Phongkhami 10

10 ¹Chiwui thili ina kazingrao khangatei pangshap khalei akha kazingram eina katā thei. Muiyā eina ali khalaphaida, akuili changjeengawut lei; awui mai zimik thai, kala aphei meiwui pākra̱ thai. ²Ana lairik akhalui kateo sho kahai akha apāngli singa, awui yāphei chi shamadruli shu, awui uiphei chi ngaleili shu, ³kala kazingkha̱ kakhangang thāda panglāk eina vaowa. Ana vao tharan, kazing khangashum shini matuiya.

⁴Kazing khangashum shini matui tharan, ina kapi khavai jihaira, kha kazingramwui eina akhon akha ina shai, "Athumna hāngkahai chi mahor namhaolu; chi makapisanghailu."

⁵Chiwui thili shamadru kala ngaleili khanganing ina thei kazingrao china, awui yāpāng chi kazingramshong khāngkāda, ⁶kala katang mavaila kharinga, kazingram kala chiwui alungli khalei saikora, ngalei kala chiwui alungli khalei saikora, kala shamadru kala chiwui alungli khalei saikora sākahai ithumwui Avāwui ming singda ngashitta hānga, "Naoda kapan maleiluimara! ⁷Kashine kazingrao china awui talla̱ chi khonglu khavai jida tharan, awui rao marānbingli ana hāngngasak kahai thāda, ithumwui Avāwui khangathuma chi ungshungra." ^a a v7 Ithumwui Avāna marānbingli hāngngasak kahai khangathuma chi awui Anaomayarali ungshung kuphaora — miyur saikorali theingasakki kaphā pao chi (Ephesians 3:8-9; Colossians 1:26-27).

⁸Kazingramwui eina akhon china ili latluida hānga, "Vālu, shamadru kala ngaleili khanganing kazingrao chiwui pāng eina sho kahai lairik akhalui chi khuilu."

⁹Chieina ina kazingrao chili vāda, lairik akhalui kateo chi apoi. Ana hānga, "Khuida shailu. Chi nawukli khāshihaira, kha nakhamorli chi khuira̱ thāda shima."

¹⁰Ina kazingrao chiwui pāng eina lairik akhalui kateo chi khuilaga shaihaowa. Ikhamorli chi khuira̱wui kashim thai; kha shai kahaiwui thili, iwui wukli khāshihaowa. ¹¹Chieina athumna ili hānga, "Nana mi kachungkha, miyur, tuiyur kala awungabingwui pongli latluida marānphalungra."