ኢያሱ 9

9 ¹በተራራማው አገር፣ በቈላውና ወደ ሊባኖስ በሚዘረጋው የታላቁ ባሕር ዳርቻ ሁሉ ከዮርዳኖስ ማዶ የነበሩት ነገሥታት ሁሉ፣ ማለትም ኬጢያውያን፣ አሞራውያን፣ ከነዓናውያን፣ ፌርዛውያን፣ ኤዊያውያንና ኢያቡሳውያን ይህን በሰሙ ጊዜ፣ ²ኢያሱንና እስራኤልን ለመውጋት እንደ አንድ ሆነው ተሰበሰቡ። ³የገባዖን ሰዎች ግን ኢያሱ በኢያሪኮና በጋይ ላይ ያደረገውን በሰሙ ጊዜ፣ ⁴እነርሱም በበኩላቸው በተንኰል ሠሩ፤ እንደ መልእክተኞች ተመስለው ተነሡ፤ ለአህዮቻቸውም ያለቁ ከረጢቶችንና የተቀደዱና የተጠገኑ አሮጌ የወይን አቍማዳዎችን ያዙ፤ ⁵በእግሮቻቸው ያለቁና የተጠገኑ ጫማዎች፣ በላያቸውም የተቦጫጨቀ ልብስ ነበረ፤ ስንቃቸውም ሁሉ ደርቆ የተፈረፈረ ነበር። ⁶በጌልገላ ሰፈር ወዳለው ወደ ኢያሱ ሄደው እርሱንና የእስራኤልን ሰዎች፣ “ከሩቅ አገር መጥተናል፤ አሁንም ከእኛ ጋር ኪዳን ግቡ” አሏቸው።

⁷የእስራኤል ሰዎች ግን ኤዊያውያንን፣ “ምናልባት በመካከላችን ትኖሩ ይሆናል፤ እንዴት ከእናንተ ጋር ኪዳን ልንገባ እንችላለን?” አሏቸው።

⁸ኢያሱንም፣ “እኛ ባሪያዎችህ ነን” አሉት። ኢያሱም፣ “እናንተ እነማን ናችሁ? ከወዴትስ መጣችሁ?” ብሎ ጠየቃቸው።

⁹እነርሱም እንዲህ አሉት፤ “ባሪያዎችህ ስለ እግዚአብሔር አምላክህ ስም እጅግ ከራቀ አገር መጥተናል፤ ዝናውንና በግብፅ ያደረገውን ሁሉ ሰምተናልና፤ ¹⁰ከዮርዳኖስም ማዶ በነበሩት በሁለቱ የአሞራውያን ነገሥታት ላይ፣ ማለትም በሐሴቦን ንጉሥ በሴዎንና በአስታሮት ይነግሥ በነበረው በባሳን ንጉሥ በዐግ ላይ ያደረገውን ሁሉ ሰምተናል። ¹¹ስለዚህ ሽማግሌዎቻችንና የአገራችን ሰዎች ሁሉ፣ ‘ለጕዞ ስንቅ ይዛችሁ ሄዳችሁ ተገናኟቸው፤ “እኛ ባሪያዎችሁ ነን፤ አሁንም ከእኛ ጋር ኪዳን ግቡ” በሏቸው’ አሉን። ¹²ወዳንተ ልንመጣ በወጣንበት ቀን በቤታችን ስንሸክፈው ምግባችን ትኩስ ነበር፤ አሁን ግን እነሆ፣ ደርቆ ተፈረፍሯል። ¹³እነዚህ የወይን አቍማዳዎች በሞላናቸው ጊዜ አዲስ ነበሩ፤ አሁን ግን ተቀደዋል። ልብሳችንና ጫማችንም ከጕዞው እጅግ መርዘም የተነሣ አልቀዋል።”

¹⁴ሰዎቹም ከስንቃቸው ቀመሱ፤ አባታችንን ግን ምክር አልጠየቁም። ¹⁵ኢያሱም ከእነርሱ ጋር ሰላም አደረገ፤ በሕይወት እንዲኖሩም ኪዳን ቈረጠላቸው፤ የማኅበሩም መሪዎች ማሉላቸው። ^a a v15 ‘ኪዳን ቈረጠ’ የሚለው ጥንታዊ ፈሊጥ ነው፤ መደበኛ ስምምነቶች እንስሳትን በማረድና በሁለቱ ወገኖች መካከል በመከፋፈል ይጸኑ ነበር። ¹⁶ከእነርሱ ጋር ኪዳን ከገቡ ከሦስት ቀን በኋላ፣ እነዚህ ሰዎች በመካከላቸው የሚኖሩ ጎረቤቶች መሆናቸውን ሰሙ። ¹⁷የእስራኤልም ሰዎች ተነሥተው በሦስተኛው ቀን ወደ ከተሞቻቸው ደረሱ። ከተሞቻቸውም ገባዖን፣ ከፊራ፣ ብኤሮትና ቂርያትይዓሪም ነበሩ። ¹⁸የማኅበሩ መሪዎች በአባታችን፣ በእስራኤል አምላክ ምለውላቸው ስለ ነበር እስራኤል አልወጓቸውም። ማኅበሩም ሁሉ በመሪዎቹ ላይ አጕረመረመ። ¹⁹መሪዎቹ ሁሉ ግን ማኅበሩን ሁሉ እንዲህ አሏቸው፤ “በአባታችን፣ በእስራኤል አምላክ ምለንላቸዋል፤ ስለዚህ አሁን ልንነካቸው አንችልም። ²⁰የምናደርግላቸው ይህ ነው፤ ስለ ማልንላቸው መሐላ ቍጣ እንዳይወርድብን በሕይወት ይኑሩ።” ²¹መሪዎቹም፣ “በሕይወት ይኑሩ” አሏቸው። እንዲሁም መሪዎቹ እንደ ተናገሩት ለማኅበሩ ሁሉ እንጨት ቆራጮችና ውሃ ቀጂዎች ሆኑ።

²²ኢያሱም ጠርቶ እንዲህ አላቸው፤ “በመካከላችን ስትኖሩ ሳላችሁ፣ ‘ከእናንተ እጅግ ርቀን እንኖራለን’ ብላችሁ ስለ ምን አታለላችሁን? ²³አሁንም የተረገማችሁ ናችሁ፤ ለአባቴ ቤት እንጨት ቆራጮችና ውሃ ቀጂዎች ሆናችሁ ሁልጊዜ ባሪያዎች ትሆናላችሁ።”

²⁴እነርሱም ኢያሱን መልሰው እንዲህ አሉት፤ “እግዚአብሔር አምላክህ ምድሪቱን ሁሉ ሊሰጣችሁና በፊታችሁ የሚኖሩትን ሁሉ ሊያጠፋላችሁ ባሪያውን ሙሴን ማዘዙ ለባሪያዎችህ በግልጽ ተነግሮ ነበር። ስለዚህ ከእናንተ የተነሣ ስለ ሕይወታችን እጅግ ፈርተን ይህን አደረግን። ²⁵አሁንም በእጅህ ነን፤ በፊትህ መልካምና ትክክል የሆነውን አድርግብን።”

²⁶እርሱም እንዲሁ አደረገላቸው፤ ከእስራኤል ሰዎች እጅ አዳናቸው፤ አልገደሏቸውም። ²⁷ኢያሱም በዚያ ቀን ለማኅበሩና በሚመርጠው ስፍራ ለአባታችን መሠዊያ እንጨት ቆራጮችና ውሃ ቀጂዎች አደረጋቸው፤ እስከ ዛሬም ድረስ እንዲሁ ነው።