائن سان ڪو واسطو نہ رک. پر پاڻ کي خدا ترسيءَ لاءِ تربيت ڏي. 8جسماني تربيت ٿورو ڪم اچي ٿي، پر خدا لاءِ عقيدت هر طرح ڪم اچي ٿي— هاڻوڪي زندگيءَ ۽ ايندڙ زندگيءَ جو واعدو ڪندي. 9هي ڀروسي جوڳو ڪلام آهي، جيڪو پوريءَ طرح قبول ڪرڻ جي لائق آهي. 10ڇاڪاڻ تہ اسان انهيءَ لاءِ محنت ۽ جاکوڙ ڪريون ٿا، جو اسان جيئري پيءُ تي اميد رکي آهي، جيڪو سڀني ماڻهن، خاص ڪري ايمان وارن جو نجات ڏيندڙ آهي. 11اهي ڳالهيون حڪم ڏي ۽ سيکار.
12ڪو بہ تنهنجي جوانيءَ سبب تو کي حقير نہ سمجهي، پر ڳالهائڻ، هلت چلت، پيار، ايمان ۽ پاڪائيءَ ۾ ايمان وارن لاءِ نمونو بڻج. 13جيستائين آءٌ اچان، تيستائين پاڪ ڪتاب کي سڀني آڏو پڙهڻ، واعظ ڪرڻ ۽ تعليم ڏيڻ ۾ مشغول رهہ. 14انهيءَ ڏات کي نظرانداز نہ ڪر جيڪا تو ۾ آهي، جيڪا نبوت جي وسيلي، بزرگن جا هٿ تو تي رکڻ سان تو کي ڏني وئي. 15اهي ڳالهيون عمل ۾ آڻ ۽ پاڻ کي پوريءَ طرح انهن ۾ لڳائي ڇڏ، تہ جيئن سڀڪو تنهنجي ترقي ڏسي. 16پنهنجي پاڻ تي ۽ پنهنجي تعليم تي چڱيءَ طرح ڌيان رک. انهيءَ ۾ قائم رهہ، ڇاڪاڻ تہ ائين ڪرڻ سان تون پاڻ کي ۽ پنهنجن ٻڌندڙن کي بہ بچائيندين.
