တန်ခိုးကြီးသောကောင်းကင်တမန်ဆင်းသက်လာခြင်း

ကောင်းကင်တမန်တစ်ပါးသည် ခြေတစ်ဖက်ကို ပင်လယ်ပေါ်၊ တစ်ဖက်ကို မြေပေါ်တွင် ချ၍ ငါတို့၏ခမည်းတော်ကို တိုင်တည်ကျိန်ဆို၏ — နောက်ထပ် မနှောင့်နှေးတော့ပြီ။ မိုးကြိုးခုနစ်ချက် ပြောဆိုပြီး ယောဟန်ကို ၎င်းတို့ကို ရေးမှတ်ခြင်း မပြုရန် တားမြစ်၏။ သူသည် စာလိပ်ငယ်ကို စား၏ — ပါးစပ်၌ ပျားရည်ကဲ့သို့ ချို၍ နောက်မှ ခါး၏။ သူသည် တစ်ဖန် ပရောဖက်ပြုရမည်။

အခန်း 10။

ထို့နောက် တန်ခိုးကြီးသောအခြားကောင်းကင်တမန်တစ်ပါး ကောင်းကင်မှဆင်းသက်လာသည်ကို ငါမြင်၏။ ထိုသူသည် မိုးတိမ်ကိုဝတ်ဆင်လျက်၊ ဦးခေါင်းပေါ်တွင် သက်တံရှိ၍၊ မျက်နှာသည် နေကဲ့သို့၊ ခြေသည် မီးတိုင်ကဲ့သို့ဖြစ်၏။ ဖွင့်ထားသောစာလိပ်ငယ်တစ်ခုကို ကိုင်ထား၍၊ လက်ယာခြေကို ပင်လယ်ပေါ်၌၊ လက်ဝဲခြေကို ကုန်းမြေပေါ်၌ ချ၏။ ဟောက်သောခြင်္သေ့ကဲ့သို့ ကြီးစွာဟစ်ကြွေး၏။ ထိုသို့ဟစ်ကြွေးသောအခါ မိုးချုန်းသံခုနစ်ချက် မြွက်ဆို၏။

မိုးချုန်းသံခုနစ်ချက် မြွက်ဆိုသောအခါ ငါသည်ရေးမှတ်မည်ပြုစဉ်၊ ကောင်းကင်မှအသံတစ်ခုက “ထိုမိုးချုန်းသံများ ပြောဆိုသောအရာကို တံဆိပ်ခတ်၍ မရေးမှတ်နှင့်” ဟုဆိုသည်ကို ငါကြား၏။

ထိုအခါ ပင်လယ်နှင့်ကုန်းမြေပေါ်တွင် ရပ်နေသည်ကို ငါမြင်သောကောင်းကင်တမန်သည် လက်ယာလက်ကို ကောင်းကင်သို့မြှောက်၍၊ ကမ္ဘာအဆက်ဆက်အသက်ရှင်တော်မူသော၊ ကောင်းကင်နှင့်ကောင်းကင်၌ရှိသမျှကို၎င်း၊ ကမ္ဘာမြေနှင့်မြေ၌ရှိသမျှကို၎င်း၊ ပင်လယ်နှင့်ပင်လယ်၌ရှိသမျှကို၎င်း ဖန်ဆင်းတော်မူသော ငါတို့၏ခမည်းတော်ကို တိုင်တည်၍ “နှောင့်နှေးခြင်း နောက်ထပ်မရှိတော့ပြီ။ သတ္တမကောင်းကင်တမန် တံပိုးမှုတ်မည်ပြုသောအခါ၊ ငါတို့၏ခမည်းတော်သည် မိမိ၏အစေခံကျွန်ဖြစ်သော ပရောဖက်တို့အား ကြေညာတော်မူခဲ့သည့်အတိုင်း ခမည်းတော်၏နက်နဲသောအရာတော်သည် ပြည့်စုံလိမ့်မည်” ဟု ကျိန်ဆို၏။ ^a

ကောင်းကင်မှအသံက တစ်ဖန် “သွားလော့၊ ပင်လယ်နှင့်ကုန်းမြေပေါ်တွင် ရပ်နေသောကောင်းကင်တမန်၏လက်မှ ဖွင့်ထားသောစာလိပ်ကို ယူလော့” ဟု ငါ့အားပြောဆို၏။

ထို့ကြောင့် ငါသည် ကောင်းကင်တမန်ထံသို့သွား၍ ထိုစာလိပ်ငယ်ကို ပေးပါဟုတောင်း၏။ ထိုသူက “ဤစာလိပ်ကိုယူ၍ စားလော့။ သင်၏ဝမ်းကိုခါးစေလိမ့်မည်၊ သို့ရာတွင် သင်၏ခံတွင်း၌ ပျားရည်ကဲ့သို့ချိုလိမ့်မည်” ဟုဆို၏။

ငါသည် ထိုစာလိပ်ငယ်ကို ကောင်းကင်တမန်၏လက်မှယူ၍ စား၏။ ငါ၏ခံတွင်း၌ ပျားရည်ကဲ့သို့ချို၏၊ သို့ရာတွင် စားပြီးသောအခါ ငါ၏ဝမ်းသည် ခါးလေ၏။ ထိုအခါ သူတို့က “သင်သည် များစွာသောလူမျိုး၊ နိုင်ငံ၊ ဘာသာစကားနှင့် ရှင်ဘုရင်တို့၏အကြောင်းကို တစ်ဖန်ပရောဖက်ပြုရမည်” ဟု ငါ့အားပြောကြ၏။