Ka yi Wa'azin Maganar

Umarnin Bulus na ƙarshe, a gaban Ubanmu: ka yi wa'azin maganar a lokacin da ya dace da wanda bai dace ba, domin mutane za su tara malaman da za su faɗa musu abin da suke so. Ya san ƙarshensa — an zubar da shi, an gama tseren — ya kuma ambaci waɗanda suka rabu da shi, waɗanda suka zauna, da waɗanda suka tsaya tare da shi.

Babi na 4.

Ina dokace ka da gaske a gaban Ubanmu da Almasihu Yesu, wanda zai shari'anta masu rai da matattu, ta wurin bayyanarsa da mulkinsa: Ka yi wa'azin maganar; ka kasance a shirye, ko lokaci ya yi ko bai yi ba; ka gyara, ka tsawata, ka kuma ƙarfafa, da cikakken haƙuri da koyarwa. Gama lokaci zai zo sa'ad da mutane ba za su jure sahihiyar koyarwa ba, sai dai su tara wa kansu malamai masu yawa bisa ga sha'awoyinsu, don kunnuwansu na son ji, su kuma kau da kunnuwansu daga gaskiya, su karkata ga tatsuniyoyi. Amma kai, ka kasance mai natsuwa cikin kome, ka jure wahala, ka yi aikin mai bishara, ka cika hidimarka. Gama an riga an zubar da ni kamar hadayar sha; lokacin rabuwata ya zo. ^a Na yi fama mai kyau, na gama tseren, na kiyaye bangaskiya. Yanzu rawanin adalci yana jirana, wanda Ubangiji, alƙalin adalci, zai ba ni a wannan rana—ba ni kaɗai ba, har ma da duk masu ƙaunar bayyanarsa.

Damuwar Bulus ta Ƙarshe

Ka yi iyakar ƙoƙarinka ka zo wurina ba da jimawa ba. Dimas ya ƙaunaci wannan duniya ta yanzu, ya yashe ni, ya tafi Tasalonika. Kariskis ya tafi Galatiya, Titus kuwa ya tafi Dalmatiya. Luka kaɗai yake tare da ni. Ka ɗauki Markus ka zo da shi—yana da amfani a gare ni ga hidima. Na aiki Tikikus zuwa Afisa. Sa'ad da za ka zo, ka kawo mini rigar da na bar wurin Karbus a Taruwasa, da littattafan nadi, musamman takardun fata. Iskandari maƙerin tagulla ya yi mini babbar ɓarna; Ubangiji zai saka masa bisa ga ayyukansa. Kai ma ka yi hankali da shi, gama ya yi ƙarfin hamayya da saƙonmu.

Ba wanda ya tsaya tare da ni a kāriyata ta farko—duk sun yashe ni. Kada a lissafta musu wannan laifi. Amma Ubangiji ya tsaya tare da ni ya ƙarfafa ni, domin ta wurina a yi cikakkiyar shelar saƙon, dukan al'ummai kuma su ji shi. An kuwa cece ni daga bakin zaki. Ubangiji zai cece ni daga kowane mugun aiki, ya kuma kai ni lafiya cikin mulkinsa na Sama. Ɗaukaka ta tabbata a gare shi har abada abadin. Amin.

Gaisuwa ta Ƙarshe

Ka gai da Firiska da Akila, da gidan Onisiforus. Erastus ya zauna a Korinti, na kuma bar Tarofimus, wanda ba shi da lafiya, a Militus. Ka yi ƙoƙari ka zo kafin lokacin hunturu. Yubulus, da Budis, da Linus, da Kalaudiya, da dukan 'yan'uwa suna gaishe ka.

Ubangiji yă kasance tare da ruhunka. Alheri yă kasance tare da ku duka.