Ufunuo 10

10 ¹Kisha nikaona malaika mwingine mwenye nguvu akishuka kutoka mbinguni, amevikwa wingu, na upinde wa mvua juu ya kichwa chake, uso wake ukiwa kama jua, na miguu yake kama nguzo za moto. ²Alishika kitabu kidogo kilichokunjuliwa, akaweka mguu wake wa kuume juu ya bahari, na wa kushoto juu ya nchi kavu, ³akapiga kelele kama simba angurumaye. Alipopiga kelele, ngurumo saba za radi zikanena.

⁴Zile ngurumo saba za radi zilipokwisha kunena, nalikuwa karibu kuandika, lakini nikasikia sauti kutoka mbinguni ikisema: "Tia muhuri hayo waliyoyanena; usiyaandike."

⁵Kisha yule malaika niliyemwona amesimama juu ya bahari na nchi kavu akainua mkono wake wa kuume kuelekea mbinguni, ⁶akaapa kwa Baba yetu aishiye milele na milele, aliyeziumba mbingu na vyote vilivyomo ndani yake, na nchi na vyote vilivyomo ndani yake, na bahari na vyote vilivyomo ndani yake, akisema: "Hakutakuwa na kukawia tena! ⁷Bali katika siku ile malaika wa saba atakapokaribia kupiga baragumu yake, siri ya Baba yetu itatimizwa, kama alivyowahubiria watumishi wake manabii." ^a a v7 Siri ambayo Baba yetu aliitangaza kupitia manabii inafikia utimilifu wake katika Mwana wake — injili iliyodhihirishwa kwa mataifa yote (Waefeso 3:8-9; Wakolosai 1:26-27).

⁸Ile sauti niliyoisikia kutoka mbinguni ikanena nami tena, ikisema: "Nenda, ukakitwae kile kitabu kilichokunjuliwa kilicho mkononi mwa yule malaika aliyesimama juu ya bahari na nchi kavu."

⁹Basi nikamwendea yule malaika, nikimwomba anipe kile kitabu kidogo. Akaniambia, "Kitwae, ukile. Kitautia uchungu tumbo lako, lakini kinywani mwako kitakuwa kitamu kama asali."

¹⁰Nikakitwaa kile kitabu kidogo kutoka mkononi mwa malaika, nikakila. Kinywani mwangu kilikuwa kitamu kama asali; lakini nilipokwisha kukila, tumbo langu likatiwa uchungu. ¹¹Kisha wakaniambia, "Imekupasa kutabiri tena juu ya watu wengi, na mataifa, na lugha, na wafalme."