Ngam Liannu Tambaan Chonglang Pi Swake
Tambaan chonglang katei khatna baket inchang tuipui chung bi khatle baket pek talei chung bi sat thangluga ani Pa meng bina karen thang rwe: ngian latlaye. Bachek baraam siarina rinne, atiga John khou, haga hiak mako, diga rin rwe. Maanna chongdip titcha ga sa rwe: bamun bina khwei tui danga thumme, atiyeda basung bina thum make. Maanna leng ri chong rin swak ding nge.
Ani Pa na chongkhak hei bing bi kabia nge 4, 8
10 1Atiga eina tambaan lana pi swaknu ngam liannu tambaan chonglang katei khat mu rwe. Maan tambu bina kazwanluga, balu chung bi tamsaipwak am ngaake, bamai kum ga lumik dan ngaake khatle baket ga mei inteng dan ngaake. 2Maanna lat swaknu chongdip titcha khat choiga, baket inchang ding tuipui chung bi khatle baket pek ding talei chung bi sat thang rwe, 3khatle baraam ongnu takhu krwang danga pao rwe. Maan paonu kaan bi, bachek baraam siarina rin rwe.
4Bachek baraam siarina rinnu kaan bi, eina hiak lang to ong ngaake, atiyeda tambaan lana khwan khat thei rwe, “Banina rinnu bing nga seal namro, haga hiak mako.”
5Atiga eina tuipui le talei chung bi han ongnu mu damnu tambaan chonglang gana bakut inchang ding tambaan khou kai rwe, 6khatle khwa seiga ringnu, tambaan khatle haba bi amnu bing ding, talei ram khatle haba bi amnu bing ding, khatle tuipui khatle haba bi amnu bing ding dam thangnu ani Pa meng bina karen thang rwe, “Atun ngian latlaye! 7Siarinu tambaan chonglang gana baom trumpet sem lang to ongnu kaan bi, Maanna Baom swak thiamting rwan khou kasam thang damnu danga, ani Pa om inthim chong ga hung tang lune.” a a v7 Ani Pa na thiamting rwan mun bina kasam thang damnu inthim chong ga Basa Kapaisa khou sip tang nge — heiya chaat bingza khou pi thei thangnu sacham gaye (Ephesians 3:8-9; Colossians 1:26-27).
8Atiga tambaan lana thei damnu khwan gana akhou rin late, “Se ngo, tuipui le talei chung bi han ongnu tambaan chonglang kut lana lat swaknu chongdip ka louro.”
9Atibriakpina ei tambaan chonglang khou se rwe, khatle bakhou chongdip titcha ding ni rwe. Maanna rinne, “Haga louluga saro. Haga nabon ding pi khaa thanglune, atiyeda namun bi khwei tui danga kathumnu thanglune.”
10Eina tambaan chonglang kut lana chongdip titcha ga louluga haga sa rwe. Amun bi haga khwei tui danga kathum ngaake, atiyeda haga sa damnu nung bi abon ga khaa drwe. 11Atiga banina akhou rinne, “Mi taswang, chaat bing, chong chaat bing khatle krwang nun lang bi nangna han chong rin swak lat to ding gaye.”