Nagpanaug ang Gamhanan nga Anghel

Isa ka anghel ang nagtapak sang isa ka tiil sa dagat kag sang isa sa duta kag nagpanumpa paagi sa aton Amay: indi na ini magdugay pa. Nagpamulong ang pito ka daguob kag ginpunggan si Juan nga isulat ini. Ginkaon niya ang diutay nga linukot nga kasulatan: matam-is subong sang dugos sa iya baba, mapait sa ulihi. Kinahanglan sia magtagna liwat.

Nagahambal ang aton Amay sa mga bersikulo 4, 8

Kapitulo 10.

Niyan nakita ko ang isa pa ka gamhanan nga anghel nga nagapanaug halin sa langit, nga natabunan sang panganod, may balangaw sa ibabaw sang iya ulo, ang iya guya kaangay sang adlaw, kag ang iya mga tiil kaangay sang mga haligi nga kalayo. May ginauyatan sia nga diutay nga linukot nga basahon nga bukas. Gintungtong niya ang iya tuo nga tiil sa dagat, kag ang iya wala nga tiil sa duta, kag nagsinggit sia kaangay sang nagaungal nga leon. Sang nagsinggit sia, naghambal ang pito ka daguob.

Sang naghambal ang pito ka daguob, magasulat na ako, apang nakabati ako sing tingog halin sa langit nga nagsiling, “Silyuhi ang ila ginhambal; dili mo ini pagsulata.”

Niyan ginbayaw sang anghel nga nakita ko nga nagatindog sa dagat kag sa duta ang iya tuo nga kamot pakadto sa langit, kag nagsumpa sia paagi sa aton Amay nga nagakabuhi sa gihapon gid, nga nagtuga sang langit kag sang tanan nga yara sini, sang duta kag sang tanan nga yara sini, kag sang dagat kag sang tanan nga yara sini, “Wala na sing paglangan! Sa tion nga pahuyupon na sang ikapito nga anghel ang iya budyong, matuman ang tinago nga katuyuan sang aton Amay, subong sang iya ginbantala sa iya mga alagad nga mga manalagna.” ^a

Naghambal liwat ang tingog halin sa langit, “Lakat, kuhaa ang bukas nga linukot nga basahon sa kamot sang anghel nga nagatindog sa dagat kag sa duta.”

Busa nagkadto ako sa anghel kag ginpangayo ko ang diutay nga linukot nga basahon. Nagsiling sia, “Kuhaa kag kauna ini. Mangin mapait ini sa imo tiyan, apang sa imo baba mangin matam-is ini subong sang dugos.”

Ginkuha ko ang diutay nga linukot nga basahon sa kamot sang anghel kag ginkaon ko ini. Sa akon baba matam-is ini subong sang dugos; apang sang nakaon ko na ini, nagpait ang akon tiyan. Niyan nagsiling sila sa akon, “Kinahanglan magtagna ka liwat nahanungod sa madamo nga mga katawohan, mga nasyon, mga hinambalan, kag mga hari.”