Mũraika ũrĩa Mũnene Araikũrũka
Mũraika arũgamia kũgũrũ kũmwe iriainĩ na kũngĩ thĩ, akeehĩta na Ithe witũ: gũtirĩ gũcererwo gũngĩ. Marurumĩ mũgwanja makaria, naake Johana akagirio kũmaandĩka. Arĩa kabuku kau: kamũrĩte ta ũũkĩ kanua, thuutha ũcio gakarũra. No nginya arathe rĩngĩ.
10 1Ningĩ ngĩona mũraika ũngĩ mũnene agĩikũrũka oimĩte igũrũ, ehumbĩte itu, arĩ na mũkũnga wa mbura igũrũ rĩa mũtwe wake, ũthiũ wake ũhaana ta riũa, namo magũrũ make mahaana ta itugĩ cia mwaki. 2Aanyiitĩte gĩkũnjo kĩnini kĩhingũre, akĩrũgamia kũgũrũ gwake kwa ũrĩo iriainĩ, na kwa ũmotho agĩkũrũgamia thĩ nyũmũ, 3Naake akĩanĩrĩra na mũgambo mũnene ta mũrũũthi ũkũraramana. Na rĩrĩa aanĩrĩire, ngwa mũgwanja ikĩaria.
4Na rĩrĩa ngwa icio mũgwanja ciaarĩirie, ndaarĩ hakuhĩ kwandĩka, no ngĩigua mũgambo woima igũrũ ũkĩnjĩĩra atĩrĩ, “Hinga ũrĩa ngwa icio mũgwanja ciugĩte; ndũkaũandĩke.”
5Nake mũraika ũcio ndoonire arũgamĩte iriainĩ na thĩ nyũmũ, akĩoya guoko gwake kwa ũrĩo na igũrũ, 6agĩĩhĩta na Ithe witũ ũrĩa ũtũũraga muoyo tene na tene, o we woombire igũrũ na indo ciothe irĩ kuo, na thĩ na indo ciothe irĩ ho, na iria na indo ciothe irĩ thĩinĩ wayo, akiuga atĩrĩ, “Gũtirĩ ihinda rĩngĩ rĩa gweterera! 7No rĩrĩa mũraika ũcio wa mũgwanja akaahuha karumbeta gake, hĩndĩ ĩyo nĩrĩo hitho ya Ithe witũ ĩkaahingio, o ta ũrĩa aamenyithĩtie ndungata ciake, nĩo anabii.” a a v7 Hitho ĩyo Ithe witũ aamenyithanĩtie na tũnua twa anabii nĩĩkinyaga ũkinyanĩru wayo thĩinĩ wa Mũũriũ wake — nĩyo Ũhoro ũrĩa Mwega ũrĩa ũmenyithanĩtio kũrĩ andũ a ndũũrĩrĩ ciothe (Aefeso 3:8-9; Akolosai 1:26-27).
8Naguo mũgambo ũcio woima igũrũ ũgĩcooka kũnjarĩria rĩngĩ, ũkĩnjĩĩra atĩrĩ, “Thiĩ woe gĩkũnjo kĩu kĩhingũre kĩrĩ guokoinĩ gwa mũraika ũcio arũgamĩte iriainĩ na thĩ nyũmũ.”
9Nĩ ũndũ ũcio ngĩthiĩ kũrĩ mũraika ũcio, ngĩmũhooya aahe gĩkũnjo kĩu kĩnini. Nake akĩnjĩĩra atĩrĩ, “Kĩoe ũkĩrĩe. Nĩgĩgatũma nda yaku ĩgĩe na ũrũrũ, no kanuainĩ gaku nĩgĩgakorwo kĩrĩ mũrĩo ta ũũkĩ.”
10Nĩ ũndũ ũcio ngĩoya gĩkũnjo kĩu kĩnini kuuma guokoinĩ gwa mũraika ũcio, ngĩkĩrĩa. Kanuainĩ gakwa kĩarĩ kĩrĩ mũrĩo ta ũũkĩ; no rĩrĩa ndaakĩrĩire, nda yakwa ĩkĩgĩa na ũrũrũ. 11Nao magĩcooka kũnjĩĩra atĩrĩ, “No mũhaka ũcooke kũratha ũhoro rĩngĩ wĩgiĩ andũ aingĩ, na ndũũrĩrĩ, na thiomi, na athamaki.”