1ይ ጢሞቴዎስ 4 FHB Father's Heart Bible™

4 ¹መንፈስ ቅዱስ ብግልፂ ከምዙይ ይብል ኣሎ፦ ኣብ ዳሕረዋይ ዘመን ገሊኣቶም ነቶም ኣስሓትቲ መናፍስትን ነቲ ትምህርቲ ኣጋንንትን ኣቓልቦ እናሃቡ፥ ነቲ እምነት ክሓድጉ እዮም፥ ²እዙይ ድማ ብግብዝና እቶም ገዛእ ሕሊናኦም ከም ብዝሞቐ ሓፂን ዝተሓረረ ሓሰውቲ እዩ። ³ንሳቶም መርዓ ይኽልክሉ፥ ካብቲ ኣቦና እቶም ንሓቂ ዝፈልጡ ኣመንቲ ብምስጋና ክቕበልዎ ዝፈጠሮ መግቢ ድማ ክቑጠቡ ይእዝዙ። ⁴ኣቦና ዝፈጠሮ ኵሉ ፅቡቕ እዩ እሞ፤ ብምስጋና ምስ ተቐበልካዮ ዝንዓቕ ሓደ እኳ የለን፥ ⁵ብቓል ኣቦናን ብፀሎትን ይቕደስ እዩ እሞ።

⁶ነዝ ነገራት እዙይ ነቶም ኣሕዋት ኣፍልጦም እሞ፥ በቲ ቓል እምነትን በቲ ዝሰዓብካዮ ፅቡቕ ትምህርትን እናተመገብካ፥ ፅቡቕ ኣገልጋሊ ክርስቶስ ኢየሱስ ክትከውን ኢኻ። ⁷ካብቲ ርኹስን ዕሽነትን ጽውጽዋይ ርሓቕ። ኣብ ክንድኡ ደኣ፥ ኣምላኻዊ ክትከውን ንርእስኻ ኣላምድ። ⁸ናይ ስጋ ልምምድ ቁሩብ ይጠቅም እዩ፤ ኣምልኾ እግዚኣብሄር ግና ነዛ ሕዚ ዘላ ህይወትን ነታ እትመፅእ ህይወትን ተስፋ ስለ ዝህብ፥ ኣብ ኵሉ ይጠቅም እዩ። ⁹እዝ ቃል እዙይ እሙን እዩ፥ ምሉእ ተቐባልነት ድማ ይግብኦ። ¹⁰ነዙይ ኢና እንፅዕርን እንጋደልን፤ ተስፋና ኣብቲ መድሕን ኵሉ ሰብ፥ ኣውራ ኸዓ መድሕን እቶም ኣመንቲ ዝኾነ ህያው ኣቦ ጌርና ኣለና እሞ። ¹¹ነዝ ነገራት እዙይ ኣዝዝን ምሃርን።

¹²ብሰሪ ንእስነትካ ዋላ ሓደ ሰብ ኣይንዓቕካ፤ ነቶም ኣመንቲ ግና ብዘረባ፥ ብኣካይዳ፥ ብፍቕሪ፥ ብእምነት፥ ብንፅህና ኣርኣያ ኩኖም። ¹³ክሳዕ ዝመፅእ፥ ኣብ ቅድሚ ህዝቢ ንምንባብ መፅሓፍ ቅዱስ፥ ንስብከትን ንትምህርትን ፀኒዕካሉ ንበር። ¹⁴ነቲ ብትንቢት፥ ዓበይቲ ኢዶም ኣብ ልዕሌኻ ምስ ኣንበሩ ዝተውሃበ፥ ኣባኻ ዘሎ ውህብቶ ሸለል ኣይትበሎ። ¹⁵ነዝ ነገራት እዙይ ለማመዶ፥ ምሉእ ብምሉእ ድማ ኣብኡ ፀናዕ፥ ምዕባሌኻ ንዅሉ ሰብ ምእንቲ ክርአዮ። ¹⁶ንርእስኻን ንትምህርትኻን ኣፀቢቕካ ሓሉ። በዙይ ፀኒዕካ ንበር፤ እዙይ ምግባር ንርእስኻን ነቶም ሰማዕትኻን ከድሕን እዩ እሞ።