ኢያሱ 8

8 ¹አባታችንም ኢያሱን እንዲህ አለው፤ “አትፍራ፤ አትደንግጥም። ተዋጊዎቹን ሁሉ ይዘህ ወደ ጋይ ውጣ። የጋይን ንጉሥ፣ ሕዝቡን፣ ከተማውንና ምድሩን በእጅህ አሳልፌ ሰጥቼሃለሁ። ²በኢያሪኮና በንጉሡ ላይ እንዳደረግህ፣ በጋይና በንጉሡ ላይም እንዲሁ አድርግ፤ ምርኮዋንና እንስሳቿን ግን ለራሳችሁ ውሰዱ። ከከተማዪቱ ኋላ አድብተህ ጠብቅ።”

³ኢያሱና ተዋጊዎቹ ሁሉ ወደ ጋይ ለመውጣት ተነሡ። ኢያሱም ሠላሳ ሺህ ኀያላን ተዋጊዎችን መርጦ በሌሊት ሰደዳቸው። ⁴እንዲህ ሲልም አዘዛቸው፤ “ከከተማዪቱ ኋላ አድብታችሁ ጠብቁ፤ ከከተማዪቱም እጅግ አትራቁ፤ ሁላችሁም ተዘጋጅታችሁ ጠብቁ። ⁵እኔና ሕዝቤ ሁሉ ወደ ከተማዪቱ እንቀርባለን። እነርሱም እንደ ቀድሞው ሊወጉን ሲወጡ፣ ከፊታቸው እንሸሻለን። ⁶ከከተማዪቱ አርቀን እስክናወጣቸው ድረስ ይከተሉናል፤ ‘እንደ ቀድሞው ከፊታችን ይሸሻሉ’ ይላሉና። ስለዚህ ከፊታቸው እንሸሻለን። ⁷እናንተም ከምትደበቁበት ተነሥታችሁ ከተማዪቱን ያዟት፤ አባታችሁ በእጃችሁ አሳልፎ ይሰጣታልና። ⁸ከተማዪቱንም በያዛችሁ ጊዜ በእሳት አቃጥሉአት፤ አባታችን እንዳዘዘ አድርጉ። እነሆ፣ አዝዣችኋለሁ።”

⁹ኢያሱም ሰደዳቸው፤ እነርሱም ወደ ማድፈጫው ስፍራ ሄደው በቤቴልና በጋይ መካከል፣ ከጋይ በስተ ምዕራብ ተቀመጡ፤ ኢያሱ ግን በዚያች ሌሊት በሕዝቡ መካከል አደረ። ¹⁰ኢያሱም ማልዶ ተነሥቶ ሕዝቡን አሰባሰበ፤ ከእስራኤል ሽማግሌዎች ጋርም ሆኖ ወደ ጋይ መራቸው። ¹¹ከእርሱ ጋር የነበሩት ተዋጊዎች ሁሉ ተነሥተው ወደ ፊት ገፉ፤ ከከተማዪቱም ትይዩ ደርሰው ከጋይ በስተ ሰሜን ሰፈሩ፤ በእነርሱና በጋይ መካከልም ሸለቆ ነበረ። ¹²አምስት ሺህ ያህል ሰዎችን ይዞ በቤቴልና በጋይ መካከል፣ ከከተማዪቱ በስተ ምዕራብ አደፈጣቸው። ¹³እንዲህም ሕዝቡን አሰለፉ፤ ሰፈሩ ሁሉ ከከተማዪቱ በስተ ሰሜን፣ የኋላ ጠባቂውም ከከተማዪቱ በስተ ምዕራብ ነበረ፤ ኢያሱም በዚያች ሌሊት ወደ ሸለቆው መካከል ወረደ። ¹⁴የጋይ ንጉሥ ይህን ባየ ጊዜ፣ የከተማዪቱ ሰዎች ማልደው ተነሥተው እስራኤልን ለመውጋት በፍጥነት ወጡ፤ እርሱና ሕዝቡ ሁሉ ዐረባን ትይዩ ወደሚገኘው ወደ ተወሰነው ስፍራ ወጡ። ከከተማዪቱ ኋላ አድብቶ የሚጠብቅ ሰራዊት እንዳለ ግን አላወቀም። ^a a v14 ዐረባ ከገሊላ ባሕር ጀምሮ ወደ ሙት ባሕር ወደ ደቡብ የሚዘረጋ ጥልቅ የዮርዳኖስ ሸለቆ ቈላ ነው። ¹⁵ኢያሱና እስራኤል ሁሉ በፊታቸው እንደ ተሸነፉ መስለው ወደ ምድረ በዳ ሸሹ። ¹⁶በከተማዪቱ የነበሩት ሰዎች ሁሉ እንዲያሳድዷቸው ተጠሩ፤ ኢያሱንም እያሳደዱ ከከተማዪቱ እየራቁ ሄዱ። ¹⁷እስራኤልን ሳያሳድድ በጋይ ወይም በቤቴል የቀረ አንድ ሰው እንኳ አልነበረም፤ ከተማዪቱንም ክፍት ትተው እስራኤልን አሳደዱ።

¹⁸አባታችንም ኢያሱን፣ “በእጅህ ያለውን ጦር ወደ ጋይ ዘርጋ፤ በእጅህ አሳልፌ እሰጣታለሁና” አለው። ኢያሱም በእጁ የያዘውን ጦር ወደ ከተማዪቱ ዘረጋ።

¹⁹እጁን ባነሣም ጊዜ፣ አድፍጠው የነበሩት ከስፍራቸው ፈጥነው ተነሡ፤ ወደ ከተማዪቱም ሮጠው ገብተው ያዟት፤ ፈጥነውም በእሳት አቃጠሉአት። ²⁰የጋይ ሰዎች ዘወር ብለው የከተማዪቱ ጢስ ወደ ሰማይ ሲወጣ አዩ፤ ወደ ምድረ በዳ ይሸሹ የነበሩት እስራኤላውያን በሚያሳድዷቸው ላይ ዘወር ብለው ስለ ተመለሱባቸው፣ ለመሸሽ ምንም መንገድ አልነበራቸውም። ²¹ኢያሱና እስራኤል ሁሉ አድፍጠው የነበሩት ሰዎች ከተማዪቱን እንደ ያዟትና ጢሷ ወደ ላይ እንደ ወጣ ባዩ ጊዜ፣ ዘወር ብለው የጋይን ሰዎች መቱ። ²²የቀሩትም ሊገጥሟቸው ከከተማዪቱ ወጡ፤ የጋይም ሰዎች በሁለቱም ወገን በእስራኤል መካከል ተያዙ። እስራኤልም የተረፈ ወይም ያመለጠ እስከማይኖር ድረስ መቷቸው። ²³የጋይን ንጉሥ ግን በሕይወት ይዘው ወደ ኢያሱ አመጡት።

²⁴እስራኤልም ያሳደዷቸውን የጋይን ነዋሪዎች ሁሉ በሜዳና በምድረ በዳ ገድሎ በጨረሰ ጊዜ፣ ሁሉም በሰይፍ ወድቀው እስከ መጨረሻው እስኪጠፉ ድረስ፣ እስራኤል ሁሉ ወደ ጋይ ተመልሶ በሰይፍ መታት። ²⁵በዚያ ቀን የወደቁት ወንዶችም ሴቶችም ዐሥራ ሁለት ሺህ ነበሩ፤ ይኸውም የጋይ ሰዎች ሁሉ ናቸው። ²⁶ኢያሱም የጋይን ነዋሪዎች ሁሉ ፈጽሞ እስኪያጠፋ ድረስ የዘረጋውን ጦር ወደ ኋላ አልመለሰም። ²⁷እስራኤልም አባታችን ኢያሱን እንዳዘዘው፣ የዚያችን ከተማ እንስሳትና ምርኮ ብቻ ለራሱ ወሰደ። ²⁸እንዲህም ኢያሱ ጋይን አቃጥሎ የዘላለም ፍርስራሽ ክምር አደረጋት፤ እስከ ዛሬም ባድማ ሆና ትገኛለች። ²⁹የጋይንም ንጉሥ እስከ ማታ ድረስ በዛፍ ላይ ሰቀለው። ፀሐይ በጠለቀች ጊዜ ኢያሱ ሬሳው ከዛፉ እንዲወርድ አዘዘ፤ በከተማዪቱ በር መግቢያ ላይም ጣሉት፤ በላዩም ትልቅ የድንጋይ ክምር ከመሩ፤ እስከ ዛሬም ድረስ በዚያ ይገኛል።

እስራኤል የአባታችንን ኪዳን አደሰ

³⁰ከዚያም ኢያሱ በዔባል ተራራ ላይ ለአባታችን፣ ለእስራኤል አምላክ መሠዊያ ሠራ፤ ³¹ይህም የአባታችን ባሪያ ሙሴ ለእስራኤል ሕዝብ ባዘዘው መሠረት፣ በሙሴ ሕግ መጽሐፍ እንደ ተጻፈ፣ በብረት ያልተነካ ካልተጠረበ ድንጋይ የተሠራ መሠዊያ ነበረ። በላዩም ለአባታችን የሚቃጠል መሥዋዕት አቀረቡ፤ የደኅንነትም መሥዋዕት ሠዉ። ³²በዚያም በእስራኤላውያን ፊት፣ ሙሴ የጻፈውን የሙሴን ሕግ ግልባጭ በድንጋዮቹ ላይ ጻፈ። ³³እስራኤልም ሁሉ፣ መጻተኛውም ተወላጁም እንደ አንድ ሆነው፣ ከሽማግሌዎች፣ ከሹማምትና ከዳኞች ጋር የአባታችንን የኪዳን ታቦት በተሸከሙት በሌዋውያን ካህናት ፊት ለፊት፣ በታቦቱ በሁለቱም ወገን ቆሙ። ግማሹ ወደ ገሪዛን ተራራ፣ ግማሹም ወደ ዔባል ተራራ ዞረ፤ ይህም የእስራኤልን ሕዝብ ለመባረክ የአባታችን ባሪያ ሙሴ ቀድሞ ባዘዘው መሠረት ነበረ። ³⁴ከዚያም በሕግ መጽሐፍ እንደ ተጻፈው በትክክል፣ የሕጉን ቃል ሁሉ፣ በረከቱንም መርገሙንም አነበበ። ³⁵ኢያሱ ሙሴ ካዘዘው ቃል ሁሉ አንዳች ሳይተው፣ በእስራኤል ጉባኤ ሁሉ ፊት፣ በሴቶች፣ በሕፃናትና በመካከላቸው በሚኖሩ መጻተኞች ፊት አነበበ።