Joshua 10

10 ¹Jerusalemwui awunga Adoni-zedekna, Joshuana Jericho kala chiwui awungali sākahai athishurda Ai kala chiwui awungali sāda Ai keinung khuilaga sāshimān khavai tharchigatta sai kahai chi, kala Gibeonwui mibingna Israelli mashitkhuida ara athumwui ngachaili sompama kahai chi shāhaowa. ²Jerusalemwui mibing chi khamathānna ngacheeserhaowa, kaja Gibeon hi keinung khare akhana, awungawui keinungbingwui akha thai, kala chi Ai eina khareia, kala chiwui mibing saikora kapingabing mānga. ³Chiwui vang Jerusalemwui awunga Adoni-zedekna, Hebronwui awunga Hohamli, Jarmuthwui awunga Piramli, Lachishwui awunga Japhiali, kala Eglonwui awunga Debirli pao hāngchiphunda hānga, ⁴"Ili rāngachonmilu, kala ithumna Gibeonli vāngararra, kaja chi Joshua kala Israelwui mibingli mashitkhuihaira." ⁵Chieina Jerusalem, Hebron, Jarmuth, Lachish, kala Eglonwui awungabing, Amorwui awunga phangā china ngarumda athumwui ashangva̱ saikora eina ngasoda vāhaowa. Athumna Gibeonli rairum sāda chili ngarara. ⁶Gibeonwui mibingna Gilgal rāmrahli khalei Joshuali pao hāngchiphunda hānga, "Nawui raobingli mahormihaialu! Thākta rāda ithumli kanmilu, ithumli ngachonmilu! Phungramli khalei Amorwui awunga saikorana ithumli angararda khangarumhaira."

⁷Chiwui vang Joshuana awui raimibing saikora, awui kapingpinga mibing eina ngasoda Gilgalwui eina vāhaowa.

⁸Kala ithumwui Avāna Joshuali hānga, "Athumli mangacheealu, kaja ina athumli nawui pāngli horsangmihaira. Nawui mangāli akhala manganingmara."

⁹Chiwui vang Joshuana ngayā katong Gilgalwui eina vālaga, hankhaung eina athumli rāsamphanga. ¹⁰Kala ithumwui Avāna Israelwui mangāli athumli ngacheeserhao ngasaklaga, Gibeonli khamathānna sākazamlaga, Beth-horonshong vāki shongfali athumli kharomda, Azekah kala Makkedah vāshungda sākazammihaowa. ¹¹Athumna Israelwui mangāli Beth-horonwui kaphung arāp tāda yāmkhavā tharan, ithumwui Avāna kazingramwui eina athumli lunggui khare, Azekah vāshungda horsanga, kala athum thihaowa. Israelwui mibingna raighai eina shaothata eina, theih eina thikahaibing chi kachungkhaya.

¹²Chieina ithumwui Avāna Amorbingli Israelwui mibingli horsangmi kahai chithang, Joshuana ithumwui Avāli hānga, kala Israel katong mangāli ana hānga, "Zimik, Gibeonwuitungli nganingchinglu, kala kachāng, Aijalon Tampākwuitungli nganingchinglu." ¹³Yurna athumwui yangkashebingli athut khuiranglakha eina tangda zimik nganingchinga, kala kachāng nganingchinga. Hi Jasharwui Lairikli kapihaida maleimala? Zimik khamasaiwui alungli nganingchinga, zimiksho katong akha thai eina katāthui khavai mathākmana. ^a a v13 Jasharwui Lairik hi rida kahai Hebrewbingwui laa kala hāla kazipkhui akhana, ara pākthuihairasai. ¹⁴Ithumwui Avāna mikumowui tui khuisangkasā chithai zimiksho, chiwui mangāli ari thili akhala maleisāmana; kaja ithumwui Avāna Israelwui vang ngararmi kahaina.

¹⁵Chieina Joshua kala ali ngasoda Israel katong Gilgal rāmrahli latunga.

Awunga Phangā Maishi Ngasakhaowa

¹⁶Awunga phangā hi yāmlaga Makkedahwui lungkhurli themlāk ngayinkakhuina. ¹⁷Kala Joshuali hānghaowa, "Awunga phangā chi Makkedahwui lungkhurli ngayinkakhuina samphanghaira."

¹⁸Chieina Joshuana hānga, "Lunggui kahaka lungkhurwui khamorli khalangda phumlaga, chi khamayon khavai mibingli chiwui pheili phākasanglu. ¹⁹Kha nathum chili mapamalu. Nathumwui yangkashebingli kharomvāda khanuklila sāthatlu. Athumli athumwui keinungbingli mavāshokngasakalu, kaja nathumwui Avāna athumli nathumwui pāngli horsangmihaira."

²⁰Joshua kala Israelwui mibingna athumli sākazama peichaoda sāshimānmiserhaowa, kha kataibing kateokha china raipan sākahai keinungbingli yāmshokhaowa. ²¹Chieina mi saikorana Makkedahwui rāmrahli Joshuali aram latunga, kala mi khipānakhala Israelnao akhali khamatuila masālengmana. ²²Chieina Joshuana hānga, "Lungkhurwui khamor sholaga awunga phangā chi iwuili khuishokhaolu." ²³Chieina athumna Jerusalem, Hebron, Jarmuth, Lachish, kala Eglonwui awungabing, awunga phangā chi lungkhurwui eina awuili khuishoka. ²⁴Awunga chibingli Joshuali khuishokta tharan, ana Israelnaobing saikorali kaho, kala awuili ngasoda vākahai raithānabingli hānga, "Rākhanganailu, awunga chibingwui kahungli nathumwui phei haimilu." Chieina athumna khanganaida athumwui kahungli athumwui phei haimi.

²⁵Joshuana athumli hānga, "Mangacheealu lah maningkhariklu. Pingmeida sālu, lungsanmeilu, kaja nathumna ngararar yangkashe saikorali ithumwui Avāna hithāda sāra."

²⁶Chiwui thili, Joshuana awunga chibingli sāthathaida, thing phangāli thānghai, kala ngazin eina tangda thing chibingtungli kāngyuihai. ²⁷Zimik katun eina Joshuana angun chibingli thingtungwui eina khuitāda, awungabing ngathum kahai lungkhurli horsang khavai kasoi. Kala athumna lungkhurwui khamorli lunggui kahaka haimi, chi aja eina tangda lei.

²⁸Chithang zimiksho Joshuana Makkedahli yuida, chi kala chiwui awungali raighai eina sāthata, kala chiwui alungli khalei mi saikorali peichaoda sākhayāngmiserhaowa; khipākha maringshokmana. Jerichowui awungali sai athishurda Makkedahwui awungalila sai.

Ithumwui Avāna Azingshong Keinungbing Horsangmi

²⁹Chieina Joshua kala awuili ngasoda Israel saikorana Makkedahwui eina Libnahshong vaida, Libnahli ngarara. ³⁰Kala ithumwui Avānala chi kala chiwui awungali Israelwui pāngli horsangmi. Joshuana chi kala chiwui alungli khalei mi saikorali raighai eina sāthata, khipākha maringshokmana. Jerichowui awungali sai athishurda chiwui awungalila sai.

³¹Chieina Joshua kala awuili ngasoda Israel saikorana Libnahwui eina Lachishshong vaida, chili rairum asāda ngarara. ³²Kala ithumwui Avāna Lachishli Israelwui pāngli horsangmi, kala kakhanethangla Joshuana chi khuida, Libnahli sai athishurda chi kala chiwui alungli khalei mi saikorali raighai eina sāthata. ³³Chieina Gezerwui awunga Horamna Lachishli thuingachon khavai kāna, kha Joshuana ali kala awui mibingli sāthatserhaowa, khipākha maringshokmana.

³⁴Joshua kala awuili ngasoda Israel saikorana Lachishwui eina Eglonshong vaida, chili rairum asāda ngarara. ³⁵Chithang athumna chi khuihaowa kala raighai eina sāthatserhaowa; chithang ana Lachishli kasā thāda chili kapambing saikora peichaoda sākazammiserhaowa.

³⁶Chieina Joshua eina Israel saikorana Eglonwui eina Hebronli kāda angarara. ³⁷Athumna chi khuida, chiwui awunga, chiwui keinungbing saikora, kala chili kapambing saikora raighai eina sāthatserhaowa; ana Eglonli kasā thāda khipākha maringshokmana, kala chi eina chili kapambing saikora peichaoda sākazammiserhaowa.

³⁸Chieina Joshua eina awuili ngasoda Israel saikorana Debirli latungda chi ngarara. ³⁹Ana chi, chiwui awunga, kala chiwui kha̱bing saikora khuida raighai eina sāthatserhaowa, kala chili kapambing saikora peichaoda sākazammiserhaowa; khipākha maringshokmana. Hebron kala Libnah eina chiwui awungali kasā thāda, ana Debir kala chiwui awungali sāmi. ⁴⁰Chieina Joshuana ngalei saikora, kaphungram, Negeb, angakoram, kala kaphungpheibing, kala athumwui awungabing saikora sāthata; khipākha maringshokmana, kala ithumwui Avā, Israelwui Varena kakaso athishurda ana kharingyur akhala mataila sāthatserhaowa. ⁴¹Kala Joshuana Kadesh-barneawui eina Gaza vāshungda, kala Goshen ngalei saikora Gibeon vāshungda sāthata. ⁴²Awungabing saikora kala athumwui ngalei chi Joshuana atam akhathangli khuihaowa, kaja Israelwui Vare, ithumwui Avāna Israelwui vang ngarara. ⁴³Chieina Joshua eina awuili ngasoda Israel saikorana Gilgal rāmrahli latunghaowa.