Wĩrutage Gũtuĩka Mwĩtĩĩri wa Ngai

Paulo nĩarathĩrĩra arutani arĩa makaanagia kũhikania na irio imwe, no kĩrĩa gĩothe Ithe witũ ombire nĩ kĩega na kĩamũkagĩrwo na ngaatho. Timotheo arĩ wa kwĩruta ũũrĩku wa Ngai, ndakareke mũndũ o na ũmwe anyarare ũnini wake, athomage Maandĩko mbere ya andũ, na amenyerere muoyo wake na ũrutani wake.

Gĩcunjĩ 4.

Roho Mũtheru oigaga wega atĩrĩ: matukũinĩ ma thuutha, andũ amwe nĩmagaatiganĩria wĩtĩkio, magĩrũmagĩrĩra maroho ma kũheenania na morutani ma ndaimono, nĩ ũndũ wa ũhinga wa aheenania arĩa thamiri ciao mwene ciahĩĩte ta icinĩtwo na kĩgera kĩrĩ mwaki. Nĩmagiragia kũhikania, na makaatha andũ metheeme irio iria Ithe witũ oombire nĩguo ciamũkĩrwo na gũcookia ngaatho nĩ etĩkia arĩa mooĩ ũhoro wa ma. Amu kĩndũ gĩothe kĩrĩa Ithe witũ oombire nĩ kĩega; na gũtirĩ kĩndũ kĩagĩrĩirwo nĩ kũregwo kĩngĩamũkĩrwo na gũcookia ngaatho, amu gĩtheragio nĩ kiugo kĩa Ithe witũ na nĩ ihooya.

Ũngĩĩra ariũ na aarĩ a Ithe witũ maũndũ maya, nĩũgaatuĩka ndungata njega ya Kristũ Jesũ, ũhũũnĩtio nĩ ciugo cia wĩtĩkio na ũrutani ũrĩa mwega ũrĩa ũrũmĩrĩire. Tiga biũ ng'ano cia ũrimũ iria itatĩĩte Ngai. Handũ ha ũguo, wĩrutage gũtuĩka mwĩtĩĩri wa Ngai. Kwĩruta na mwĩrĩ gũteithagia o hanini, no kwĩyamũrĩra Ngai gũteithagia maũndũinĩ mothe—tondũ nĩ kwĩranĩire muoyo wa rĩu na muoyo ũrĩa ũgooka. Ũyũ nĩ mũario wa kwĩhokeka na wa kwĩtĩkĩrwo biũ. Nĩ ũndũ ũcio nĩtũrutaga wĩra na tũkenyenya, tondũ nĩtwĩhokete Ithe witũ ũrĩa ũrĩ muoyo, Mũhonokia wa andũ othe, na makĩria etĩkia. Athaga na ũrutanage maũndũ maya.

Gũtikagĩe mũndũ ũngĩkũnyarara nĩ ũndũ wĩ mwĩthĩ, no tuĩka kĩonereria kũrĩ etĩkia thĩinĩ wa mĩario, na mĩtugo, na wendo, na wĩtĩkio, na ũtheru. Nginya rĩrĩa ngooka, wĩheane kũthoma Maandĩko mbere ya andũ, na kũhunjia, na kũrutana. Ndũkariganĩrwo nĩ kĩheeo kĩrĩa kĩrĩ thĩinĩ waku, kĩrĩa waaheirwo na ũndũ wa ũrathi, rĩrĩa athuuri maakũigĩrĩire mooko. Ĩkaga maũndũ maya, na wĩheane kũrĩ mo biũ, nĩ geetha andũ othe moone ũrĩa ũrathiĩ na mbere. Wĩmenyagĩrĩre wee mwene na ũrutani waku wega. Tũũraga ũrĩ maũndũinĩ macio, amu wĩkaga ũguo nĩũkũhonokia wee mwene o na arĩa magũthikĩrĩria.