Kalomni vaʼz qil

Pavlusning Otamiz oldida bergan so'nggi topshirig'i: vaqtli-vaqtsiz kalomni va'z qil. Chunki odamlar o'zlari eshitishni xohlagan narsani aytadigan ustozlarni to'playdi. U o'z oxirini biladi: u qurbonlik kabi to'kilmoqda, poygasini tugatgan. U kim uni tashlab ketganini, kim qolganini va kim uning yonida turganini aytib o'tadi.

4-bob.

Tiriklar bilan oʻliklarni hukm qiladigan Otamiz va Masih Iso huzurida, Uning zuhur etishi va Shohligi haqqi, senga jiddiy ravishda amr qilaman: Kalomni vaʼz qil; qulay paytda ham, noqulay paytda ham tayyor tur; toʻla sabr va taʼlim bilan toʻgʻrila, tanbeh ber va ruhlantir. Chunki shunday zamon keladiki, odamlar sogʻlom taʼlimotga toqat qilmaydilar, balki quloqlari qichigani uchun oʻz havaslariga mos keladigan muallimlarni toʻplab oladilar, quloqlarini haqiqatdan burib, afsonalar tomon ogʻib ketadilar. Lekin sen hamma narsada hushyor boʻl, mashaqqatlarga chida, xushxabarchining ishini qil, xizmatingni toʻla ado et. Chunki men allaqachon sharob nazri kabi toʻkilmoqdaman; bu dunyodan ketar vaqtim keldi. ^a Men yaxshi kurashni kurashdim, poygani tugatdim, imonni saqladim. Endi meni solihlik toji kutmoqda, uni adolatli hakam boʻlgan Rabbimiz oʻsha kuni menga beradi — faqat mengagina emas, balki Uning zuhur etishini sevib kutgan barchaga beradi.

Pavlusning soʻnggi vasiyatlari

Tezroq oldimga kelishga astoydil harakat qil. Dimas bu hozirgi dunyoni sevib, meni tashlab, Salonikaga ketdi. Kriskent Galatiyaga, Titus Dalmatiyaga ketdi. Yonimda faqat Luqo bor. Markni olib, oʻzing bilan birga olib kel — u xizmatda menga foydali. Tixikni esa Efesga joʻnatdim. Kelganingda, Troasda Karp oldida qoldirgan chakmonimni, kitoblarni, ayniqsa charm varaqlarni olib kel. Misgar Iskandar menga koʻp yomonlik qildi; Rabbimiz uning qilmishlariga yarasha javobini qaytaradi. Sen ham undan ehtiyot boʻl, chunki u bizning xabarimizga qattiq qarshi chiqdi.

Birinchi himoyamda hech kim yonimda turmadi — hamma meni tashlab ketdi. Bu ularning hisobiga yozilmasin. Lekin Rabbimiz yonimda turib, menga quvvat berdi, toki men orqali xabar toʻliq eʼlon qilinsin va barcha xalqlar uni eshitsin. Men sherning ogʻzidan qutqarildim. Rabbimiz meni har qanday yovuz ishdan qutqaradi va osmondagi Shohligiga eson-omon olib boradi. Unga abadulabad shon-sharaf boʻlsin. Omin.

Soʻnggi salomlar

Priska bilan Akvilaga va Onisiforning uy aʼzolariga salom ayt. Erast Korinfda qoldi, Trofimni esa kasal boʻlgani uchun Miletda qoldirdim. Qishdan oldin kelishga astoydil harakat qil. Evbul, Pudent, Lin, Klavdiya va barcha birodarlar senga salom yoʻllashmoqda.

Rabbimiz sening ruhing bilan boʻlsin. Inoyat hammangizga yor boʻlsin.