Pinadayag 10

10 ¹Unya nakita ko ang laing gamhanang anghel nga nanaog gikan sa langit, giputos sa panganod, may balangaw sa ibabaw sa iyang ulo, ang iyang nawong sama sa adlaw, ug ang iyang mga tiil sama sa nagdilaab nga mga haligi. ²Nagkupot siya ug usa ka gamayng linukot nga basahon nga binuklad, gitungtong niya ang iyang tuong tiil sa dagat, ug ang iyang wala sa yuta, ³ug misinggit sama sa nagangulob nga leon. Sa dihang misinggit siya, misulti ang pito ka dalugdog.

⁴Sa dihang misulti ang pito ka dalugdog, hapit na ako mosulat, apan nakadungog ako ug tingog gikan sa langit nga nag-ingon, “Silyohi ang ilang gisulti; ayaw kini isulat.”

⁵Unya ang anghel nga akong nakita nga nagtindog sa dagat ug sa yuta mibayaw sa iyang tuong kamot ngadto sa langit, ⁶ug nanumpa pinaagi sa atong Amahan nga buhi hangtod sa kahangtoran, nga naglalang sa langit ug sa tanan nga anaa niini, sa yuta ug sa tanan nga anaa niini, ug sa dagat ug sa tanan nga anaa niini, “Wala nay langan! ⁷Sa dihang ang ikapito nga anghel hapit na mopatingog sa iyang trumpeta, matuman na ang misteryo sa atong Amahan, sumala sa iyang gipahibalo ngadto sa iyang mga alagad nga propeta.” ^a a v7 Ang misteryo nga gipahibalo sa atong Amahan pinaagi sa mga propeta nagkab-ot sa iyang kahingpitan diha sa iyang Anak — ang Maayong Balita nga gipaila ngadto sa tanang katawhan (Efeso 3:8-9; Colosas 1:26-27).

⁸Misulti na usab ang tingog gikan sa langit, “Lakaw, kuhaa ang binuklad nga linukot nga basahon gikan sa kamot sa anghel nga nagtindog sa dagat ug sa yuta.”

⁹Busa miadto ako sa anghel ug nangayo sa gamayng linukot nga basahon. Miingon siya, “Kuhaa ug kan-a kini. Pait-on niini ang imong tiyan, apan sa imong baba matam-is kini sama sa dugos.”

¹⁰Gikuha ko ang gamayng linukot nga basahon gikan sa kamot sa anghel ug gikaon kini. Sa akong baba, matam-is kini sama sa dugos; apan sa nakaon ko na kini, mipait ang akong tiyan. ¹¹Unya giingnan nila ako, “Kinahanglan managna ka pag-usab mahitungod sa daghang katawhan, mga nasod, mga pinulongan, ug mga hari.”