1 ਤਿਮੋਥਿਉਸ 5

5 ¹ਕਿਸੇ ਵੱਡੀ ਉਮਰ ਦੇ ਆਦਮੀ ਨੂੰ ਕਠੋਰਤਾ ਨਾਲ ਨਾ ਝਿੜਕ, ਸਗੋਂ ਉਹ ਨੂੰ ਪਿਤਾ ਵਾਂਗ ਸਮਝਾ, ਅਤੇ ਜਵਾਨ ਆਦਮੀਆਂ ਨੂੰ ਭਰਾਵਾਂ ਵਾਂਗ, ²ਵੱਡੀ ਉਮਰ ਦੀਆਂ ਔਰਤਾਂ ਨੂੰ ਮਾਵਾਂ ਵਾਂਗ, ਅਤੇ ਜਵਾਨ ਔਰਤਾਂ ਨੂੰ ਭੈਣਾਂ ਵਾਂਗ, ਪੂਰੀ ਪਵਿੱਤਰਤਾ ਨਾਲ।

³ਉਨ੍ਹਾਂ ਵਿਧਵਾਵਾਂ ਦਾ ਆਦਰ ਕਰ ਜੋ ਸੱਚੀਓਂ ਵਿਧਵਾਵਾਂ ਹਨ। ⁴ਪਰ ਜੇ ਕਿਸੇ ਵਿਧਵਾ ਦੇ ਬੱਚੇ ਜਾਂ ਪੋਤੇ-ਪੋਤੀਆਂ ਹੋਣ, ਤਾਂ ਉਹ ਪਹਿਲਾਂ ਆਪਣੇ ਹੀ ਘਰ ਵਿੱਚ ਭਗਤੀ ਵਿਖਾਉਣੀ ਸਿੱਖਣ, ਅਤੇ ਆਪਣੇ ਮਾਪਿਆਂ ਦਾ ਹੱਕ ਅਦਾ ਕਰਨ—ਇਹੋ ਸਾਡੇ ਪਿਤਾ ਨੂੰ ਭਾਉਂਦਾ ਹੈ। ⁵ਸੱਚੀ ਵਿਧਵਾ, ਜੋ ਇਕੱਲੀ ਰਹਿ ਗਈ ਹੈ, ਆਪਣੀ ਆਸ ਸਾਡੇ ਪਿਤਾ ਉੱਤੇ ਰੱਖਦੀ ਹੈ, ਅਤੇ ਰਾਤ-ਦਿਨ ਬੇਨਤੀਆਂ ਤੇ ਪ੍ਰਾਰਥਨਾਵਾਂ ਵਿੱਚ ਲੱਗੀ ਰਹਿੰਦੀ ਹੈ। ⁶ਪਰ ਜੋ ਵਿਧਵਾ ਭੋਗ-ਬਿਲਾਸ ਵਿੱਚ ਜੀਊਂਦੀ ਹੈ, ਉਹ ਜੀਊਂਦੀ ਹੋਈ ਵੀ ਮੋਈ ਹੋਈ ਹੈ। ⁷ਇਹ ਹੁਕਮ ਵੀ ਦੇ, ਤਾਂ ਜੋ ਉਹ ਨਿੰਦਿਆ ਤੋਂ ਪਰੇ ਹੋਣ। ⁸ਜੇ ਕੋਈ ਆਪਣਿਆਂ ਦੀ, ਖ਼ਾਸ ਕਰਕੇ ਆਪਣੇ ਘਰ ਦਿਆਂ ਦੀ, ਸੰਭਾਲ ਨਹੀਂ ਕਰਦਾ, ਤਾਂ ਉਸ ਨੇ ਵਿਸ਼ਵਾਸ ਦਾ ਇਨਕਾਰ ਕਰ ਦਿੱਤਾ ਹੈ ਅਤੇ ਉਹ ਅਵਿਸ਼ਵਾਸੀ ਨਾਲੋਂ ਵੀ ਭੈੜਾ ਹੈ।

⁹ਕਿਸੇ ਵਿਧਵਾ ਦਾ ਨਾਮ ਸੂਚੀ ਵਿੱਚ ਤਦ ਹੀ ਲਿਖ ਜਦੋਂ ਉਹ ਘੱਟੋ-ਘੱਟ ਸੱਠ ਸਾਲ ਦੀ ਹੋਵੇ ਅਤੇ ਇੱਕੋ ਪਤੀ ਦੀ ਵਫ਼ਾਦਾਰ ਰਹੀ ਹੋਵੇ, ¹⁰ਅਤੇ ਭਲੇ ਕੰਮਾਂ ਲਈ ਜਾਣੀ ਜਾਂਦੀ ਹੋਵੇ: ਜੇ ਉਸ ਨੇ ਬੱਚੇ ਪਾਲੇ ਹੋਣ, ਪਰਦੇਸੀਆਂ ਦੀ ਪਰਾਹੁਣਚਾਰੀ ਕੀਤੀ ਹੋਵੇ, ਸੰਤਾਂ ਦੇ ਪੈਰ ਧੋਤੇ ਹੋਣ, ਦੁਖੀਆਂ ਦੀ ਮਦਦ ਕੀਤੀ ਹੋਵੇ, ਅਤੇ ਹਰ ਭਲੇ ਕੰਮ ਵਿੱਚ ਲੱਗੀ ਰਹੀ ਹੋਵੇ।

¹¹ਪਰ ਜਵਾਨ ਵਿਧਵਾਵਾਂ ਦਾ ਨਾਮ ਸੂਚੀ ਵਿੱਚ ਲਿਖਣ ਤੋਂ ਇਨਕਾਰ ਕਰ; ਜਦੋਂ ਉਨ੍ਹਾਂ ਦੀਆਂ ਇੱਛਾਵਾਂ ਉਨ੍ਹਾਂ ਨੂੰ ਮਸੀਹ ਤੋਂ ਦੂਰ ਖਿੱਚਦੀਆਂ ਹਨ, ਤਾਂ ਉਹ ਵਿਆਹ ਕਰਾਉਣਾ ਚਾਹੁੰਦੀਆਂ ਹਨ, ¹²ਅਤੇ ਇਸ ਤਰ੍ਹਾਂ ਉਹ ਆਪਣੇ ਪਹਿਲੇ ਪ੍ਰਣ ਨੂੰ ਛੱਡ ਦੇਣ ਕਰਕੇ ਆਪਣੇ ਉੱਤੇ ਸਜ਼ਾ ਲਿਆਉਂਦੀਆਂ ਹਨ। ^a a v12 "ਉਨ੍ਹਾਂ ਦਾ ਪਹਿਲਾ ਪ੍ਰਣ" ਉਸ ਵਚਨ ਵੱਲ ਇਸ਼ਾਰਾ ਕਰਦਾ ਹੈ ਜੋ ਉਨ੍ਹਾਂ ਨੇ ਵਿਧਵਾਵਾਂ ਦੀ ਸੂਚੀ ਵਿੱਚ ਨਾਮ ਲਿਖਾਉਣ ਵੇਲੇ ਮਸੀਹ ਅਤੇ ਕਲੀਸਿਯਾ ਦੀ ਸੇਵਾ ਕਰਨ ਲਈ ਦਿੱਤਾ ਸੀ। ¹³ਇਸ ਦੇ ਨਾਲ ਹੀ ਉਹ ਵਿਹਲੀਆਂ ਰਹਿਣਾ ਸਿੱਖ ਲੈਂਦੀਆਂ ਹਨ, ਘਰ-ਘਰ ਫਿਰਦੀਆਂ ਹਨ—ਕੇਵਲ ਵਿਹਲੀਆਂ ਹੀ ਨਹੀਂ, ਸਗੋਂ ਚੁਗਲਖੋਰ ਅਤੇ ਦੂਜਿਆਂ ਦੇ ਕੰਮਾਂ ਵਿੱਚ ਦਖ਼ਲ ਦੇਣ ਵਾਲੀਆਂ ਬਣ ਜਾਂਦੀਆਂ ਹਨ, ਅਤੇ ਉਹ ਗੱਲਾਂ ਕਰਦੀਆਂ ਹਨ ਜੋ ਉਨ੍ਹਾਂ ਨੂੰ ਨਹੀਂ ਕਰਨੀਆਂ ਚਾਹੀਦੀਆਂ। ¹⁴ਇਸ ਲਈ ਮੈਂ ਚਾਹੁੰਦਾ ਹਾਂ ਕਿ ਜਵਾਨ ਵਿਧਵਾਵਾਂ ਵਿਆਹ ਕਰਾਉਣ, ਬੱਚੇ ਜੰਮਣ, ਘਰ ਸੰਭਾਲਣ, ਅਤੇ ਵਿਰੋਧੀ ਨੂੰ ਨਿੰਦਿਆ ਕਰਨ ਦਾ ਕੋਈ ਮੌਕਾ ਨਾ ਦੇਣ। ¹⁵ਕਿਉਂਕਿ ਕਈ ਤਾਂ ਪਹਿਲਾਂ ਹੀ ਭਟਕ ਕੇ ਸ਼ੈਤਾਨ ਦੇ ਪਿੱਛੇ ਲੱਗ ਗਈਆਂ ਹਨ। ¹⁶ਜੇ ਕਿਸੇ ਵਿਸ਼ਵਾਸੀ ਔਰਤ ਦੇ ਰਿਸ਼ਤੇਦਾਰਾਂ ਵਿੱਚ ਵਿਧਵਾਵਾਂ ਹੋਣ, ਤਾਂ ਉਹ ਉਨ੍ਹਾਂ ਦੀ ਸੰਭਾਲ ਕਰੇ, ਅਤੇ ਕਲੀਸਿਯਾ ਉੱਤੇ ਬੋਝ ਨਾ ਪਾਵੇ, ਤਾਂ ਜੋ ਕਲੀਸਿਯਾ ਸੱਚੀਆਂ ਵਿਧਵਾਵਾਂ ਦੀ ਸੰਭਾਲ ਕਰ ਸਕੇ।

¹⁷ਜਿਹੜੇ ਬਜ਼ੁਰਗ ਚੰਗੀ ਤਰ੍ਹਾਂ ਅਗਵਾਈ ਕਰਦੇ ਹਨ, ਉਹ ਦੂਣੇ ਆਦਰ ਦੇ ਹੱਕਦਾਰ ਹਨ, ਖ਼ਾਸ ਕਰਕੇ ਉਹ ਜੋ ਪ੍ਰਚਾਰ ਅਤੇ ਸਿੱਖਿਆ ਦੇਣ ਵਿੱਚ ਸਖ਼ਤ ਮਿਹਨਤ ਕਰਦੇ ਹਨ। ¹⁸ਕਿਉਂਕਿ ਪਵਿੱਤਰ ਸ਼ਾਸਤਰ ਆਖਦਾ ਹੈ: "ਗਾਹ ਪਾਉਂਦੇ ਬਲਦ ਦੇ ਮੂੰਹ ਨੂੰ ਛਿੱਕਲੀ ਨਾ ਪਾ," ਅਤੇ "ਮਜ਼ਦੂਰ ਆਪਣੀ ਮਜ਼ਦੂਰੀ ਦਾ ਹੱਕਦਾਰ ਹੈ।"

¹⁹ਕਿਸੇ ਬਜ਼ੁਰਗ ਦੇ ਵਿਰੁੱਧ ਕੋਈ ਦੋਸ਼ ਦੋ ਜਾਂ ਤਿੰਨ ਗਵਾਹਾਂ ਦੀ ਗਵਾਹੀ ਤੋਂ ਬਿਨਾਂ ਨਾ ਸੁਣ। ²⁰ਜਿਹੜੇ ਪਾਪ ਕਰਨ ਵਿੱਚ ਲੱਗੇ ਰਹਿੰਦੇ ਹਨ, ਉਨ੍ਹਾਂ ਨੂੰ ਸਭਨਾਂ ਦੇ ਸਾਹਮਣੇ ਝਿੜਕ, ਤਾਂ ਜੋ ਬਾਕੀ ਲੋਕ ਵੀ ਡਰਨ।

²¹ਮੈਂ ਸਾਡੇ ਪਿਤਾ, ਮਸੀਹ ਯਿਸੂ, ਅਤੇ ਚੁਣੇ ਹੋਏ ਦੂਤਾਂ ਦੇ ਸਾਹਮਣੇ ਤੈਨੂੰ ਸਖ਼ਤ ਹੁਕਮ ਦਿੰਦਾ ਹਾਂ: ਇਹ ਹਿਦਾਇਤਾਂ ਬਿਨਾਂ ਪੱਖਪਾਤ ਦੇ ਮੰਨ, ਅਤੇ ਕੁਝ ਵੀ ਤਰਫ਼ਦਾਰੀ ਨਾਲ ਨਾ ਕਰ। ²²ਕਿਸੇ ਉੱਤੇ ਛੇਤੀ ਹੱਥ ਨਾ ਰੱਖ, ਅਤੇ ਦੂਜਿਆਂ ਦੇ ਪਾਪਾਂ ਵਿੱਚ ਹਿੱਸੇਦਾਰ ਨਾ ਬਣ—ਆਪਣੇ ਆਪ ਨੂੰ ਪਵਿੱਤਰ ਰੱਖ।

²³ਹੁਣ ਤੋਂ ਕੇਵਲ ਪਾਣੀ ਹੀ ਨਾ ਪੀ—ਸਗੋਂ ਆਪਣੇ ਪੇਟ ਅਤੇ ਵਾਰ-ਵਾਰ ਦੀਆਂ ਬਿਮਾਰੀਆਂ ਦੇ ਕਾਰਨ ਥੋੜ੍ਹੀ ਜਿਹੀ ਮਧ ਵੀ ਵਰਤ।

²⁴ਕਈ ਲੋਕਾਂ ਦੇ ਪਾਪ ਪਰਗਟ ਹੁੰਦੇ ਹਨ, ਅਤੇ ਨਿਆਂ ਲਈ ਅੱਗੇ-ਅੱਗੇ ਚੱਲਦੇ ਹਨ; ਪਰ ਹੋਰਨਾਂ ਦੇ ਪਾਪ ਪਿੱਛੋਂ ਆਉਂਦੇ ਹਨ। ²⁵ਇਸੇ ਤਰ੍ਹਾਂ, ਭਲੇ ਕੰਮ ਵੀ ਪਰਗਟ ਹੁੰਦੇ ਹਨ, ਅਤੇ ਜਿਹੜੇ ਪਰਗਟ ਨਹੀਂ ਵੀ, ਉਹ ਲੁਕੇ ਨਹੀਂ ਰਹਿ ਸਕਦੇ।