ኢያሱ 10

10 ¹የኢየሩሳሌም ንጉሥ አዶኒ ጼዴቅ፣ ኢያሱ ጋይን ይዞ ፈጽሞ እንዳጠፋት፣ ኢያሪኮንና ንጉሧን እንዳደረገ ሁሉ ጋይንና ንጉሧን እንዳደረገ፣ የገባዖንም ሰዎች ከእስራኤል ጋራ ዕርቅ አድርገው በመካከላቸው እንደ ተቀመጡ ሰማ። ²ገባዖን እንደ አንዷ የንጉሥ ከተማ ታላቅ ከተማ ስለ ነበረች፣ ከጋይም ስለምትበልጥ፣ ሰዎቿም ሁሉ ተዋጊዎች ስለ ነበሩ የኢየሩሳሌም ሰዎች እጅግ ፈሩ። ³ስለዚህ የኢየሩሳሌም ንጉሥ አዶኒ ጼዴቅ ወደ ኬብሮን ንጉሥ ወደ ሆሃም፣ ወደ ያርሙት ንጉሥ ወደ ጲራም፣ ወደ ለኪስ ንጉሥ ወደ ያፊያ፣ ወደ ዔግሎንም ንጉሥ ወደ ዴቢር እንዲህ ሲል ላከ፤ ⁴“ገባዖን ከኢያሱና ከእስራኤል ሕዝብ ጋራ ዕርቅ አድርጋለችና ወደ እኔ ውጡ፤ እርዱኝም፤ ገባዖንንም እንውጋ።” ⁵ከዚያም አምስቱ የአሞራውያን ነገሥታት፣ የኢየሩሳሌም፣ የኬብሮን፣ የያርሙት፣ የለኪስና የዔግሎን ነገሥታት ተባብረው ከሠራዊታቸው ሁሉ ጋራ ወጡ፤ በገባዖን ላይ ሰፈሩ፤ ተዋጓትም። ⁶የገባዖን ሰዎች ጌልገላ ወዳለው ሰፈር ወደ ኢያሱ እንዲህ የሚል መልእክት ላኩ፤ “አገልጋዮችህን አትተዋቸው፤ ፈጥነህ መጥተህ አድነን፤ እርዳን፤ በተራራማው አገር ያሉ የአሞራውያን ነገሥታት ሁሉ ተባብረው ተነሥተውብናል።”

⁷ስለዚህ ኢያሱ ከተዋጊዎቹ ሁሉ ጋራ፣ ከኀያላን ጦረኞቹ ጋራ ከጌልገላ ወጣ።

⁸አባታችንም ኢያሱን፣ “አትፍራቸው፤ በእጅህ አሳልፌ ሰጥቻቸዋለሁና፤ ከእነርሱ አንዱም በፊትህ አይቆምም” አለው።

⁹ኢያሱም ሌሊቱን ሙሉ ከጌልገላ ወጥቶ ሄዶ ድንገት ወረደባቸው። ¹⁰አባታችንም በእስራኤል ፊት ደንጋጤ ላከባቸው፤ በገባዖንም በታላቅ መቅሠፍት መታቸው፤ ወደ ቤትኆሮን በሚወጣው መንገድ አሳደዳቸው፤ እስከ አዜቃና እስከ መቄዳ ድረስም ፈጃቸው። ¹¹በእስራኤል ፊት በቤትኆሮን ቍልቍለት ሲሸሹ፣ አባታችን እስከ አዜቃ ድረስ ከሰማይ ታላላቅ ድንጋዮችን ጣለባቸው፤ ሞቱም። ከበረዶው ድንጋይ የተነሣ የሞቱት፣ የእስራኤል ሕዝብ በሰይፍ ከገደሉት ይበዛሉ።

¹²ከዚያም አባታችን አሞራውያንን ለእስራኤል ሕዝብ አሳልፎ በሰጠበት ቀን ኢያሱ ለአባታችን ተናገረ፤ በመላው እስራኤልም ፊት እንዲህ አለ፤ “ፀሐይ ሆይ፣ በገባዖን ላይ ቁሚ፤ ጨረቃም ሆይ፣ በአያሎን ሸለቆ ላይ።” ¹³ፀሐይም ቆመ፤ ሕዝቡም በጠላቶቹ ላይ በቀል እስኪፈጽም ድረስ ጨረቃ ዐረፈ። ይህ በያሻር መጽሐፍ የተጻፈ አይደለምን? ፀሐይ በሰማይ መካከል ቆመ፤ ሊጠልቅም ወደ አንድ ሙሉ ቀን ያህል አልቸኰለም። ^a a v13 የያሻር መጽሐፍ የጥንት የዕብራውያን የግጥሞችና የመዝሙሮች ስብስብ ነበር፤ አሁን ጠፍቷል። ¹⁴አባታችን የሰውን ቃል የሰማበት እንደዚህ ያለ ቀን ከዚያ በፊትም ሆነ ከዚያ በኋላ ኖሮ አያውቅም፤ አባታችን ስለ እስራኤል ተዋግቷልና።

¹⁵ከዚያም ኢያሱ ከእርሱም ጋራ የነበሩት እስራኤል ሁሉ ጌልገላ ወዳለው ሰፈር ተመለሱ።

አምስቱ ነገሥታት ተዋረዱ

¹⁶እነዚህ አምስቱ ነገሥታት ግን ሸሽተው በመቄዳ ባለው ዋሻ ውስጥ ተሸሽገው ነበር። ¹⁷ኢያሱም፣ “አምስቱ ነገሥታት በመቄዳ ባለው ዋሻ ውስጥ ተሸሽገው ተገኝተዋል” ተብሎ ተነገረው።

¹⁸ኢያሱም፣ “በዋሻው አፍ ላይ ታላላቅ ድንጋዮችን አንከባልሉ፤ እንዲጠብቋቸውም ሰዎችን በአጠገቡ አቁሙ። ¹⁹እናንተ ግን በዚያ አትቈዩ፤ ጠላቶቻችሁን አሳድዱ፤ ከኋላቸውም ምቷቸው፤ ወደ ከተሞቻቸው እንዲደርሱ አትፍቀዱ፤ አባታችሁ በእጃችሁ ሰጥቷቸዋልና” አለ።

²⁰ኢያሱና የእስራኤል ሕዝብ በታላቅ መቅሠፍት መተዋቸው፤ ፈጅተዋቸውም፤ ሆኖም ጥቂት ተራፊዎች ወደ ተመሸጉ ከተሞች አመለጡ። ²¹ከዚያም ሕዝቡ ሁሉ መቄዳ ወዳለው ሰፈር ወደ ኢያሱ በሰላም ተመለሱ፤ በማንኛውም እስራኤላዊ ላይ አንዲትም ቃል ለመናገር የደፈረ አልነበረም። ²²ከዚያም ኢያሱ፣ “የዋሻውን አፍ ክፈቱ፤ እነዚያንም አምስቱን ነገሥታት ወደ እኔ አውጡልኝ” አለ። ²³እነርሱም አምስቱን ነገሥታት ከዋሻው ወደ እርሱ አወጡ፤ የኢየሩሳሌምን፣ የኬብሮንን፣ የያርሙትን፣ የለኪስንና የዔግሎንን ነገሥታት። ²⁴እነዚህን ነገሥታት ወደ ኢያሱ ባወጧቸው ጊዜ የእስራኤልን ሰዎች ሁሉ ጠራ፤ ከእርሱም ጋራ የሄዱትን የጦር አለቆች፣ “ቅረቡ፤ እግሮቻችሁን በእነዚህ ነገሥታት ዐንገት ላይ አድርጉ” አላቸው። እነርሱም ቀርበው እግሮቻቸውን በዐንገታቸው ላይ አደረጉ።

²⁵ኢያሱም፣ “አትፍሩ፤ አትደንግጡም፤ በርቱ፤ ጠንከሩም፤ አባታችን በምትዋጓቸው ጠላቶች ሁሉ ላይ የሚያደርገው ይህ ነው” አላቸው።

²⁶ከዚያ በኋላ ኢያሱ ነገሥታቱን መታ፤ ገደላቸውም፤ በአምስት ዛፎችም ላይ ሰቀላቸው፤ እስከ ማታም ድረስ በዚያ ተሰቅለው ቈዩ። ²⁷ፀሐይ በጠለቀች ጊዜ ኢያሱ ሬሳዎቻቸው ከዛፎቹ እንዲወርዱና ነገሥታቱ ተሸሽገውበት ወደ ነበረው ዋሻ እንዲጣሉ አዘዘ። በዋሻውም አፍ ላይ ታላላቅ ድንጋዮችን አኖሩ፤ እስከ ዛሬም ድረስ በዚያ አሉ።

²⁸በዚያም ቀን ኢያሱ መቄዳን ያዘ፤ እርሷንና ንጉሧን በሰይፍ መታ፤ በውስጧ ያለውንም ሰው ሁሉ አጠፋ፤ ተራፊም አላስቀረም። የኢያሪኮን ንጉሥ እንዳደረገ ሁሉ የመቄዳን ንጉሥ አደረገ።

አባታችን የደቡብ ከተሞችን ይሰጣል

²⁹ከዚያም ኢያሱ ከእርሱም ጋራ የነበሩት እስራኤል ሁሉ ከመቄዳ ወደ ልብና ተሻገሩ፤ ልብናንም ተዋጉ። ³⁰አባታችንም እርሷንና ንጉሧን ደግሞ ለእስራኤል አሳልፎ ሰጠ። ኢያሱም እርሷንና በውስጧ ያለውን ሰው ሁሉ በሰይፍ ስለት መታ፤ ተራፊም አላስቀረም። የኢያሪኮን ንጉሥ እንዳደረገ ሁሉ ንጉሧንም አደረገ።

³¹ከዚያም ኢያሱ ከእርሱም ጋራ የነበሩት እስራኤል ሁሉ ከልብና ወደ ለኪስ ተጓዙ፤ በእርሷም ላይ ሰፈሩ፤ ተዋጓትም። ³²አባታችንም ለኪስን ለእስራኤል አሳልፎ ሰጠ፤ ኢያሱም በሁለተኛው ቀን ያዛት፤ ልብናን እንዳደረገ ሁሉ እርሷንና በውስጧ ያለውን ሁሉ በሰይፍ መታ። ³³ከዚያም የጌዤር ንጉሥ ሆራም ለኪስን ሊረዳ ወጣ፤ ኢያሱ ግን እርሱንና ሕዝቡን መታ፤ ተራፊም አላስቀረም።

³⁴ኢያሱ ከእርሱም ጋራ የነበሩት እስራኤል ሁሉ ከለኪስ ወደ ዔግሎን ተሻገሩ፤ በእርሷም ላይ ሰፈሩ፤ ተዋጓትም። ³⁵በዚያም ቀን ያዟት፤ በሰይፍ ስለትም መቷት። ለኪስን እንዳደረገ ሁሉ በዚያ ቀን በውስጧ ያለውን ሰው ሁሉ ፈጽሞ አጠፋ።

³⁶ከዚያም ኢያሱ ከእስራኤል ሁሉ ጋራ ከዔግሎን ወደ ኬብሮን ወጣ፤ ተዋጋትም። ³⁷ያዟትም፤ በሰይፍ ስለትም መቷት፤ ንጉሧን፣ ከተሞቿን ሁሉ፣ በውስጧ ያለውንም ሁሉ መቱ። ዔግሎንን እንዳደረገ ሁሉ ተራፊ አላስቀረም፤ እርሷንና በውስጧ ያለውን ሁሉ ፈጽሞ አጠፋ።

³⁸ከዚያም ኢያሱ ከእርሱም ጋራ የነበሩት እስራኤል ሁሉ ወደ ዴቢር ተመለሱ፤ ተዋጓትም። ³⁹እርሷን፣ ንጉሧንና መንደሮቿን ሁሉ ያዘ፤ በሰይፍም መታቸው፤ በውስጧ ያለውንም ሰው ሁሉ ፈጽሞ አጠፋ፤ ተራፊም አልቀረም። ለኬብሮንና ለልብና ከነንጉሧ እንዳደረገ ሁሉ ለዴቢርና ለንጉሧ አደረገ። ⁴⁰ኢያሱም አገሩን ሁሉ፣ ተራራማውን አገር፣ ኔጌብን፣ ቈላውንና ተዳፋቱን፣ ነገሥታቸውንም ሁሉ መታ። ተራፊ አላስቀረም፤ የእስራኤል አምላክ አባታችን እንዳዘዘው እስትንፋስ ያለውን ሁሉ አጠፋ። ⁴¹ኢያሱም ከቃዴስ በርኔ አንሥቶ እስከ ጋዛ ድረስ፣ የጎሳንንም አገር ሁሉ እስከ ገባዖን ድረስ መታቸው። ⁴²ኢያሱ እነዚህን ነገሥታት ሁሉና አገራቸውን በአንድ ጊዜ ያዘ፤ የእስራኤል አምላክ አባታችን ስለ እስራኤል ተዋግቷልና። ⁴³ከዚያም ኢያሱ ከእርሱም ጋራ የነበሩት እስራኤል ሁሉ ጌልገላ ወዳለው ሰፈር ተመለሱ።