Ingelosi Enamandla Yehla
Ingelosi ibeka unyawo olulodwa olwandle nolunye emhlabathini, ifunge ngoBaba wethu: akusekho ukubambezeleka. Kukhuluma izindudumo eziyisikhombisa, futhi uJohane uyenqatshelwa ukuzibhala. Udla umqulwana: uju emlonyeni wakhe, kube munyu ngemuva. Kumele aphinde aprofethe.
10 1Ngabe sengibona enye ingelosi enamandla yehla ivela ezulwini, yembethe ifu, kunothingo lwenkosazana phezu kwekhanda layo, ubuso bayo bunjengelanga, izinyawo zayo zinjengezinsika zomlilo. 2Yayiphethe umqulu omncane ovulekile, yabeka unyawo lwayo lwesokunene phezu kolwandle, olwesokhohlo emhlabeni, 3yamemeza ngezwi elikhulu njengebhubesi elibhongayo. Lapho imemeza, kwakhuluma imidumo yezulu eyisikhombisa.
4Lapho imidumo yezulu eyisikhombisa ikhuluma, ngangisazobhala, kodwa ngezwa izwi livela ezulwini lithi: “Namekela lokho abakushilo; ungakubhali.”
5Yayisithi ingelosi engayibona imi phezu kolwandle nomhlaba yaphakamisela isandla sayo sokunene ezulwini, 6yafunga ngoBaba wethu ophila kuze kube phakade naphakade, owadala izulu nakho konke okukulo, umhlaba nakho konke okukuwo, nolwandle nakho konke okukulo, yathi: “Akusayikuba khona ukulibala! 7Lapho ingelosi yesikhombisa isizokhalisa icilongo layo, kuyakugcwaliseka imfihlakalo kaBaba wethu, njengoba akumemezela ezincekwini zakhe abaprofethi.” a a v7 Imfihlakalo uBaba wethu ayimemezela ngabaprofethi ifinyelela ekugcwalisekeni kwayo eNdodaneni yakhe — ivangeli elaziswa kubo bonke abantu (Kwabase-Efesu 3:8-9; KwabaseKholose 1:26-27).
8Izwi elivela ezulwini laphinda lakhuluma kimi lathi: “Hamba, uthathe umqulu ovulekile esandleni sengelosi emi phezu kolwandle nomhlaba.”
9Ngaya-ke kule ngelosi, ngayicela umqulu omncane. Yathi kimi: “Thatha uwudle. Uyakwenza isisu sakho sibe muncu, kodwa emlonyeni wakho uyakuba mnandi njengoju.”
10Ngawuthatha umqulu omncane esandleni sengelosi ngawudla. Emlonyeni wami wawumnandi njengoju; kodwa sengiwudlile, isisu sami saba muncu. 11Base bethi kimi: “Umelwe ukuprofetha futhi ngabantu abaningi, nangezizwe, nangezilimi, nangamakhosi.”
