Ìfihàn 10

10 ¹Nígbà náà ni mo rí angẹli alágbára mìíràn tí ó ń sọ̀kalẹ̀ láti ọ̀run wá, tí a fi àwọsánmà dì í, òṣùmàrè sì wà lórí rẹ̀, ojú rẹ̀ dàbí oòrùn, ẹsẹ̀ rẹ̀ sì dàbí ọwọ̀n iná. ²Ó di àkájọ ìwé kékeré kan tí ó ṣí sílẹ̀ lọ́wọ́, ó gbé ẹsẹ̀ ọ̀tún rẹ̀ lé orí òkun, ẹsẹ̀ òsì rẹ̀ sì lé orí ilẹ̀, ³ó sì kígbe sókè bí kìnnìún tí ń bú ramúramù. Nígbà tí ó kígbe, àrá méje sì fọhùn.

⁴Nígbà tí àrá méje náà fọhùn, mo fẹ́ẹ̀ kọ ọ́ sílẹ̀, ṣùgbọ́n mo gbọ́ ohùn kan láti ọ̀run wá pé, “Fi èdìdì di ohun tí wọ́n sọ; má ṣe kọ ọ́ sílẹ̀.”

⁵Nígbà náà ni angẹli tí mo rí tí ó dúró lórí òkun àti orí ilẹ̀ gbé ọwọ́ ọ̀tún rẹ̀ sókè ọ̀run, ⁶ó sì fi Baba wa tí ó wà láé àti láéláé búra, ẹni tí ó dá ọ̀run àti ohun gbogbo tí ń bẹ nínú rẹ̀, ayé àti ohun gbogbo tí ń bẹ nínú rẹ̀, àti òkun àti ohun gbogbo tí ń bẹ nínú rẹ̀ pé, “Ìdádúró kì yóò sí mọ́! ⁷Nígbà tí angẹli keje bá fẹ́ẹ̀ fọn ìpè rẹ̀, ohun ìjìnlẹ̀ Baba wa yóò ṣẹ, gẹ́gẹ́ bí ó ti kéde fún àwọn wòlíì ìránṣẹ́ rẹ̀.” ^a a v7 Ohun ìjìnlẹ̀ tí Baba wa kéde láti ọwọ́ àwọn wòlíì dé ẹ̀kúnrẹ́rẹ́ rẹ̀ nínú Ọmọ rẹ̀ — ìhìnrere tí a fihàn fún gbogbo ènìyàn (Efesu 3:8-9; Kolosse 1:26-27).

⁸Ohùn náà láti ọ̀run wá tún bá mi sọ̀rọ̀ pé, “Lọ, gba àkájọ ìwé tí ó ṣí sílẹ̀ lọ́wọ́ angẹli tí ó dúró lórí òkun àti orí ilẹ̀.”

⁹Nítorí náà mo tọ angẹli náà lọ, mo sì béèrè fún àkájọ ìwé kékeré náà. Ó sì wí fún mi pé, “Gbà á kí o sì jẹ ẹ́. Yóò mú kí inú rẹ korò, ṣùgbọ́n ní ẹnu rẹ yóò dùn bí oyin.”

¹⁰Mo sì gba àkájọ ìwé kékeré náà lọ́wọ́ angẹli náà, mo sì jẹ ẹ́. Ó dùn ní ẹnu mi bí oyin; ṣùgbọ́n lẹ́yìn tí mo jẹ ẹ́ tán, inú mi korò. ¹¹Nígbà náà ni wọ́n wí fún mi pé, “Ìwọ gbọ́dọ̀ tún sọtẹ́lẹ̀ nípa ọ̀pọ̀lọpọ̀ ènìyàn, orílẹ̀-èdè, èdè, àti àwọn ọba.”