Choortagei Malaikaiyat ne Nyigan
Ityacha malaikaiyat keldanyi ne po tai eng' nyanjet ak ne po kadit eng' ng'wony, ak koiyasyo eng' Kwandanyo kole: Mata kogagei kogeny. Ng'alaalei tuleet tisap, ak kiteenji Johana kole, amesir chuuto. Koam bukuit ne ming'in: kumyat eng' kutinnyi, ng'wanindo eng' moo. Nyolu komaot kogeny.
Ng'alaali Kwandanyo eng' mustarisyek 4, 8
10 1Yeityo ki ageer malaikaiyat age ne nyigan ne choortagei kobunu kipsengwet, ne ki rate pooldet, ak mi chemng'isiryet parak metinnyi, ak togeennyi ko uu asiista, ak keelyekyik ko uu lumeiywek che po maat. 2Ki tinyei bukuit ne ming'in ne yaataat, ak ki tyach keldanyi ne po tai eng' nyanjet, ak ne po kadit eng' ng'wony, 3ak ki waach ko uu ng'etundo ne poriseni. Ye kingo waach, ki ng'alaal tuleet tisap.
4Ye kingo ng'alaal tuleet tisap, ki amache asir, ago ki agas kutit ne punu kipsengwet ne leen, “Ung'e ng'aleek che kamwa tuleet tisap, amesir chuuto.”
5Yeityo malaikaiyat ne ki ageer kotonone eng' nyanjet ak ng'wony, ki ichuul eunnyi ne po tai kipsengwet, 6ak ki iyasyo eng' Kwandanyo ne sabei koigeny ak koigeny, ne ki toi koyai kipsengwet ak tugul che mi oriit, ak ng'wony ak tugul che mi oriit, ak nyanjet ak tugul che mi oriit, kole, “Mata kogagei kogeny! 7Ago ye machei koguut malaikaiyat ne po tisap iryageet, kosulda kiy ne ung'oot ne po Kwandanyo, ko uu ye ki mwachi otwogikyik maotik.” a a v7 Kiy ne ung'oot ne ki mwa Kwandanyo eng' kutusweegap maotik, kosulda eng' Weeriinnyi — logoiywek che myach che kiboorchi piik tugul (Efeso 3:8-9; Kolosai 1:26-27).
8Ki ng'alaal kutit ne ki agas kobunu kipsengwet kogeny, koleenji, “Wendi, inam bukuit ne yaataat eng' eutap malaikaiyat ne tonone eng' nyanjet ak ng'wony.”
9Ki awo anyun ole mi malaikaiyat, asoome bukuit ne ming'in. Ak ki leenji, “Inam ak iam. King'woneen moeng'ung', ago anyinyitu eng' kuting'ung' ko uu kumyat.”
10Ki anam bukuit ne ming'in eng' eutap malaikaiyat, ak aam. Ki anyiny eng' kutinnyu ko uu kumyat; ago ye kaam, king'woneen moennyu. 11Yeityo ki leenjo, “Nyolu iamdoi kogeny agobo piik che chaang', ak pororyosyek, ak kutusweek, ak laitorinik.”