ശക്തനായ ദൂതൻ ഇറങ്ങിവരുന്നു

ഒരു ദൂതൻ ഒരു കാൽ കടലിന്മേലും ഒരു കാൽ കരമേലും ഉറപ്പിച്ചു, നമ്മുടെ പിതാവിനെച്ചൊല്ലി സത്യം ചെയ്യുന്നു: ഇനി താമസമില്ല. ഏഴ് ഇടിമുഴക്കങ്ങൾ സംസാരിക്കുന്നു, അവ എഴുതിവെക്കരുതെന്നു യോഹന്നാനെ വിലക്കുന്നു. അവൻ ചെറിയ ചുരുൾ തിന്നുന്നു: വായിൽ തേൻ, പിന്നീടു കയ്പ്. അവൻ വീണ്ടും പ്രവചിക്കേണം.

അധ്യായം 10.

പിന്നീട്, മേഘം പുതച്ച്, തലയ്ക്കുമീതെ മഴവില്ലോടെ, സൂര്യനെപ്പോലെ മുഖവും അഗ്നിസ്തംഭങ്ങൾപോലെ കാലുകളുമുള്ള, ശക്തനായ മറ്റൊരു ദൂതൻ സ്വർഗത്തിൽനിന്ന് ഇറങ്ങിവരുന്നതു ഞാൻ കണ്ടു. തുറന്ന ഒരു ചെറിയ ചുരുൾ കൈയിൽ പിടിച്ച്, വലത്തുകാൽ കടലിന്മേലും ഇടത്തുകാൽ കരയിന്മേലും വെച്ച്, ഗർജിക്കുന്ന സിംഹത്തെപ്പോലെ അവൻ ഉറക്കെ വിളിച്ചുപറഞ്ഞു. അവൻ വിളിച്ചുപറഞ്ഞപ്പോൾ ഏഴു ഇടിമുഴക്കങ്ങൾ സംസാരിച്ചു.

ഏഴു ഇടിമുഴക്കങ്ങൾ സംസാരിച്ചപ്പോൾ ഞാൻ എഴുതുവാൻ ഒരുങ്ങി; എന്നാൽ, “അവ പറഞ്ഞതു മുദ്രയിടുക; എഴുതരുത്” എന്ന് സ്വർഗത്തിൽനിന്ന് ഒരു ശബ്ദം ഞാൻ കേട്ടു.

അപ്പോൾ, കടലിന്മേലും കരയിന്മേലും നിൽക്കുന്നതായി ഞാൻ കണ്ട ആ ദൂതൻ തന്റെ വലംകൈ സ്വർഗത്തിലേക്ക് ഉയർത്തി, സ്വർഗവും അതിലുള്ള സകലവും, ഭൂമിയും അതിലുള്ള സകലവും, കടലും അതിലുള്ള സകലവും സൃഷ്ടിച്ച, എന്നെന്നേക്കും ജീവിക്കുന്ന നമ്മുടെ പിതാവിന്റെ നാമത്തിൽ ആണയിട്ടു: “ഇനി താമസമില്ല! ഏഴാമത്തെ ദൂതൻ തന്റെ കാഹളം ഊതുവാൻ ഒരുങ്ങുമ്പോൾ, തന്റെ ദാസന്മാരായ പ്രവാചകന്മാരോട് അറിയിച്ചതുപോലെ, നമ്മുടെ പിതാവിന്റെ രഹസ്യം നിവൃത്തിയാകും.” ^a

സ്വർഗത്തിൽനിന്നുള്ള ആ ശബ്ദം വീണ്ടും സംസാരിച്ചു: “നീ ചെന്ന്, കടലിന്മേലും കരയിന്മേലും നിൽക്കുന്ന ദൂതന്റെ കൈയിൽനിന്ന് തുറന്ന ചുരുൾ വാങ്ങുക.”

അങ്ങനെ ഞാൻ ആ ദൂതന്റെ അടുക്കൽ ചെന്ന് ആ ചെറിയ ചുരുൾ ചോദിച്ചു. അവൻ പറഞ്ഞു: “ഇതു വാങ്ങി തിന്നുക. ഇതു നിന്റെ വയറ്റിൽ കയ്പായിത്തീരും; എന്നാൽ നിന്റെ വായിൽ തേൻപോലെ മധുരമായിരിക്കും.”

ഞാൻ ആ ചെറിയ ചുരുൾ ദൂതന്റെ കൈയിൽനിന്നു വാങ്ങി തിന്നു. എന്റെ വായിൽ അതു തേൻപോലെ മധുരമായിരുന്നു; എന്നാൽ തിന്നുകഴിഞ്ഞപ്പോൾ എന്റെ വയറു കയ്പായിത്തീർന്നു. അപ്പോൾ അവർ എന്നോടു പറഞ്ഞു: “അനേകം ജനങ്ങളെയും ജനതകളെയും ഭാഷകളെയും രാജാക്കന്മാരെയുംകുറിച്ച് നീ വീണ്ടും പ്രവചിക്കേണ്ടതാകുന്നു.”