Pfundzisa Ekha Toera Kulemedza Mulungu

Paulu acenjeza pya apfunzisi analetsa kumanga banja na pyakudya pinango, pomwe pinthu pyonsene pidacita Baba wathu mpyadidi na pisatambirwa na kutenda. Timoti asafunika kudzipfunzisa kulemekeza Mulungu, aleke munthu kunyoza unyamata wace, aleri Malemba pamaso pa anthu, na ayang'anire mwadidi moyo wace na mapfunziro ace.

Kapitulu 4.

Nzimu Wakucena usalonga pakweca kuti: mu ntsiku zakumalisa anthu anango anadzasiya cikhulupiro, mbabvesera nzimu zakunyengeza na mapfundzisiro a madimonyo, kubulukira mu upfakafaka wa anyauthambi, akuti cikumbuntima cawo capiswa ninga na utale wakupya. Iwo asakhondesa kumanga banja, mbatonga kuti anthu akhonde kudya cakudya cidacita Baba wathu toera kutambirwa na takhuta na anyakukhulupira ale asadziwa undimo mwene. Thangwi pinthu pyonsene pidacita Baba wathu ndi pyadidi; nkhabe cinthu cakuti cisafunika kurambwa cingatambirwa na takhuta, thangwi pisacenesewa na fala ya Baba wathu na na maphembero.

Ungapangiza abale pinthu penepi, unadzakhala ntumiki wadidi wa Kirixtu Yezu, wakudyesewa na mafala a cikhulupiro na mapfundzisiro adidi adatowera iwe. Khonda kudzudzumika na misangani yakukhonda kulemedza Mulungu, yakusowa nzeru. Mbwenye pfundzisa ekha toera kulemedza Mulungu. Kupfundzisa manungo kusaphedza pang'ono, mbwenye kulemedza Mulungu kusaphedza munjira zonsene, mbupikira umaso wa cincino na umaso unakudza. Fala ineyi ndi yakukhulupirika, yakuthema kutambirwa mwakukwana. Thangwi pya penepi tisaphata basa mbatiwangisira, thangwi tanyindira Baba wa maso, Mpulumusi wa anthu onsene, makamaka anyakukhulupira. Tonga mbupfundzisa pinthu penepi.

Munthu m'bodzi akupeule tayu thangwi uli m'phale, mbwenye khala citsandzo kuna anyakukhulupira mu kulonga, mu macitiro, mu kufuna, mu cikhulupiro, na mu kucena. Mpaka ndinadza Ine, perekeka ku kuleri Malemba pamaso pa anthu, ku kumwaza mphangwa, na ku kupfundzisa. Leka kunyalanyaza muoni uli muna iwe, udapaswa kubulukira mu uprofeta, mudaikhwa manja a akulu a gereja padzulu pako. Cita pinthu penepi, mbuperekeka kuna ipyo mwakukwana, toera anthu onsene aone kuthambaruka kwako. Onesesa iwe ekha na mapfundzisiro ako mwadidi. Pitiriza mu pyenepi, thangwi ungacita tenepo unadzapulumusa iwe ekha pabodzi na ale anakubvesera.