ಬಲಿಷ್ಠ ದೇವದೂತನು ಇಳಿದುಬರುತ್ತಾನೆ

ಒಬ್ಬ ದೂತನು ಒಂದು ಪಾದವನ್ನು ಸಮುದ್ರದ ಮೇಲೂ ಒಂದನ್ನು ಭೂಮಿಯ ಮೇಲೂ ಇಟ್ಟು ನಮ್ಮ ತಂದೆಯ ಮೇಲೆ ಆಣೆಯಿಡುತ್ತಾನೆ: ಇನ್ನು ತಡವಿಲ್ಲ. ಏಳು ಗುಡುಗುಗಳು ಮಾತನಾಡುತ್ತವೆ, ಅವುಗಳನ್ನು ಬರೆಯಬಾರದೆಂದು ಯೋಹಾನನಿಗೆ ನಿಷೇಧಿಸಲಾಗುತ್ತದೆ. ಅವನು ಚಿಕ್ಕ ಸುರುಳಿಯನ್ನು ತಿನ್ನುತ್ತಾನೆ: ಬಾಯಲ್ಲಿ ಜೇನು, ನಂತರ ಕಹಿ. ಅವನು ಮತ್ತೆ ಪ್ರವಾದಿಸಬೇಕು.

ಅಧ್ಯಾಯ 10.

ಆಗ ಸ್ವರ್ಗದಿಂದ ಇಳಿದುಬರುತ್ತಿದ್ದ ಇನ್ನೊಬ್ಬ ಬಲಿಷ್ಠ ದೇವದೂತನನ್ನು ನಾನು ಕಂಡೆನು. ಅವನು ಮೋಡವನ್ನು ಹೊದ್ದುಕೊಂಡಿದ್ದನು; ಅವನ ತಲೆಯ ಮೇಲೆ ಮಳೆಬಿಲ್ಲಿತ್ತು; ಅವನ ಮುಖವು ಸೂರ್ಯನಂತೆಯೂ ಅವನ ಕಾಲುಗಳು ಅಗ್ನಿಸ್ತಂಭಗಳಂತೆಯೂ ಇದ್ದವು. ಅವನ ಕೈಯಲ್ಲಿ ತೆರೆದಿದ್ದ ಒಂದು ಚಿಕ್ಕ ಸುರುಳಿಯಿತ್ತು. ಅವನು ತನ್ನ ಬಲಗಾಲನ್ನು ಸಮುದ್ರದ ಮೇಲೆಯೂ ಎಡಗಾಲನ್ನು ನೆಲದ ಮೇಲೆಯೂ ಇಟ್ಟು, ಗರ್ಜಿಸುವ ಸಿಂಹದಂತೆ ಮಹಾಧ್ವನಿಯಿಂದ ಕೂಗಿದನು. ಅವನು ಕೂಗಿದಾಗ ಏಳು ಗುಡುಗುಗಳು ನುಡಿದವು.

ಆ ಏಳು ಗುಡುಗುಗಳು ನುಡಿದಾಗ ನಾನು ಬರೆಯಲು ಸಿದ್ಧನಾಗಿದ್ದೆನು; ಆದರೆ, “ಅವು ನುಡಿದದ್ದನ್ನು ಮುದ್ರೆಹಾಕಿ ಇಡು; ಅದನ್ನು ಬರೆಯಬೇಡ,” ಎಂಬ ವಾಣಿಯನ್ನು ಸ್ವರ್ಗದಿಂದ ಕೇಳಿದೆನು.

ಆಗ ಸಮುದ್ರದ ಮೇಲೆಯೂ ನೆಲದ ಮೇಲೆಯೂ ನಿಂತಿರುವುದನ್ನು ನಾನು ಕಂಡ ಆ ದೇವದೂತನು ತನ್ನ ಬಲಗೈಯನ್ನು ಸ್ವರ್ಗದ ಕಡೆಗೆ ಎತ್ತಿ, ಎಂದೆಂದಿಗೂ ಜೀವಿಸುವ, ಸ್ವರ್ಗವನ್ನೂ ಅದರಲ್ಲಿರುವ ಎಲ್ಲವನ್ನೂ, ಭೂಮಿಯನ್ನೂ ಅದರಲ್ಲಿರುವ ಎಲ್ಲವನ್ನೂ, ಸಮುದ್ರವನ್ನೂ ಅದರಲ್ಲಿರುವ ಎಲ್ಲವನ್ನೂ ಸೃಷ್ಟಿಸಿದ ನಮ್ಮ ತಂದೆಯ ಆಣೆಯಿಟ್ಟು, “ಇನ್ನು ವಿಳಂಬವಿಲ್ಲ! ಏಳನೆಯ ದೇವದೂತನು ತನ್ನ ತುತ್ತೂರಿಯನ್ನು ಊದಲಿರುವಾಗ, ನಮ್ಮ ತಂದೆಯು ತಮ್ಮ ಸೇವಕರಾದ ಪ್ರವಾದಿಗಳಿಗೆ ಪ್ರಕಟಿಸಿದಂತೆ ಅವರ ರಹಸ್ಯವು ನೆರವೇರುವುದು.” ^a

ಸ್ವರ್ಗದಿಂದ ಕೇಳಿಬಂದ ಆ ವಾಣಿಯು ಪುನಃ ನನ್ನೊಂದಿಗೆ ಮಾತನಾಡಿ, “ನೀನು ಹೋಗಿ, ಸಮುದ್ರದ ಮೇಲೆಯೂ ನೆಲದ ಮೇಲೆಯೂ ನಿಂತಿರುವ ದೇವದೂತನ ಕೈಯಲ್ಲಿರುವ ತೆರೆದ ಸುರುಳಿಯನ್ನು ತೆಗೆದುಕೊ,” ಎಂದಿತು.

ಆಗ ನಾನು ಆ ದೇವದೂತನ ಬಳಿಗೆ ಹೋಗಿ, ಆ ಚಿಕ್ಕ ಸುರುಳಿಯನ್ನು ಕೊಡಬೇಕೆಂದು ಕೇಳಿದೆನು. ಅದಕ್ಕೆ ಅವನು, “ಇದನ್ನು ತೆಗೆದುಕೊಂಡು ತಿನ್ನು. ಇದು ನಿನ್ನ ಹೊಟ್ಟೆಯನ್ನು ಕಹಿಮಾಡುವುದು, ಆದರೆ ನಿನ್ನ ಬಾಯಲ್ಲಿ ಜೇನಿನಂತೆ ಸಿಹಿಯಾಗಿರುವುದು,” ಎಂದನು.

ನಾನು ಆ ಚಿಕ್ಕ ಸುರುಳಿಯನ್ನು ದೇವದೂತನ ಕೈಯಿಂದ ತೆಗೆದುಕೊಂಡು ತಿಂದೆನು. ಅದು ನನ್ನ ಬಾಯಲ್ಲಿ ಜೇನಿನಂತೆ ಸಿಹಿಯಾಗಿತ್ತು; ಆದರೆ ತಿಂದ ಮೇಲೆ ನನ್ನ ಹೊಟ್ಟೆ ಕಹಿಯಾಯಿತು. ಆಗ ಅವರು ನನಗೆ, “ನೀನು ಅನೇಕ ಪ್ರಜೆಗಳ, ಜನಾಂಗಗಳ, ಭಾಷೆಗಳ ಹಾಗೂ ರಾಜರ ವಿಷಯವಾಗಿ ಪುನಃ ಪ್ರವಾದಿಸಬೇಕು,” ಎಂದು ಹೇಳಿದರು.