Mmụọ Ozi Ahụ Dị Ike Arịdata

Otu mmụọ ozi na-azọ otu ụkwụ nʼelu oké osimiri na otu nʼelu ala, ma were Nna anyị ṅụọ iyi: igbu oge agaghị adị ọzọ. Égbè eluigwe asaa na-ekwu okwu, a machibidokwa Jọn iwu ide ha. Ọ na-eri obere akwụkwọ mpịakọta ahụ: mmanụ aṅụ nʼọnụ ya, ilu emesịa. Ọ ga-ebu amụma ọzọ.

Isi 10.

Mgbe ahụ, ahụrụ m mmụọ ozi ọzọ dị ike ka ọ na-esi nʼeluigwe na-arịdata, nke igwe ojii kpuchiri; egwurugwu dị nʼelu isi ya, ihu ya dịka anyanwụ, ụkwụ ya abụọ dịkwa ogidi ọkụ. O ji nʼaka ya obere akwụkwọ mpịakọta meghere emeghe, zọkwasị ụkwụ aka nri ya nʼelu oke osimiri, ụkwụ aka ekpe ya nʼelu ala, tie mkpu dịka ọdụm na-agbọ ụja. Mgbe o tiri mkpu ahụ, égbè eluigwe asaa kwuru okwu.

Mgbe égbè eluigwe asaa ahụ kwuru okwu, ana m achọ ide ya, ma anụrụ m otu olu si nʼeluigwe sị, “Kaa ihe ha kwuru akara; edekwala ya.”

Mgbe ahụ, mmụọ ozi ahụ m hụrụ ka o guzo nʼelu oke osimiri na nʼelu ala weliri aka nri ya elu chee nʼeluigwe, ṅụọ iyi site nʼaha Nna anyị, onye na-adị ndụ ruo mgbe ebighị ebi, onye kere eluigwe na ihe niile dị nʼime ya, ụwa na ihe niile dị nʼime ya, na oke osimiri na ihe niile dị nʼime ya, sị, “Igbu oge agaghịkwa adị ọzọ! Kama nʼụbọchị mmụọ ozi nke asaa ga-afụ opi ya, ihe omimi nke Nna anyị ga-emezu, dịka o kwuru nʼihu ndị ohu ya bụ ndị amụma.” ^a

Olu ahụ si nʼeluigwe gwakwara m okwu ọzọ sị, “Gaa, naara akwụkwọ mpịakọta ahụ meghere emeghe site nʼaka mmụọ ozi ahụ guzo nʼelu oke osimiri na nʼelu ala.”

Ya mere, agakwuuru m mmụọ ozi ahụ, rịọ ya ka o nye m obere akwụkwọ mpịakọta ahụ. Ọ sịrị m, “Naara ya rie. Ọ ga-eme ka afọ gị lụọ ilu, ma ọ ga-atọ ụtọ nʼọnụ gị dịka mmanụ aṅụ.”

Anaara m obere akwụkwọ mpịakọta ahụ site nʼaka mmụọ ozi ahụ rie ya. Ọ tọrọ ụtọ nʼọnụ m dịka mmanụ aṅụ; ma mgbe m risịrị ya, afọ m lụrụ ilu. Mgbe ahụ, a gwara m sị, “Ị ga-ebukwa amụma ọzọ banyere ọtụtụ mmadụ, mba dị iche iche, asụsụ dị iche iche, na ndị eze.”