Takot Thaka Sorgodoth Namhi Ahhise
Ekjon sorgodoot ekta theng samundar te aru ekta theng mati te rakhi amikhan laga Pitri laga nam loi kosom khai: aru deri nohobo. Satta bijli-gorjon kotha koi aru John ke itu likhibole mana kori diye. Tai soru kitab khai diye: mukh te modhu nisina, pichete tita. Tai aru bhobishyobani koribo lagibo.
10 1Tetiya moi aru ekjon takot thaka sorgodoth ke sorgo pora namhi aha dekhise, jun badal pora bandi thakise, tar matha uporte akas-dhanu thakise, tar chehera suruj nisena aru tar theng khan jui laga khamba nisena thakise. 2Tar hath te ekta chutu khula kitab dhuri thakise, tar dyna theng tu samundar uporte aru bam theng tu mati uporte rakhise, 3aru ekta garjana kora singho nisena jor pora hokar marise. Jitia tai hokar marise, tetiya sat-ta megh-garjan pora kotha koise.
4Jitia sat-ta megh-garjan pora kotha koise, tetiya moi likhibole thakise, kintu sorgo pora ekta awaj moi hunise, “Taikhan ki koise eitu chap mari rakhibi; eitu nalikhibi.”
5Tetiya samundar aru mati uporte khara thaka jun sorgodoth ke moi dekhise, tai tar dyna hath sorgo phale uthaise, 6aru hodai-hodai jivit thaka amar Pitri laga naam te kosom khaise, jun pora sorgo aru etu bhitor te thaka sob, prithibi aru etu bhitor te thaka sob, aru samundar aru etu bhitor te thaka sob bonaise: “Aru deri nohobo! 7kintu jitia sat-ta nombor sorgodoth tai laga biguil bajabole hobo, tetiya amar Pitri laga lukai thaka kotha purah hobo, jineka Tai laga noukar bhabobadi khan ke janai dise.” a a v7 Amar Pitri pora bhabobadi khan dwara janai diya lukai thaka kotha tu Tar laga Putro te purah hoi — susamachar tu sob manuh khan ke janai dise (Ephesians 3:8-9; Colossians 1:26-27).
8Sorgo pora aha hei awaj tu aru ekbar moi logot te kotha koise, “Jabi, samundar aru mati uporte khara thaka sorgodoth laga hath pora khula kitab tu lobi.”
9Titia moi sorgodoth usorte jaise, aru chutu kitab tu mangise. Tai koise, “Eitu loi kene khai lobi. Eitu tumar pet te tita hobo, kintu tumar mukh te mou nisena mitha hobo.”
10Moi sorgodoth laga hath pora chutu kitab tu loi kene khaise. Moi laga mukh te eitu mou nisena mitha thakise; kintu khai luwa pichete, moi laga pet te tita hoi jaise. 11Tetiya taikhan moi ke koise, “Tumi bisi manuh khan, desh khan, bhasa khan aru raja khan laga bisu te aru ekbar bhabobani kobo lage.”