Anju Wamphambvu Atsika Kudzulu

Anju asaikha nyendo ibodzi pa bara na inango pa mataka mbapika na Baba wathu: nkhabe kucedwa pontho. Mabingu manomwe asalonga mbwenye Juwau asakhonderwa kulemba pinalonga iwo. Iye asadya mpukutu ung'ono: wakukoma ninga uci m'kanwa mwace, wakuwawa buluka penepo. Iye asafunika kulonga mafala aprofeta pontho.

Kapitulu 10.

Penepo ndaona anju unango wamphambvu mbakabuluka kudzulu, akhadafunikirwa na khole, uta wa madzi pa nsolo wace, nkhope yace ninga dzuwa, miyendo yace ninga mphanda za moto. Iye akhaphata mpukutu ung'ono wakufunguka, mbaikha mwendo wace wa madyo pa bara, wa bzere pa mataka, mbakhuwa na mphambvu ninga nkhalamu inabuluma. Pidakhuwa iye, mabingu manomwe alonga.

Pidalonga mabingu manomwe, ndikhafuna kulemba, mbwenye ndabva fala yakubuluka kudzulu yakuti: “Bisa pidalonga mabingu anewa; leka kupilemba.”

Penepo anju ule ndaona mbakaima pa bara na pa mataka, akwirisa djanja yace ya madyo kudzulu, mbadumbira na Baba wathu, ule ali maso kwenda na kwenda, adalenga kudzulu na pyonsene piri mwenemu, dziko na pyonsene piri mwenemu, na bara na pyonsene piri mwenemu, mbalonga: “Nkhabenso kudembuka! Mu n'dzidzi unafuna anju wacinomwe kuliza nyanga yace, cibisobiso ca Baba wathu cinakwanisika, ninga mudadziwisa Iye atumiki ace, aprofeta.” ^a

Fala ire yakubuluka kudzulu yalonga pontho, mbalonga: “Ndoko, phata mpukutu wakufunguka uri m'manja mwa anju ule adaima pa bara na pa mataka.”

Natenepo ndaenda kuna anju, mbandimphemba mpukutu ung'ono ule. Iye alonga kuti: “Phata, udye. Unawawisa mimba yako, mbwenye nkamwa mwako unakhala wakutapira ninga uci.”

Ndaphata mpukutu ung'ono kubuluka m'manja mwa anju, mbandiudya. Nkamwa mwanga ukhali wakutapira ninga uci; mbwenye pidamala ine kuudya, mimba yanga yawawa. Penepo iwo andipanga, mbalonga: “Usafunika kuprofetiza pontho thangwi ya mitundu mizinji ya anthu, madziko, pilongero, na amambo.”